Jeremiah 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Ginpadala ako sang Ginoo sa pwerta sang Templo, sa diin ang mga tawo sang Juda nagsulod sa pagsimba. Nagsiling sia sa akon sa pagtindog didto kag sa pagpahibalo sang inugsiling sang Ginoo sang mga hangaway, ang Dios sang Israel: “Bayluhi ang inyo pagginawi kag ang mga butang nga inyo ginahimo, agod tugotan ko kamo sa pagpadayon sa pagkabuhi diri.

4Untati ninyo ang pagpati sa butig nga mga pulong, ‘Indi kami maano! Amo ini ang Templo sang Ginoo, ang Templo sang Ginoo, ang Templo sang Ginoo!’

5“Bayluhi ang inyo pagginawi kag untata ninyo ang mga butang nga inyo ginahimo. Magtratahay kamo sing nagakaigo.

6Indi na kamo magpamintaha sa mga dumoluong, mga ilo, kag mga balo. Indi na kamo magpamatay sang mga tawo nga wala sing sala sa sining duta. Indi na kamo magsimba sa iban nga mga dios, kay ini magalaglag sa inyo.

7Kon magbaylo kamo tugotan ko kamo sa pagpadayon sa pagkabuhi sa duta nga akon ginhatag sa inyo mga katigulangan subong ila palanublion nga wala sing katapusan.

8“Tan-awa, nagasalig kamo sa mga pulong nga nagapalapaw.

9Nagapangawat kamo, nagapamatay, nagapanginbabayi kag nagapanginlalaki, nagasumpa sing butig, nagadulot sing mga halad kay Baal, kag nagasimba sa iban nga mga dios nga wala gani ninyo makilal-i.

10Ginahimo ninyo ang mga butang nga akon ginadumtan, kag dayon nagapalapit kamo kag nagatindog sa akon atubang, sa akon Templo, kag nagasiling, ‘Indi kami maano!’

11Nagahunahuna bala kamo nga ang akon Templo palanaguan sang mga makawat? Nakit-an ko ang inyo ginahimo.

12Kadto kamo sa Silo, ang nahauna nga lugar nga akon ginpili, sa diin didto ako simbahon, kag tan-awa kon ano ang ginhimo ko sa Silo tungod sang mga kalautan sang akon mga tawo nga Israelinhon.

13Nahimo ninyo ini tanan nga mga sala kag bisan pa nga ginliwatliwat ko ang paghambal sini sa inyo, wala kamo magpamati, kag wala kamo magsabat sang pagpanawag ko sa inyo.

14Gani, himuon ko sa sining akon Templo nga inyo ginasaligan ang akon ginhimo sa Silo. Himuon ko man sa sini nga lugar nga ginhatag ko sa inyo kag sa inyo mga katigulangan ang akon ginhimo sa Silo.

15Tabugon ko kamo sa akon panulok subong sang akon pagtabog sa inyo mga pariente nga mga tawo sang Israel. Ako, ang Ginoo, naghambal sini.”

16Ang Ginoo nagsiling, “Jeremias, indi ka magpangamuyo para sa sini nga mga tawo. Indi ka maghibi ukon magpangamuyo tungod sa ila. Indi ka magpakitluoy sa akon, kay indi ko ikaw pagpamatian.

17Wala mo bala makita ang ila ginahimo sa mga siudad sang Juda kag sa mga dalan sang Jerusalem?

18Ang mga kabataan nagatipon sang kahoy nga inuggatong, ang mga lalaki nagadabok sing kalayo, kag ang mga babayi nagamasa sing harina agod lutoon para sa diosa nga ila ginatawag ang Rayna sang Langit. Nagadulot man sila sing mga halad nga ilimnon sa iban nga mga dios, sa pagpilas sang akon balatyagon.

19Pero akon gid bala balatyagon ang ila ginapilas? Indi! Ginapilas nila ang ila kaugalingon, kag nagapakahuya sila sang ila kaugalingon.

