Jeremiah 29

Ilonggo (Maayong Balita nga Biblia (2012))

← Chapter 28 Jump to: Chapter 30 →

1Nagsulat ako sa mga pari, sa mga propeta, sa mga pangulo sang mga tawo, kag sa tanan nga mga tawo nga gindala ni Nabucodonosor subong mga binilanggo halin sa Jerusalem pa Babilonia.

2Ginsulat ko ini sa tapos si Haring Joaquin, ang iya iloy, ang mga opisyales sang palasyo, ang mga pangulo sang Juda kag Jerusalem, ang mga panday kag mga panday sa salsalon gindala subong mga bihag.

3Ginpadala ni Haring Sedequias ang sulat paagi kay Elasa, anak ni Safan kag kay Gemarias, anak ni Helkias, sa kay Haring Nabucodonosor sang Babilonia. Nagsiling ini:

4“Ang Ginoo sang mga hangaway, ang Dios sang Israel, nagasiling sa tanan nga mga tawo nga iya gintugotan nga pagadalhon ni Nabucodonosor subong mga binilanggo halin sa Jerusalem pa Babilonia:

5‘Magpatindog kamo sing mga balay kag mag-estar didto. Magpananumtanom kamo kag magkaon sang inyo patubas.

6Magpangasawa ukon magpamana kamo kag magpamata. Dayon paasaw-i ang inyo mga anak, agod nga sila man may mga anak. Dapat kamo magmuad kag indi magbuhin.

7Magpangabudlay kamo para sa kaayuhan sang mga siudad sa diin ginpadala ko kamo subong mga binilanggo. Magpangamuyo kamo sa akon tungod sa sini nga mga siudad, tungod kay kon magmainuswagon ini, kamo man manginmainuswagon.

8Ako, ang Ginoo, ang Dios sang Israel, nagapaandam sa inyo nga indi kamo magpadaya sa mga propeta nga nagaestar upod sa inyo, ukon sa iban nga nagasiling nga mapakot nila ang palaabuton. Indi kamo magpati sa ila mga damgo.

9Magasugid sila sa inyo sing mga kabutigan sa akon ngalan. Wala ko sila ginpadala. Ako, ang Ginoo sang mga hangaway, naghambal sini.’

10“Ang Ginoo nagasiling, ‘Kon matapos ang setenta ka tuig para sa Babilonia, magapakita ako sang akon pagtatap sa inyo kag tumanon ko ang akon saad sa pagpabalik sa inyo duta.

11Ako lamang ang nakahibalo sang akon mga plano para sa inyo, mga plano sa pagpauswag sa inyo, kag indi sa paglaglag, mga plano nga magadala sa inyo sang palaabuton nga inyo ginalauman.

12Dayon magapanawag kamo sa akon. Magapalapit kamo kag magapangamuyo sa akon, kag ako magasabat sa inyo.

13Magapangita kamo sa akon, kag inyo ako makita, tungod kay magapangita kamo sa akon sa bug-os ninyo nga tagipusoon.

14Huo, nagasiling ako, inyo ako makita, kag pabalikon ko kamo sa inyo duta. Tipunon ko kamo gikan sa tagsa ka pungsod kag sa tagsa ka lugar sa diin ginpaalaplaag ko kamo, kag papaulion ko kamo sa duta sa diin ginpakuha ko kamo subong mga bihag. Ako, ang Ginoo, naghambal sini.’

15“Nagasiling kamo nga ang Ginoo naghatag sa inyo sing mga propeta sa Babilonia.

16Pamatii ninyo ang ginasiling sang Ginoo nahanungod sa hari nga nagagahom sa ginharian nga gingamhan ni David, kag nahanungod sa mga tawo sini nga siudad nga amo ang inyo mga pariente nga wala gindala subong mga binilanggo upod sa inyo.

17Ang Ginoo sang mga hangaway nagasiling, ‘Ginapadalhan ko sila sing inaway, gutom, kag balatian, kag himuon ko sila kaangay sang dunot nga higos nga tama na kalain kaunon.

