Jeremiah 50 — Ilonggo (Maayong Balita nga Biblia (2012))

1Amo ini ang ginsiling sang Ginoo sa akon nahanungod sa siudad sang Babilonia kag sang iya mga pumoluyo:

2“Isugid ang mga balita sa mga kapungsoran! Ipahibalo ini! Ibantala ang hayahay, kag ipahibalo ang balita! Indi ini pag-ilikom! Ang Babilonia napukan! Si Mardoc nga iya dios nawas-ag! Ang mga diosdios sang Babilonia nahuy-an, kag ang iya makaulogot nga mga estatwa nagkaladugmok!

3“Ang isa ka pungsod gikan sa aminhan nag-abot sa pagsalakay sang Babilonia, kag himuon ini nga isa ka desierto. Ang mga tawo kag kasapatan magapalagyo, kag wala sing may mag-estar didto.”

4Ang Ginoo nagasiling, “Kon mag-abot ina nga tion, ang mga tawo sang Israel kag Juda magabalik nga nagahinibi, kag magapangita sa akon nga ila Dios.

5Magapamangkot sila sang dalan pa Sion kag dayon magalakat sila padulong sa sina nga dalan. Magahimo sila sing kasugtanan nga wala sing katapusan upod sa akon kag indi na gid nila ini paglapason.

6“Ang akon mga tawo kaangay sang mga karnero nga ginpatalang sang ila mga manugbantay sa kabukiran. Nagtalangtalang sila kag indi na sila makatultol kon diin ang ila balay.

7Ginsalakay sila sang tanan nga nakakita sa ila. Ang ila mga kaaway nagasiling, ‘Nagpakasala sila batok sa Ginoo, gani ang aton ginhimo indi sayop. Ang ila mga katigulangan nagsalig sa Ginoo, kag dapat sila kuntani magpabilin nga mga matutom sa iya.’

8“Mga tawo sang Israel, palagyo kamo gikan sa Babilonia! Bayai ninyo ina nga pungsod! Mag-una kamo sa paghalin kaangay sang toro nga kanding nga nagapanguna sa panong.

9Pahublagon ko ang isa ka guban sang makusog nga mga kapungsoran sa aminhan, kag pasalakayon ko sila sa Babilonia. Magalinya sila sa pag-away batok sa pungsod kag ila ini agawon. Matanda sila nga mga manugpana nga nagaigo gid sang ila ginapana.

10Ang Babilonia pagakuhaan sang malahalon nga mga pagkabutang kag ang mga nagakuha sini magakuha sang tanan nga ila naluyagan. Ako, ang Ginoo, naghambal sini.”

11Ang Ginoo nagasiling, “Mga tawo sang Babilonia, ginkuhaan ninyo sang mga pagkabutang ang akon pungsod. Malipayon kamo kag masinadyahon nga nagalibutlibot kaangay sang isa ka baka nga nagalinas sang uyas ukon kaangay sang nagahirihiri nga kabayo,

12pero ang inyo daku nga siudad magakahuya kag mahuy-an. Ang Babilonia mangin-isa ka pinakakubos nga pungsod sa tanan nga mga kapungsoran. Mangindesierto ini nga mamala nga wala sing tubig.

13Tungod sang akon kaakig, wala gid sing may mag-estar sa Babilonia. Malaglag gid ini. Ang tanan nga nagaagi maurongan kag matingala sang natabo sa iya.

14“Mga manugpana, linya kamo sa pagsalakay sang Babilonia kag libuti ini. Ipana ang tanan ninyo nga mga baslay sa Babilonia, tungod kay nagpakasala ini batok sa akon nga Ginoo.

15Isinggit ang panawag sa inaway sa palibot sang siudad! Karon ang Babilonia nag-ampo. Ang iya mga pader nalusod kag naguba. Ako magatimalos sa mga taga-Babilonia. Gani timalusi sila, kag himua sa ila ang ila ginhimo sa iban.

