Jeremiah 25

Ilonggo (Maayong Balita nga Biblia (2012))

← Chapter 24 Jump to: Chapter 26 →

1Sa ikap-at nga tuig nga ang anak ni Josias nga si Joaquim amo ang hari sang Juda, nakabaton ako sing isa ka mensahe gikan sa Ginoo nahanungod sang tanan nga mga tawo sang Juda. (Amo ini ang nahauna nga tuig sang paghari ni Nabucodonosor sang Babilonia.)

2Nagsiling ako sa tanan nga mga tawo sang Juda kag sang Jerusalem,

3“Sa sulod sang baynte tres ka tuig, halin sa ika-13 nga tuig nga ang anak ni Amon nga si Josias amo ang hari sang Juda tubtob karon gid nga adlaw, ang Ginoo naghambal sa akon kag nagpadayon ako sa pagsugid sa inyo sang iya ginsiling. Pero wala kamo magpamati.

4Wala kamo magpamati ukon magtalupangod bisan pa nga ang Ginoo nagpadayon sa pagpadala sa inyo sang iya mga alagad nga mga propeta.

5Ginsingganan nila kamo nga bayaan na ninyo ang inyo malaut nga pagginawi kag ang malain nga mga butang nga inyo ginahimo, agod nga makaestar kamo sa duta nga ginhatag sang Ginoo sa inyo kag sa inyo mga katigulangan subong inyo kaugalingon nga palanublion sa walay katubtoban.

6Ginsingganan nila kamo nga indi kamo magsimba kag mag-alagad sa iban nga mga dios, kag indi ninyo pagpaakigon ang Ginoo paagi sa inyo pagsimba sa mga diosdios nga inyo nahimo. Kon gintuman ninyo ang Ginoo, kuntani wala niya kamo pagsiluti.

7Pero ang Ginoo gid nagasiling nga indi kamo magpamati sa iya. Sa baylo, ginpaakig ninyo sia paagi sa inyo mga diosdios, kag kamo gid nagdala sang iya silot sa inyo kaugalingon.

8“Gani, tungod kay wala kamo magpamati sa iya mga pulong, ang Ginoo sang mga hangaway nagasiling,

9‘Ipatawag ko ang tanan nga mga kapungsoran sang aminhan kag ang akon alagad nga si Haring Nabucodonosor sang Babilonia. Pagadalhon ko ini nga mga kapungsoran sa pag-away batok sa Juda kag sa mga pumoluyo sini, kag batok sa tanan nga mga kapungsoran sa palibot. Laglagon ko ini nga pungsod kag ang mga kaingod sini kag manginyara sila sa kalaglagan sa gihapon, isa ka butang nga makahaladlok kag makakulogmat tulokon. Ako, ang Ginoo, naghambal sini.

10Pahipuson ko ang ila pagsininggit sang pagkinalipay kag pagkinasadya, kag ang mga tingog sang nobyo kag nobya. Maubos ang lana sa ila mga suga kag wala na sing trigo.

11Ining bug-os nga duta malaglag kag manginmakakulogmat tan-awon, kag ang kaingod nga mga pungsod magaalagad sa hari sang Babilonia sa sulod sang setenta ka tuig.

12Sa tapos sini silutan ko ang Babilonia kag ang hari sini tungod sang ila sala. Laglagon ko ina nga pungsod kag ibilin ko ini nga nalaglag sa walay katapusan.

13Silutan ko ang Babilonia sang tanan nga kalalat-an nga akon ginsiling nga isilot sa mga kapungsoran sang paghambal ko kay Jeremias—ang tanan nga kalalat-an nga nasulat sa sini nga libro.

14Pabayaron ko ang mga taga-Babilonia sang ila ginpanghimo, kag ang madamo nga mga pungsod kag ang gamhanan nga mga hari magaulipon sa ila.’”

15Ang Ginoo, ang Dios sang Israel, nagsiling sa akon, “Yari ang isa ka kupa sang bino nga puno sang akon kaakig. Kuhaa ini kag paimna ang tanan nga mga kapungsoran sa diin ipadala ko ikaw.

16Kon mainom nila ini, magadulingduling sila kag magasalangisag tungod sang inaway nga ginapadala ko batok sa ila.”

17Gani ginkuha ko ang kupa gikan sa kamot sang Ginoo kag ginpainom ko ang tanan nga mga kapungsoran sa diin ginpadala ako sang Ginoo.

18Ang Jerusalem, kag ang tanan nga mga kabanwahanan sang Juda, lakip ang mga hari sini kag mga pangulo, ginpainom sa kupa, agod mangindesierto sila, isa ka butang nga makahaladlok kag makakulogmat tan-awon, kag agod nga ang mga tawo magapakamalaut sang ila ngalan—amo man gihapon ini tubtob karon nga mga inadlaw.

