Jeremiah 43

Ilonggo (Maayong Balita nga Biblia (2012))

← Chapter 42 Jump to: Chapter 44 →

1Natapos ko na ang pagsugid sa mga tawo sang tanan nga ginsugo sa akon sang Ginoo nga ila Dios nga amo ang nagpadala sa akon sa pagsugid sa ila.

2Dayon si Azarias, anak ni Hosaya, kag si Johanan, anak ni Karea, kag ang tanan nga bugalon nga mga tawo nagsiling sa akon, “Nagabutig ikaw. Ang Ginoo nga aton Dios wala magpadala sa imo sa pagsugid sa amon nga indi kami magkadto sa pag-estar sa Ehipto.

3Pero si Baruc, anak ni Nerias, nagsudyot sa imo batok sa amon agod gamhan kami sang mga taga-Babilonia, sa bagay nga mapatay nila kami ukon mabihag pa Babilonia.”

4Gani bisan si Johanan, ukon ang bisan sin-o sang mga opisyales sang hangaway, ukon ang bisan sin-o nga tawo indi magtuman sang sugo sang Ginoo nga magpabilin sa duta sang Juda.

5Dayon gindala ni Johanan kag sang tanan nga mga opisyales sang hangaway ang tanan nga nabilin sa Juda pa Ehipto, lakip ang tanan nga mga tawo nga nagbalik halin sa mga kapungsoran sa diin nag-alaplaag sila:

6ang mga lalaki, ang mga babayi, ang mga kabataan, kag ang mga anak nga babayi sang hari. Gindala nila ang tanan nga mga tawo nga gintugyan ni Nebusaradan, ang pangulo nga opisyal, sa idalom sang pagtatap ni Gedalias, lakip si Baruc kag ako.

7Wala nila gintuman ang sugo sang Ginoo kag nagkadto sila sa Ehipto tubtob sa siudad sang Tapanes.

8Sa Tapanes ang Ginoo nagsiling sa akon,

9“Kuha ka sang dalagku nga mga bato kag ilubong ini sa alagyan sa atubangan sang salamputan sa palasyo diri sa siudad, kag ipakita sa iban nga mga Israelinhon ang paghimo mo sini.

10Dayon singgana sila nga ako, ang Ginoo sang mga hangaway, ang Dios sang Israel, magapadala sang akon alagad nga si Haring Nabucodonosor sang Babilonia sa sini nga lugar. Sia magapahamtang sang iya trono sa ibabaw sini nga mga bato nga inyo ginlubong, kag magahumlad sa ibabaw nila ang tolda sang hari.

11Si Nabucodonosor magaabot kag magalutos sang Ehipto. Ang mga tawo nga natalana nga mapatay sa balatian, mapatay paagi sa balatian. Ang mga natalana nga pagabihagon subong mga binilanggo pagabihagon, kag ang mga natalana nga mapatay sa inaway, magakalamatay sa inaway.

12Sunogon ko ang mga templo sang mga dios sang Ehipto, kag ang hari sang Babilonia magasunog sang ila mga dios ukon magadala sa ila. Subong nga ang isa ka manugbantay sang karnero nagakuha sang mga bitik sa iya mga bayu, sa amo man nga bagay ang hari sang Babilonia magakuha sang duta sang Ehipto nga natinluan sang tanan nga mga pagkabutang kag dayon magahalin sia nga madinalag-on.

13Pagapukanon niya ang balaan nga mga monumento nga bato sang Heliopolis sa Ehipto, kag pagasunogon niya ang mga templo sang mga dios sang mga Ehiptohanon.”

← Chapter 42 Jump to: Chapter 44 →