Jeremiah 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Ang Ginoo nagasiling, “Kon ang isa ka tawo magabulag sang iya asawa, kag ang iya asawa magabiya sa iya, kag mangin-asawa naman sang isa ka tawo, indi na niya mabawi ang iya asawa. Ini magadagta sang bug-os nga duta. Pero, Israel, kadamo sang imo mga kahagugma, kag karon luyag pa ikaw magbalik sa akon!

2Tuloka ang ibabaw sang mga kabakuloran. May lugar pa bala didto nga wala ka magginawi subong sang isa ka malain nga babayi? Naghulat ka sang imo mga kahagugma sa higad sang dalan, subong sang isa ka Arabo nga nagahulat sang iya biktimahon sa desierto. Gindagtaan mo ang duta paagi sa pagbaligya sang imo kaugalingon.

3Tungod sini ginpunggan ang ulan, kag ang una nga ulan wala magtupa. Ang imo gani hitsura kaangay sang isa ka malain nga babayi. Wala ka gid sing huya.

4“Kag karon nagasiling ka sa akon, ‘Amay ko ikaw, kag ginhigugma mo ako halin sang bata pa ako.

5Indi ka pirme magkaakig. Indi ka man magkaakig sa akon sa walay katapusan.’ O Israel, amo ini ang imo ginsiling, pero ginhimo mo ang tanan nga malaut nga imo sarang mahimo.”

6Sang si Josias amo ang hari, ang Ginoo nagsiling sa akon, “Nakita mo bala ang ginhimo sang Israel, inang maluibon nga babayi? Nagbiya sia sa akon kag sa tagsa ka mataas nga bakulod, kag sa idalom sang tagsa ka madabong nga kahoy ginbaligya niya ang iya kaugalingon.

7Naghunahuna ako nga sa tapos niya mahimo ini tanan, pat-od gid nga magabalik sia sa akon. Pero wala sia magbalik, kag nakita man ini tanan sang iya maluibon nga utod nga babayi nga si Juda.

8Nakita man ni Juda nga ginbulagan ko si Israel, kag ginbayaan ko sia tungod kay ginbayaan niya ako kag nanginmalain sia nga babayi. Pero si Juda, ang maluibon nga utod nga babayi ni Israel, wala magkahadlok. Sia man nanginmalain nga babayi,

9kag wala gid sia magkahuya. Gindagtaan niya ang duta, kag nagpanginlalaki sia paagi sa pagsimba sa mga bato kag mga kahoy.

10Kag sa tapos sini tanan, si Juda, ang maluibon nga utod nga babayi ni Israel nagpakunokuno sa pagbalik sa akon, pero wala sia magbalik sa akon sa bug-os niya nga tagipusoon. Ako, ang Ginoo, naghambal sini.”

11Dayon ang Ginoo nagsiling sa akon nga bisan ang Israel nagbiya sa iya, mas maayo pa sia sang sa iya utod nga babayi nga maluibon nga si Juda.

12Ginsugo niya ako sa pagkadto kag sa pagsiling kay Israel, “Balik ka sa akon, O maluibon nga Israel. Maluloy-on ako, kag indi ako magkaakig, indi ako mangakig sa imo sa walay katapusan.

13Kilalaha lang nga ikaw nakasala, kag nagbato ikaw sa Ginoo nga imo Dios. Akua nga sa idalom sang tagsa ka madabong nga kahoy ginhatag mo ang imo gugma sa iban nga mga dios, kag wala mo gintuman ang akon mga sugo. Ako, ang Ginoo, naghambal sini.

14“Balik kamo, O maluibon nga mga tawo. Ako ang inyo agalon. Magakuha ako sing isa sa inyo gikan sa tagsa ka banwa kag duha gikan sa tagsa ka panimalay, kag pabalikon ko kamo sa Bukid sang Sion.

15Hatagan ko kamo sing mga pangulo nga nagatuman sa akon, kag magagahom sila sa inyo nga may kaalam kag ihibalo.

16Dayon kon magdamo na kamo sa sadto nga duta, ang mga tawo indi na maghambal nahanungod sang akon Kaban sang Kasugtanan. Indi na sila maghunahuna nahanungod sini ukon magdumdom pa sini. Wala na sila sing kinahanglan sini, ukon maghimo pa sing isa sini.

17Kon mag-abot yadto nga tion, ang Jerusalem pagatawgon nga ‘Trono sang Ginoo,’ kag ang tanan nga mga kapungsoran magatipon didto sing tingob sa pagsimba sa akon. Indi na sila maghimo suno sa ginasiling sang ila matig-a kag malaut nga mga tagipusoon.

18Si Israel magabuylog kay Juda, kag sila nga duha magabalik gikan sa pagkabihag sa pungsod sa aminhan, pakadto sa duta nga ginhatag ko sa inyo mga katigulangan subong ila palanublion nga dayon.”

19Ang Ginoo nagasiling, “O Israel, luyag ko nga batunon ikaw subong akon anak isa ka maayo nga duta, ang labing matahom nga duta sa bug-os nga kalibutan. Luyag ko nga pagatawgon mo ako nga amay, kag indi ka na gid magbiya sa akon.

20Pero subong sang isa ka asawa nga maluibon, nagluib ikaw sa akon, Ako, ang Ginoo, naghambal sini.”

21Ang gahod mabatian sa ibabaw sang mga kabakuloran: mga tawo ini sang Israel nga nagahinibi kag nagapakitluoy, tungod kay nagpakasala sila kag nalimtan nila ang Ginoo nga ila Dios.

22Balik kamo, tanan nga nagbiya sa Ginoo, ayuhon niya kamo, kag himuon nga mga matutom. Nagasiling kamo, “Huo, mabalik kami sa Ginoo, tungod kay sia amo ang amon Dios.

23Wala makabulig sa amon ang amon mga pagsimba sa mga diosdios sa mga kabakuloran. Ang bulig sa Israel nagagikan lamang sa Ginoo nga aton Dios.

24Pero ang pagsimba kay Baal, ang dios sang kahuloy-an, nanginkabangdanan sang pagkadula sang amon tanan nga mga panong kag kasapatan, mga anak nga lalaki kag babayi kag ang tanan nga ginpangabudlayan sang amon mga katigulangan halin sang una.

25Dapat kami maghigda sa kahuya kag ang amon kahuloy-an magtabon sa amon. Kami kag ang amon mga katigulangan nagpakasala sing dalayon batok sa Ginoo nga amon Dios, wala namon gintuman ang iya mga sugo.”

← Chapter 2 Jump to: Chapter 4 →