Jeremiah 37

Ilonggo (Maayong Balita nga Biblia (2012))

← Chapter 36 Jump to: Chapter 38 →

1Ginhimo nga hari ni Haring Nabucodonosor sang Babilonia si Sedequias nga anak ni Josias sa duta sang Juda sa pagtal-os kay Jeconias nga anak ni Joaquim.

2Pero si Sedequias, ang iya mga opisyales, kag ang mga tawo, wala magtuman sang mga pulong nga ginhatag sang Ginoo sa akon.

3Ginpadala ni Haring Sedequias si Jehukal nga anak ni Selemias kag ang pari nga si Sofonias nga anak ni Maasias, sa pagpangabay sa akon sa pagpangamuyo sa Ginoo nga aton Dios para sa aton pungsod.

4Wala pa ako sadto mabilanggo kay hilway pa ako sa pagpakighiupod sa mga tawo.

5Ang mga hangaway sang Babilonia nagakibon sang Jerusalem pero sang mabatian nila nga ang mga hangaway sang Ehipto nakagwa sa dulonan sang Ehipto, nagpalagyo sila.

6Dayon ang Ginoo, ang Dios sang Israel, nagsiling sa akon,

7sa paghambal kay Sedequias, “Ang mga hangaway sang Ehipto nagapadulong sa pagbulig sa imo pero magabalik sila pauli.

8Dayon ang mga taga-Babilonia magabalik diri. Salakayon nila ang siudad, agawon ini, kag sunogon.

9Ako, ang Ginoo, nagapaandam sa inyo nga indi ninyo pagdayaan ang inyo mga kaugalingon sa paghunahuna nga ang mga taga-Babilonia indi magbalik, tungod kay magabalik gid sila.

10Bisan pa malutos ninyo ang bug-os nga hangaway sang Babilonia nga nagasalakay sa inyo, sa bagay nga ang nabilin lamang nga mga tawo amo ang mga napilasan nga yara nagahigda sa ila mga tolda, ini nga mga tawo magabangon pa kag magasunog sini nga siudad.”

11Nagpalalagyo ang mga hangaway sang Babilonia halin sa Jerusalem tungod kay ang mga hangaway sang Ehipto nagapadulong.

12Gani naglakat ako halin sa Jerusalem pakadto sa kadutaan ni Benjamin sa pagkuha sang akon bahin sang pagkabutang sang akon panimalay.

13Pero sang pag-abot ko sa Pwerta ni Benjamin, ang opisyal sang mga soldado nga nagabantay didto, isa ka tawo nga ginahingalanan kay Irias, anak ni Selemias kag apo ni Hananias, nagpadulog sa akon kag nagsiling, “Ikaw nagabuylog sa mga taga-Babilonia!”

14Nagsabat ako, “Indi ina matuod! Indi ako magbuylog sa ila.” Pero si Irias indi magpati sa akon. Sa baylo, gindakop niya ako kag gindala sa mga opisyales.

15Naakig gid sila sa akon kag ila ako ginpabunal kag ginbilanggo sa balay ni Jonatan ang sekretaryo sang korte, nga ang iya balay ginhimo nga isa ka bilangguan.

16Ginsulod ako sa bilangguan nga yara sa idalom sang duta kag ginbukot ako didto sa malawig nga panahon.

17Sang ulihi ginpatawag ako ni Haring Sedequias, kag didto sa palasyo ginpamangkot niya ako sa tago lamang, “May mensahe bala halin sa Ginoo?” Nagsabat ako, “May yara, kag pagaitugyan ikaw sa hari sang Babilonia.”

18Dayon nagpamangkot ako, “Ano bala nga sala ang akon nahimo batok sa imo, ukon sa imo mga opisyales, ukon sa sini nga mga tawo nga ginpabilanggo nimo ako?

19Ano ang natabo sa inyo mga propeta nga nagsiling sa inyo nga ang hari sang Babilonia indi magsalakay sa inyo kag sa sini nga pungsod?

20Kag karon, Mahal nga Hari, nagapakitluoy ako nga pamatian mo ako kag himuon mo ang akon ginapangayo. Kon mahimo indi ako pagpabalika sa bilangguan sa balay ni Jonatan. Kon himuon mo ina, pat-od gid nga mapatay ako didto.”

21Gani si Haring Sedequias nagsugo nga bilangguon ako didto sa pasiyuhan sang palasyo. Nagtener ako didto, kag kada adlaw ginahatagan ako sang isa ka bilog nga tinapay gikan sa mga panaderya tubtob nga naubos ang tanan nga tinapay sa siudad.

← Chapter 36 Jump to: Chapter 38 →