20Gani, Ako, ang Ginoo nga Gamhanan, magaula sang akon nagasilabo nga kaakig sa sini nga Templo. Iula ko ini sa mga tawo kag amo man sa mga kasapatan, kag bisan pa sa mga kakahuyan kag sa mga katamnan. Ang akon kaakig manginkaangay sang kalayo nga wala sing may makapalong.

21“Mga tawo ko, maayo pa kaunon na lang ninyo ang mga halad nga inyo ginasunog sing bug-os sa ibabaw sang altar kag ang mga halad nga ginatugot sa inyo nga kaunon. Amo ini ang akon ginasiling, Ako, ang Ginoo sang mga hangaway, ang Dios sang Israel.

22Sang ginpagwa ko ang inyo mga katigulangan sa Ehipto, wala ako maghatag sa ila sing mga sugo nahanungod sa mga halad nga sinunog ukon sang iban pa nga sahi sang mga halad.

23Pero nagsugo ako sa ila nga ila ako tumanon, agod nga ako mangin-ila Dios kag sila mangin-akon mga tawo. Kag ginsingganan ko sila nga magkabuhi suno sa akon ginsugo sa ila, agod ang tanan manginmaayo para sa ila.

24Pero wala sila magtuman ukon magpamati sa akon, kundi ginhimo nila ang bisan ano nga ginsiling sang ila matig-a kag malaut nga mga tagipusoon, sa bagay nga naglain pa gid sila sa baylo nga magmaayo.

25Sugod sadto nga adlaw nga ang inyo mga katigulangan naggwa sa Ehipto tubtob karon gid nga adlaw, nagpadayon ako sa pagpadala sang akon mga alagad nga mga propeta sa inyo.

26Pero wala kamo magpamati ukon magsapak, sa baylo nagmatig-a pa gid ang inyo mga ulo, kag nagginawi kamo sing mas malaut pa sang sa inyo mga katigulangan.

27“Gani, Jeremias, magahambal ikaw sini tanan nga mga pulong sa akon mga tawo, pero indi sila magpamati sa imo. Magatawag ikaw sa ila, pero indi sila magsabat.

28Magasiling ikaw sa ila nga ang ila pungsod indi magtuman ukon magbaylo sang sila ginsilutan nakon, ang Ginoo nga ila Dios. Ang pagkamatutom wala na. Indi na gani sila maghambal nahanungod sini.”

29“Maglalaw kamo, mga tawo sang Jerusalem. Paguntingi ang inyo mga buhok kag ihaboy ini. Magtukar kamo sing masubo nga ambahanon sa ibabaw sang kabakuloran, tungod kay ako, ang Ginoo, naakig kag nagsikway sang akon mga tawo.

30“Ang mga tawo sang Juda naghimo sing malaut nga butang. Ginbutang nila ang ila mga diosdios nga akon ginadumtan sa akon Templo kag gindagtaan nila ini.

31Sa Kapatagan sang Hinom nagpatindog sila sing altar nga ginatawag Topet, agod sarang nila mahalad ang ila mga anak nga lalaki kag babayi sa kalayo. Wala ako magsugo sa ila sa paghimo sini kag wala ini gani nagsulod sa akon hunahuna.

32Gani, magaabot gid ang tion nga indi na ini pagtawgon nga Topet, ukon Kapatagan sang Hinom, kundi Kapatagan nga Palatyan. Magalubong sila sang mga tawo didto tungod kay wala sing iban nga lugar nga malubngan sila.

33Ang mga bangkay manginkalan-on sang mga pispis kag mga sapat nga talunon, kag wala sing bisan isa nga makatabog sa ila sa kahadlok.

34Ang duta mangin-isa ka desierto, kag pauntaton ko ang pagkinasadya kag pagkinalipay sa mga siudad sang Juda kag sa mga dalan sang Jerusalem, kag ang mga tingog sang mga nobyo kag mga nobya.

← Chapter 6 Jump to: Chapter 8 →