18Hingabuton ko sila paagi sa inaway, gutom, kag balatian, kag ang tanan nga mga kapungsoran sang kalibutan magakahadlok sa ila makita. Sa bisan diin ginapaalaplaag ko sila, ang mga tawo maurongan kag makugmat sa natabo sa ila. Pagayagutaon sila sang mga tawo kag pagagamiton nila ang ila ngalan subong pagpakamalaut.

19Mahanabo ini sa ila tungod kay wala sila magtuman sang pulong nga akon ginpadala pirme sa ila paagi sa akon mga alagad nga mga propeta. Indi sila magpamati.

20Tanan kamo nga mga tawo nga ginpabihag ko sa hari sang Babilonia magpamati sa akon ginasiling, ako, ang Ginoo.’

21“Ang Ginoo sang mga hangaway, ang Dios sang Israel, naghambal nahanungod kay Acab nga anak ni Kolaya kag kay Sedequias, ang anak ni Maasias, nga nagasugid sa inyo sing mga kabutigan sa iya ngalan. Nagsiling sia nga itugyan niya sila sa gahom ni Haring Nabucodonosor sang Babilonia, nga magapamatay sa ila sa inyo gid atubang.

22Kon ang mga tawo nga gindala subong mga binilanggo halin sa Jerusalem pa Babilonia luyag magpakamalaut sa kay bisan sin-o, magasiling sila, ‘Kabay pa nga silutan ka sang Ginoo subong kay Sedequias kag kay Acab, nga ginlitson nga buhi sang hari sang Babilonia!’

23Mangin-amo ini ang ila kapalaran, tungod kay nakahimo sila sing dalagku nga mga sala, nagpanginbabayi sila kag nagpanginlalaki, kag nagsugid sila sing mga kabutigan sa ngalan sang Ginoo. Ini batok sa kabubot-on sang Ginoo. Nakahibalo sia sang ila nahimo, kag sia saksi batok sa ila. Ang Ginoo naghambal sini.”

24Ang Ginoo sang mga hangaway, ang Dios sang Israel, naghatag sa akon sang mensahe para kay Semaya sang Nehelam nga nagpadala sang sulat sa iya kaugalingon nga ngalan sa tanan nga mga tawo sang Jerusalem, kag sa pari nga si Sofonias, anak ni Maasias, kag sa tanan nga mga pari. Amo ini ang ginsiling ni Semaya sa sini nga sulat:

26Ang Ginoo naghimo sa imo nga pari nga tal-os ni Joiada, kag karon ikaw na ang pangulo nga opisyal sa Templo. Katungdanan mo ang pagtan-aw nga ang tagsa ka buangbuang nga nagapakapropeta ginakadenahan sang salsalon sa palibot sang iya liog.

27Ngaa wala mo ini paghimua kay Jeremias sang Anatot, nga naghambal subong isa ka propeta sa mga tawo?

28Dapat mo sia pauntaton tungod kay nagsiling sia sa mga tawo sa Babilonia nga pagabilangguon sila didto sa malawig nga panahon, kag dapat sila magpatindog sing mga balay, mag-estar didto, magpananumtanom, kag magkaon sang ila patubas.”

29Si Sofonias nagbasa sini nga sulat sa akon.

30Dayon ang Ginoo nagsugo sa akon

31sa pagpadala sini nga mensahe sa tanan nga mga binilanggo sa Babilonia, nahanungod kay Semaya: “Ako, ang Ginoo, magasilot kay Semaya kag sang tanan niya nga mga kaliwat. Wala ko sia ginpadala, pero naghambal sia sa inyo nga daw sa propeta sia, kag iya kamo ginpapati sa mga kabutigan. Wala sia sing mga kaliwat nga mabilin upod sa inyo. Indi na sia makaabot sa pagtan-aw sang maayo nga mga butang nga pagahimuon ko sa akon mga tawo, tungod kay ginsugo niya sila sa pagbato sa akon. Ako, ang Ginoo, naghambal sini.”

← Chapter 28 Jump to: Chapter 30 →