16Indi pag-ipapanggas ang mga binhi sa sina nga pungsod, ukon paaniha ang mga tawo sang patubas. Ang tagsa ka dumoluong nga nagaestar didto magakahadlok sa hangaway nga nagasalakay kag magapauli sila.

17Ang Ginoo nagasiling, “Ang mga tawo sang Israel kaangay sang mga karnero nga ginlagas kag ginpaalaplaag sang mga leon. Ginsalakay sila anay sang hari sang Asiria, kag dayon si Haring Nabucodonosor sang Babilonia nagkitkit sang ila mga tul-an.

18Tungod sini, ako, ang Ginoo sang mga hangaway, ang Dios sang Israel, magasilot kay Haring Nabucodonosor kag sang iya pungsod, subong nga ginsilutan ko ang hari sang Asiria.

19Pabalikon ko ang mga tawo sang Israel sa ila duta. Magakaon sila sang kalan-on nga nagatubo sa Bukid sang Carmel kag sa kadutaan sang Basan, kag magakaon sila sang tanan nga naluyagan nila nga mga butang nga nagatubo sa kadutaan sang Efraim kag Galaad.

20Kon mag-abot ina nga tion, wala sing sala nga makita sa Israel, kag wala sing kalautan sa Juda, tungod kay patawaron ko ang mga tawo nga akon gintugotan nga mabuhi. Ako, ang Ginoo, naghambal sini.”

21Ang Ginoo nagasiling, “Salakaya ang mga tawo sang Merataim kag Pekod. Pamatya kag laglaga sila. Himua ang tanan nga ginasugo ko sa imo. Ako, ang Ginoo, naghambal sini.

22Ang kagahod sang inaway mabatian sa duta kag may daku nga kalaglagan.

23Ang Babilonia nagmaso kag nagdugmok sang bug-os nga duta, kag karon ina nga maso nagkalabali! Ang tanan nga mga kapungsoran ginkugmat sa natabo sa sina nga pungsod.

24O Babilonia, nasiod ikaw sing siod nga akon ginbutang sa imo, bisan nga wala ikaw makahibalo sini kay nagpakig-away ka batok sa akon.

25Ginbuksan ko ang lugar sa diin ginatago ko ang akon mga hinganiban, kag sa akon kaakig ginpagwa ko ini, tungod kay ako, ang Ginoong Dios sang mga hangaway, may bulohaton nga dapat himuon sa Babilonia.

26Salakaya ini gikan sa tanan nga mga lugar kag buksi ang lugar sa diin ginatago ang iya mga trigo! Tumpoka ang inagaw kaangay sang mga tinumpok nga trigo! Laglaga ang pungsod! Indi gid ini pagbilini sang bisan ano!

27Pamatya ang tanan nila nga mga soldado! Pamatya sila! Ang mga tawo sang Babilonia pagalaglagon! Ang tion sang pagsilot sa ila nag-abot na!’”

28Ang mga nakapalagyo sa Babilonia nagkadto sa Jerusalem, kag nagsugid kon daw ano ang pagtimalos sang Ginoo nga aton Dios sa ginhimo sang mga taga-Babilonia sa iya Templo.

29“Singgana ang mga manugpana sa pagsalakay sang Babilonia. Ipadala ang tanan nga nakahibalo maggamit sang pana kag baslay. Libuti ang siudad agod wala sing may makapalagyo bisan isa. Pabayra sia sang tanan nga iya nahimo, kag himua sa iya ang iya ginhimo sa iban, tungod kay nagpabugal sia batok sa akon, ang balaan nga Dios sang Israel.

30Gani ang iya mga pamatan-on nga lalaki pagapatyon sa mga dalan sang siudad, kag ang tanan niya nga mga soldado pagalaglagon sa sadto nga adlaw. Ako, ang Ginoo, naghambal sini.

31“O Babilonia, puno ikaw sang pagpabugal, gani ako, ang Ginoong Dios sang mga hangaway, batok sa imo! Ang akon tion nag-abot sa pagsilot sa imo.

