Jeremiah 41

Ilonggo (Maayong Balita nga Biblia (2012))

← Chapter 40 Jump to: Chapter 42 →

1Sa ikapito nga bulan sang amo nga tuig, si Ismael, anak ni Netanias kag apo ni Elisama, isa ka katapo sang panimalay sang hari kag isa sang mga pangulo sang mga opisyales, nag-abot sa Mispa upod ang napulo ka mga tawo sa pagpakigkita kay Gedalias nga gobernador. Samtang didto sila sa Mispa nga nagakaon sing tingob,

2si Ismael kag ang napulo ka mga tawo naggabot sang ila mga espada kag ginpatay si Gedalias.

3Ginpamatay man ni Ismael ang tanan nga mga Israelinhon nga didto sa Mispa upod kay Gedalias, kag ang mga soldado nga taga-Babilonia nga natabuan nga yadto didto.

4Sang madason nga adlaw, sa wala pa mahibaloi sang bisan sin-o ang pagpatay kay Gedalias,

5nag-abot ang otsenta ka mga tawo halin sa Siquem, sa Silo, kag sa Samaria. Ginbarbasan nila ang ila mga bungot, gingisi ang ila mga bayu, kag ginpilas ang ila kaugalingon. Nagadala sila sing trigo kag insyenso agod ihalad sa Templo.

6Gani si Ismael naggwa halin sa Mispa sa pagsugata sa ila nga nagahibi samtang nagalakat sia. Sang pag-abot niya sa ila, nagsiling sia, “Kon mahimo sulod anay kamo sa pagpakigkita kay Gedalias.”

7Sang pagsulod na nila sa siudad, ginpamatay sila ni Ismael kag sang iya mga tinawo kag ang ila mga bangkay ginhaboy sa isa ka bubon.

8Pero may napulo ka mga tawo sa sadto nga grupo nga nagsiling kay Ismael, “Kon mahimo indi kami pagpatya! May trigo kami, sebada, lana sang olivo, kag dugos nga natago sa kaumhan.” Gani wala niya sila pagpatya.

9Ang bubon sa diin ginpanghaboy ni Ismael ang mga bangkay sang mga tawo nga iya ginpapatay isa ka daku nga bubon. Amo ini ang bubon nga ginpakutkot ni Haring Asa subong depensa batok kay Haring Baasa sang Israel. Ginpuno ni Ismael ang bubon sing mga bangkay.

10Dayon ginbihag ni Ismael ang tanan nga yara sa Mispa—mga anak nga babayi sang hari kag ang nabilin nga mga tawo nga gintugyan ni Nebusaradan, ang pangulo nga opisyal, sa idalom sang pagtatap ni Gedalias. Gindala sila ni Ismael subong mga binilanggo kag naglakat sila padulong sa kadutaan sang Amon.

11Si Johanan, kag ang tanan nga mga pangulo sang hangaway upod sa iya nakabati sang pagpamatay nga ginhimo ni Ismael.

12Gani ginlagas nila sia upod sa ila mga tinawo kag nalambot nila sia malapit sa daku nga punong sa Gabaon.

13Sang pagkakita sang mga binilanggo ni Ismael kay Johanan kag sa mga pangulo sang mga hangaway upod sa iya, nalipay sila.

14Gani ang mga binilanggo nagbalalik kag nagdalagan pakadto kay Johanan.

15Pero si Ismael kag ang walo niya ka mga tinawo nakapalagyo kay Johanan kag nagkadto sila sa duta sang Amon.

16Dayon gintatap ni Johanan kag sang mga pangulo sang mga hangaway—ang mga soldado, ang mga babayi, ang mga kabataan kag ang mga kapon nga gindala ni Ismael subong mga binilanggo halin sa Mispa sa tapos niya mapatay si Gedalias.

17Hinadlukan sila sa mga taga-Babilonia tungod kay ginpatay ni Ismael si Gedalias nga ginhimo sang hari sang Babilonia nga gobernador sang duta. Gani nagpadulong sila sa Ehipto sa pagpalagyo sa mga taga-Babilonia. Sa dalanon nagdulog sila sa Kimham malapit sa Betlehem.

← Chapter 40 Jump to: Chapter 42 →