Jeremiah 39

Ilonggo (Maayong Balita nga Biblia (2012))

← Chapter 38 Jump to: Chapter 40 →

1Sa ika-10 nga bulan sang ikasiyam nga tuig nga si Sedequias amo ang hari sang Juda, si Haring Nabucodonosor sang Babilonia nag-abot upod sa iya bug-os nga hangaway, kag ginsalakay ang Jerusalem.

2Sa ikasiyam nga adlaw sang ikap-at nga bulan sang ika-11 ka tuig ni Sedequias subong hari, nabulwang ang mga pader sang siudad.

3Sang maagaw ang Jerusalem, ang tanan nga mataas nga mga opisyales sang hari sang Babilonia nag-abot kag nagpungko sa Tunga nga Pwerta, lakip si Nergal-sareser, Si Samgar-nebo, si Sarsequim kag ang isa pa ka Nergal-sareser.

4Sang makita ni Haring Sedequias kag sang tanan niya nga mga soldado ang nagakahanabo, nagtinguha sila sa pagpalagyo gikan sa siudad sina nga gab-i. Nag-agi sila sa hardin sang hari, pakadto sa pwertahan nga nagaangot sang duha ka pader, kag nagpalagyo sila pakadto sa Kapatagan sang Jordan.

5Pero ang mga hangaway sang Babilonia naglagas sa ila, kag nadakop nila si Sedequias sa mga kawayangan malapit sa Jerico. Dayon gindala nila sia kay Haring Nabucodonosor nga yadto didto sa siudad sang Ribla sa kadutaan sang Hamat, kag didto ginsentensyahan sia ni Nabucodonosor.

6Didto sa Ribla ginpapatay sang hari sang Babilonia ang mga anak nga lalaki ni Sedequias, samtang nagatan-aw sia. Ginpapatay man sang hari ang tanan nga mga opisyales sang Juda.

7Pagkatapos sini ginpalukat niya ang mga mata ni Sedequias kag ginpakadenahan sia agod dalhon sa Babilonia.

8Sa pihak nga bahin, ginsunog sang mga taga-Babilonia ang palasyo sang hari kag ang mga balay sang mga tawo, kag ila ginpukan ang mga pader sang Jerusalem.

9Sa katapusan, ang pangulo nga opisyal nga si Nebusaradan, nagdala sa Babilonia subong mga binilanggo sang tanan nga mga tawo nga nabilin sa siudad, lakip ang mga nagbuylog sa iya.

10Ginbilin niya sa duta sang Juda ang imol gid nga mga tawo nga wala sing pagkabutang, kag ginhatagan sila sing mga talamnan sang ubas kag mga kaumhan.

11Pero si Haring Nabucodonosor nagsugo kay Nebusaradan, ang pangulo nga opisyal, sa pagtuman sining masunod nga mga mando:

12“Lakat ka kag pangitaa si Jeremias kag tatapa sia sing maayo. Indi sia pag-anha, kundi himua sa iya ang bisan ano nga iya naluyagan.”

13Gani si Nebusaradan, upod kanday Nebusaban kag Nergal-sareser, mataas nga mga opisyales, kag upod sa iban nga mga opisyales sang hari sang Babilonia,

14nagpakuha sa akon halin sa pasiyuhan sang palasyo. Ginbutang nila ako sa idalom sang pag-atipan ni Gedalias, anak ni Ahikam kag apo ni Safan, nga amo ang gintugyanan sa pagbantay nga makapauli ako nga indi maano. Gani, nagpabilin ako didto upod sa mga tawo.

15Samtang nabilanggo pa ako sa pasiyuhan sang palasyo ginsugo ako sang Ginoo

16sa pagsiling kay Ebedmelec nga Etiopiahanon nga ang Ginoo sang mga hangaway, ang Dios sang Israel, nagsiling, “Padalhan ko sing kalaglagan ini nga siudad kag indi sang kauswagan, suno sa akon ginsiling. Kag kon mahanabo ini, didto ikaw sa pagtan-aw sini.

17Pero ako, ang Ginoo, magaapin sa imo, kag indi ikaw pag-itugyan sa mga tawo nga imo ginakahadlukan.

18Luwason ko ikaw, kag indi ka mapatay. Maluwas ikaw, tungod kay nagsalig ka sa akon. Ako, ang Ginoo, naghambal sini.”

← Chapter 38 Jump to: Chapter 40 →