Jeremiah 26

Ilonggo (Maayong Balita nga Biblia (2012))

← Chapter 25 Jump to: Chapter 27 →

1Sa pagsugod sang paggahom sang anak ni Josias nga si Joaquim subong hari sang Juda,

2ang Ginoo nagsiling sa akon, “Tindog ka sa pasiyuhan sang Templo kag ihambal ang tanan nga ginsugo ko sa imo sa mga tawo nga naggikan sa mga kabanwahanan sang Juda sa pagsimba didto. Indi pagkalimti ang bisan isa ka butang.

3Ayhan ang mga tawo magapamati kag magauntat sang ila malaut nga mga pagginawi. Kon mag-untat sila, dayon magabaylo ako sang akon hunahuna nahanungod sa kalaglagan nga akon ginplano nga ipadala sa ila tungod sang ila malaut nga mga binuhatan.”

4Ang Ginoo nagsugo sa akon sa pagsiling sa mga tawo, “Ako, ang Ginoo, nagsiling nga dapat ninyo ako tumanon paagi sa pagsunod sang mga gintudlo ko sa inyo,

5kag sa pagpamati sa mga pulong sang akon mga alagad, ang mga propeta, nga akon ginpadala sa inyo sing padayon. Wala gid ninyo gintuman ang ila ginsiling.

6Kon magpadayon kamo nga indi magtuman, dayon, himuon ko sa sini nga Templo ang ginhimo ko sa Silo, kag ang tanan nga mga kapungsoran sang kalibutan magagamit sang ngalan sini nga siudad subong isa ka pagpakamalaut.”

7Ang mga pari, ang mga propeta, kag ang tanan nga mga tawo nakabati sa akon nga nagahambal sini nga mga butang sa sulod sang Templo.

8Sa tapos gid lang ako makahambal sang tanan nga ginsugo sa akon sang Ginoo nga ihambal, gindakop nila ako kag nagsinggit sila, “Dapat ikaw patyon tungod sini!

9Ngaa nagsiling ka sa ngalan sang Ginoo nga ini nga Templo manginkaangay sang Silo, kag ini nga siudad pagalaglagon, kag wala sing bisan isa nga magaestar sini?” Dayon ginlibutan ako sang mga tawo.

10Sang pagkabati sang mga pangulo sang Juda sang nahanabo, nagdalidali sila kadto sa Templo halin sa palasyo, kag nagpungko sila sa salamputan sang Bag-o nga Pwerta sang Templo.

11Dayon ang mga pari kag mga propeta nagsiling sa mga pangulo kag sa mga tawo, “Ini nga tawo takos pamatbatan sang kamatayon, tungod kay naghambal sia batok sa aton siudad. Kamo gid nakabati sa iya.”

12Dayon nagsiling ako, “Ang Ginoo nagpadala sa akon sa paghambal sang tanan nga inyo nabatian nga akon ginsiling batok sini nga Templo kag sini nga siudad.

13Dapat ninyo bayluhan ang inyo pagginawi kag ang mga butang nga inyo ginahimo, kag tumanon ang ginasiling sang Ginoo nga inyo Dios. Kon himuon ninyo ini magabaylo sia sang iya hunahuna nahanungod sa kalaglagan nga iya ginsiling nga ipadala niya sa inyo.

14Kon nahanungod sa akon, yara ako sa inyo mga kamot! Himua ninyo sa akon ang bisan ano nga ginahunahuna ninyo nga nagakaigo kag matarong.

15Pero tandai ninyo ini: kon patyon ninyo ako, kamo kag ang mga tawo sa sini nga siudad may salabton sa pagpatay sang isa ka tawo nga wala sing sala, tungod kay ang Ginoo amo ang nagpadala sa akon sa pagsiling sini tanan nga mga paandam sa inyo.”

16Dayon ang mga pangulo kag ang mga tawo nagsiling sa mga pari kag sa mga propeta, “Ini nga tawo indi dapat pamatbatan sing kamatayon, kay naghambal sia sa aton sa ngalan sang Ginoo nga aton Dios.”

17Sa tapos sadto, may mga katigulangan nga nagtindog kag nagsiling sa mga tawo nga nagtipon didto,

18“Sang si Ezequias amo ang hari sang Juda, si Miqueas nga propeta sang Moreset nagsiling sa tanan nga mga tawo nga ang Ginoo sang mga hangaway nagsiling: ‘Ang Sion pagaaraduhon kaangay sang isa ka talamnan, ang Jerusalem mangin-isa ka tinumpukan sang ginub-an, kag ang bakulod sang Templo mangin-isa ka kagulangan.’

19Si Ezequias nga hari sang Juda kag ang iya mga tawo wala magpatay kay Miqueas. Sa baylo, si Ezequias nagpasidungog sa Ginoo kag nagtinguha sa pagpahamuot sa iya. Kag ang Ginoo nagbaylo sang iya panghunahuna nahanungod sang kalaglagan nga iya ginsiling nga iya ipadala sa ila. Karon nagadala kita sing isa ka daku nga kalalat-an sa aton kaugalingon.”

20May isa man ka tawo, si Urias, anak ni Semaya gikan sa Siudad sang Kiryat-jearim, nga naghambal sa ngalan sang Ginoo batok sini nga siudad kag pungsod subong sang ginhimo ni Jeremias.

21Sang pagkabati ni Haring Joaquim kag sang iya mga soldado kag sang iya mga opisyales sang ginsiling ni Urias, gintinguhaan sang hari ang pagpatay kay Urias. Pero nabatian ini ni Urias, gani hinadlukan sia kag nagpalagyo sa Ehipto.

22Pero ginpadala ni Haring Joaquim si Elnatan, anak ni Acbor, kag ang iban pa gid nga mga tawo sa Ehipto sa pagkuha kay Urias.

23Ginkuha nila si Urias gikan sa Ehipto kag gindala kay Haring Joaquim nga nagpapatay sa iya kag nagpahaboy sang iya bangkay sa lulobngan nga publiko.

24Pero tungod kay ginbuligan ako ni Ahikam, anak ni Safan, wala ako gintugyan sa mga tawo kag ginpatay.

← Chapter 25 Jump to: Chapter 27 →