Jeremiah 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Ginpadala ni Haring Sedequias sang Juda si Pasur, anak ni Malquias, kag ang pari nga si Sofonias, anak ni Maasias, sa akon nga nagapangabay:

2“Kon mahimo pamangkuta ang Ginoo nahanungod sa aton, tungod kay si Haring Nabucodonosor sang Babilonia kag ang iya mga hangaway nagakibon sang siudad. Ayhan ang Ginoo magahimo sing isa sang iya mga milagro tungod sa aton, kag magapapalagyo kay Nabucodonosor.”

3Dayon ang Ginoo naghambal sa akon, kag ginsugiran ko ang mga tawo nga ginpadala sa akon

4sa pagsugid kay Sedequias nga ang Ginoo, ang Dios sang Israel, nagsiling, “Sedequias, lutoson ko ang imo mga hangaway nga nagapakig-away batok sa hari sang Babilonia kag sang iya mga hangaway. Tumpokon ko ang mga hinganiban sang imo mga soldado sa tunga sang siudad.

5Ako gid ang magapakig-away sa inyo sa bug-os ko nga kusog, sa akon kaakig, sa akon kaugot, kag sa akon pagbalingaso.

6Pamatyon ko ang tanan nga nagaestar sa sini nga siudad. Ang mga tawo kag ang mga kasapatan magakalamatay sa makakulogmat nga balatian.

7Pero ikaw imo, ang imo mga opisyales kag mga tawo nga wala mapatay sa inaway, sa gutom kag sa balatian, ipadakop ko kay Haring Nabucodonosor kag sa inyo mga kaaway nga luyag magpatay sa inyo. Si Nabucodonosor magapapatay sa inyo. Wala gid sing mabilin sa inyo. Indi sia magkaluoy ukon magkaawa sa bisan sin-o sa inyo. ako, ang Ginoo naghambal sini.”

8Dayon ginsugo ako sang Ginoo sa pagsiling sa mga tawo, “Pamati kamo! Ako, ang Ginoo, nagapapili sa inyo sa sining duha ka dalan: ang dalan nga nagapadulong sa kabuhi ukon ang dalan nga nagapadulong sa kamatayon.

9Ang nagapabilin sa siudad magakalamatay sa inaway, ukon sa gutom, ukon sa balatian. Pero ang magwa kag mag-ampo sa mga taga-Babilonia, nga nagasalakay karon sang siudad, indi mapatay kundi maluwas niya ang iya kabuhi.

10Nagpamat-od na ako nga indi ko pagluwason ini nga siudad, kundi laglagon ko ini. Itugyan ini sa hari sang Babilonia, kag iya ini sunogon. Ako, ang Ginoo, naghambal sini.”

11Ang Ginoo nagsugo sa akon sa paghatag sini nga mensahe sa harianon nga panimalay sang Juda, ang mga kaliwat ni Haring David: “Pamatii ang akon ginasiling, ako ang Ginoo. Paluntara ang katarungan adlaw-adlaw. Apini ang ginadayaan sang tawo nga nagapangdaya. Kon indi mo ini paghimuon, ang malaut nga mga butang nga inyo ginahimo magapasilabo sang akon kaakig subong sang kalayo nga indi mapalong.

13Ikaw, Jerusalem, nagatindog sa ibabaw sang mga kapatagan, kaangay sang isa ka igang nga nagalabaw sa kawayangan. Pero ako, magapakig-away batok sa imo. Nagasiling ikaw nga wala sing may makasarang sa pagsalakay sa imo kag sa pagguba sang imo mga pamakod.

14Pero ako, magasilot sa imo tungod sang imo ginhimo. Sunogon ko ang imo palasyo, kag ang kalayo magasunog sang tanan nga yara sa palibot sini. Ako, ang Ginoo, naghambal sini.”

← Chapter 20 Jump to: Chapter 22 →