32Ang imo bugalon nga pungsod magakasandad kag magakapukan, kag wala gid sing may magpatindog sa imo. Sunogon ko ang imo mga siudad, kag ang tanan nga yara sa palibot pagalaglagon.”

33Ang Ginoo sang mga hangaway nagasiling, “Ang mga tawo sang Israel kag Juda ginapigos. Ang mga nagdakop sa ila nagabantay gid sa ila sing maayo, kag indi magtugot nga buy-an sila.

34Pero ang isa nga magaluwas sa ila makusog, ang iya ngalan amo ang Ginoo sang mga hangaway. Sia gid amo ang magaapin sang ila kawsa, kag magadala sing paghidait sa kalibutan, pero magadala sing kagamo sa mga tawo sang Babilonia.”

35Ang Ginoo nagasiling, “Patyon ang Babilonia! Pamatyon ang iya mga tawo, ang iya mga pangulo, kag mga mangin-alamon.

36Pamatyon ang iya butigon nga mga propeta, daw ano kabuang sa ila! Pamatyon ang iya mga soldado, daw ano ang ila kahadlok!

37Laglagon ang iya mga kabayo kag mga karwahi sa inaway! Pamatyon ang mga soldado nga ginasuholan, daw ano kaluya sa ila! Laglagon ang iya mga manggad, panguhaon ang iya mga pagkabutang.

38Padalhi sing tingadlaw ang iya duta, kag pamalha ang iya mga suba, ang Babilonia isa ka duta sang makahaladlok nga mga diosdios, nga naghimo sa mga tawo nga buangbuang.

39“Gani, ang Babilonia pagaestaran sang mga demonyo kag malaut nga mga espiritu, kag sang mahigko nga mga pispis. Indi na gid liwat mag-estar didto ang mga tawo, indi na gid tubtob sa palaabuton nga panahon.

40Ang matabo sa Babilonia amo man ang natabo sa Sodoma kag Gomorra, sang ginlaglag ko sila kag ang palibot nga mga kabanwahanan. Wala na gid sing may mag-estar didto liwat, Ako, ang Ginoo, naghambal sini.

41“Ang mga tawo nagaabot gikan sa isa ka pungsod sa aminhan, ang isa ka gamhanan nga pungsod gikan sa malayo, kag madamo nga mga hari ang nagahanda sa inaway.

42Ginkuha nila ang ila mga pana kag mga espada, mga mapintas sila kag wala sing kaluoy. Ang ila ginahod kaangay sang nagadaguhob nga dagat, samtang nagasakay sila sa ila mga kabayo. Handa sila sa pag-away batok sa Babilonia.

43Ang hari sang Babilonia nakabati sang balita, kag naghuyhoy ang iya abaga. Gindakop sia sang kakugmat, sang kasakit kaangay sang manugbata nga ginasakitan.

44“Ako, ang Ginoo, magaabot kaangay sang isa ka leon nga nagapakadto sa madabong nga halalban gikan sa madamol nga kakahuyan sa higad sang Jordan, kag papalagyuhon ko sa gilayon ang mga taga-Babilonia gikan sa ila siudad. Dayon ang pangulo nga akon ginpili magagahom sang pungsod. Sin-o bala ang sarang mapaanggid sa akon? Sin-o bala ang mangahas sa pagbato sa akon? Ano bala nga pangulo ang makasumpong sa akon?

45Gani pamatii ang plano nga akon ginhimo batok sa siudad sang Babilonia, kag ang luyag ko himuon sa iya mga tawo. Bisan ang ila mga kabataan pagaguyoron pa gwa, kag ang tanan magakakugmat.

46Kon mapukan ang Babilonia, ang iya sini kagahod magatay-og sang bug-os nga duta, kag ang mga paghinibi tungod sang kahadlok mabatian sang iban nga mga kapungsoran.”