Jeremiah 33

Ilonggo (Maayong Balita nga Biblia (2012))

← Chapter 32 Jump to: Chapter 34 →

1Sang nabilanggo pa ako didto sa pasiyuhan, ang pulong sang Ginoo nag-abot sa akon liwat.

2Ang Ginoo, nga naghimo sang duta, nga nagdihon kag nagpahamtang sini sa iya lugar, naghambal sa akon. Sia nga ang iya ngalan amo ang Ginoo nagsiling,

3“Panawag ka sa akon, kag ako magasabat sa imo. Sugiran ko ikaw sang makatilingala kag makatalanhaga nga mga butang nga wala mo mahibaloi.

4Ako, ang Ginoo, ang Dios sang Israel, nagasiling nga ang mga balay sang Jerusalem, kag ang mga palasyo sang mga hari sang Juda pagagub-on subong resulta sang pagkibon kag pagpanalakay.

5Ang iban magaaway batok sa mga taga-Babilonia nga magapuno sang mga balay sing mga bangkay sang mga tawo nga akon pagapamatyon tungod sang akon kaakig kag kasingkal. Ginbayaan ko ini nga siudad tungod sang malaut nga mga butang nga ginhimo sang iya mga tawo.

6Pero, ayuhon ko ini nga siudad kag ang iya mga pumoluyo, kag ibalik ko ang ila maayo nga lawas. Ipakita ko sa ila ang bugana nga paghidait kag kalig-unan.

7Pauswagon ko ang Juda kag ang Israel, kag patindugon ko sila liwat subong sang una.

8Tinloan ko sila sa mga sala nga ila nahimo batok sa akon. Patawaron ko ang ila mga sala kag ang ila pagbato.

9Ang Jerusalem amo ang ginahalinan sang akon kalipay, kadungganan kag bugal, kag ang tagsa ka pungsod sa kalibutan magakahadlok kag magakurog kon mabatian nila ang maayo nga mga butang nga akon ginahimo para sa mga tawo sang Jerusalem, kag ang kauswagan nga akon dalhon sa siudad.”

10Ang Ginoo nagsiling, “Ang mga tawo nagasiling nga ini nga lugar kaangay sang isa ka desierto nga wala sing nagaestar nga mga tawo ukon mga sapat. Kag husto sila nga ang mga kabanwahanan sang Juda kag ang mga dalan sang Jerusalem wala sing tawo. Wala sing mga tawo ukon mga sapat nga nagaestar didto. Pero sa sini nga mga lugar mabatian ninyo liwat

11ang sininggit sang pagkinasadya kag pagkinalipay, kag ang mga tingog sang nobyo kag nobya. Mabatian ninyo ang mga tawo nga nagaamba samtang nagadala sila sing mga halad sang pagpasalamat sa akon Templo. Magasiling sila: ‘Magpasalamat sa Ginoo sang mga hangaway, tungod kay sia maayo, kag ang iya paghigugma wala sing katapusan.’ Himuon ko ini nga duta nga mainuswagon subong sang una. Ako, ang Ginoo, naghambal sini.”

12Ang Ginoo sang mga hangaway nagsiling, “Sa sini nga duta nga kaangay sang isa ka desierto, kag sa diin wala sing mga tawo ukon mga sapat nga nagaestar, sa liwat may mga halalban sa diin ang mga manugbantay magpahalab sang ila mga karnero.

13Sa mga kabanwahanan sa kabakuloran, sa kunsaran sang mga bakulod kag sa nabagatnan sang Juda, sa kadutaan ni Benjamin, sa mga barangay sa palibot sang Jerusalem, kag sa mga kabanwahanan sang Juda, ang mga manugbantay sa liwat magaisip sang ila mga karnero. Ako, ang Ginoo, naghambal sini.”

14Ang Ginoo nagsiling, “Magaabot ang tion nga tumanon ko ang saad nga akon ginhimo sa mga tawo sang Israel kag Juda.

15Sa sadto nga tion, pilion ko subong hari ang isa ka matarong nga kaliwat ni David. Ini nga hari magahimo sing matarong kag nagakaigo sa bug-os nga duta.

16Ang mga tawo sang Juda kag sang Jerusalem pagaluwason kag magakabuhi nga wala sing katalagman. Ang siudad pagatawgon: ‘Ang Ginoo aton katarungan.’

17Gani karon, ako, ang Ginoo, nagasaad nga may isa sa gihapon nga kaliwat ni David nga manginhari sang Israel,

18kag may mga pari sa gihapon gikan sa tribo ni Levi nga magaalagad sa akon, kag magahalad sang mga halad nga sinunog, sang mga halad nga kalan-on, kag sang mga halad.”

19Ang Ginoo nagsiling sa akon,

20“Naghimo ako sang kasugtanan sa adlaw kag sa gab-i, sa bagay nga nagaabot ini sa natalana nga tion, kag ini nga kasugtanan indi gid malapas.

21Sa amo man nga bagay naghimo ako sing kasugtanan upod sa akon alagad nga si David, nga sa gihapon may isa sia ka kaliwat nga manginhari, kag naghimo ako sang isa ka kasugtanan sa mga pari gikan sa tribo ni Levi nga sila magaalagad sa akon sa gihapon, kag ini nga mga kasugtanan indi gid malapas.

22Pamuaron ko ang kadamuon sang mga kaliwat sang akon alagad nga si David, kag ang kadamuon sang mga pari gikan sa tribo ni Levi, sa bagay nga indi sila maisipan subong sang mga bituon sa langit ukon mga balas sa baybayon.”

23Ang Ginoo nagsiling sa akon,

24“Natalupangdan mo bala nga ang mga tawo nagasiling nga ginsikway ko ang Israel kag ang Juda, ang duha ka mga panimalay nga akon ginpili? Gani ginatamay nila ang akon mga tawo kag wala na sila ginakabig subong isa ka pungsod.

25Pero ako, ang Ginoo, may kasugtanan sa adlaw kag sa gab-i, kag ginhimo ko ang mga kasugoan nga nagagahom sa langit kag sa duta.

26Kag subong nga ginhimo ko ini, subong man tumanon ko ang akon kasugtanan sa mga kaliwat ni Jacob, kag sa akon alagad nga si David. Magapili ako sing isa sang mga kaliwat ni David nga magagahom sang mga kaliwat ni Abraham, ni Isaac, kag ni Jacob. Kaluoyan ko ang akon mga tawo kag pauswagon ko sila liwat.”

← Chapter 32 Jump to: Chapter 34 →