19Yari pa ang lista sang iban nga dapat mag-inom sa kupa: ang hari sang Ehipto, ang iya mga opisyales kag mga pangulo; ang tanan nga mga Ehiptohanon, kag ang tanan nga mga dumoluong sa Ehipto; ang tanan nga mga hari sa duta sang Uz; ang tanan nga mga hari sang Filistinhon nga mga siudad nga amo ang Askelon, Gaza, Ekron, kag ang nabilin sang Asdod; ang tanan nga mga tawo sang Edom, Moab, kag Amon; ang tanan nga mga hari sang Tiro kag Sidon; ang tanan nga mga hari sang kadutaan sang Mediteraneo; ang mga siudad sang Dedan, Tema, kag Buz; ang tanan nga mga tawo nga nagapagunting sing malip-ot sang ila mga buhok; ang tanan nga mga hari sang Arabia; ang tanan nga mga hari sang mga tribo sa desierto; ang tanan nga mga hari sang Zimri, Elam, kag Media; ang tanan nga mga hari sang aminhan, malayo kag malapit, nag-inom sila sing pasunod. Ang tanan nga pungsod sa duta dapat mag-inom sini. Sa katapusan, ang hari sang Babilonia magainom sini.

27Dayon ang Ginoo nagsiling sa akon, “Singgana ang mga tawo nga Ako, ang Ginoo sang mga hangaway, ang Dios sang Israel, nagasugo sa ila sa pag-inom tubtob nga mahubog sila kag magsuluka, tubtob magkalapukan sila kag indi na makabangon, tungod sang inaway nga akon ipadala batok sa ila.

28Kag kon indi sila magkuha sang kupa sa imo kamot kag mag-inom sini, dayon singgana sila nga ang Ginoo sang mga hangaway nagsiling nga dapat nila imnon ini.

29Sugoran ko ang akon paglaglag sa akon kaugalingon nga siudad. Nagahunahuna bala sila nga indi sila masilutan? Pagasilutan sila, kay magapadala ako sing inaway sa tanan nga mga tawo sang duta. Ako, ang Ginoo sang mga hangaway, naghambal sini.

30“Ikaw, Jeremias, dapat magpahibalo sang tanan nga akon ginsiling. Dapat singganan mo ini nga mga tawo: ‘Ang Ginoo magangurob gikan sa langit, kag magadaguob gikan sa kahitaasan. Magangurob sia batok sa iya mga tawo, magasinggit sia kaangay sang isa ka tawo nga nagalinas sang ubas, kag mabatian sia sang tanan nga yara sa duta.

31Ang tunog magalanog sa mga punta sang duta, kay ang Ginoo may panumbongon batok sa mga kapungsoran. Dalhon niya ang tanan nga mga tawo sa hukmanan, kag ipapatay niya ang mga malaut. Ang Ginoo naghambal sini.’”

32Ang Ginoo sang mga hangaway nagasiling nga ang kalaglagan magaabot sa isa ka pungsod pakadto sa isa ka pungsod, kag ang isa ka mabaskog nga bagyo nagapulon gikan sa malayo nga mga punta sang duta.

33Sa sadto nga adlaw ang mga bangkay sang mga ginpamatay sang Ginoo magalalapta halin sa isa ka punta sang duta tubtob sa isa ka punta. Wala gid sing may maglalaw sa ila. Ang ila mga bangkay indi pagkuhaon kag ilubong. Magahalal-id sila sa duta kaangay sang tinumpukan sang ipot.

34Maghibi kamo mga pangulo, kamo nga mga manugbantay sang akon mga tawo, maghibi kamo sing tudo! Maglalaw kamo kag magligid sa yab-ok. Ang tion sang pag-ihaw sa inyo nag-abot na, kag pagaihawon kamo kaangay sang mga karnero nga lalaki.

35Wala gid kamo sing may mapalagyuhan.

36Nagahibi kamo sa kalisod kag nagaugayong, tungod kay ang Ginoo naglaglag sang inyo pungsod sa iya kaakig kag nagbilin sang inyo malinong nga pungsod sa kalaglagan.

38Ginbayaan sang Ginoo ang iya mga tawo kaangay sang isa ka leon nga nagabiya sang iya lungib. Ang mga kakugmat sang inaway kag ang nagasilabo nga kaakig sang Ginoo naghimo sang pungsod nga isa ka desierto.

← Chapter 24 Jump to: Chapter 26 →