Jeremiah 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Ang Ginoo nagsugo sa akon sa paglakat kag sa pagbakal sang karsonsilyo nga lino para sa akon kaugalingon kag isuksok ini. Pero ginsingganan niya ako nga indi ini pag-itum-oy sa tubig.

2Gani nagbakal ako sing karsonsilyo, kag ginsuksok ko ini.

3Dayon naghambal liwat ang Ginoo sa akon kag nagsiling,

4“Kadto ka sa Suba sang Eufrates, dalha ang karsonsilyo nga imo ginasuksok, kag tagoa ini sa isa ka gikab sa mga igang.”

5Gani naglakat ako kag gintago ini malapit sa Eufrates.

6Sang makaligad ang pila ka adlaw, ang Ginoo nagsugo sa akon sa pagbalik sa Eufrates kag sa pagkuha sang karsonsilyo.

7Gani nagbalik ako sa Eufrates. Ginpangita ko ang lugar nga akon gintaguan sang karsonsilyo kag nakita ko nga gision na ini, kag indi na mapuslan.

8Dayon ang Ginoo naghambal sa akon liwat. Nagsiling sia,

9“Sa sini nga paagi pagalaglagon ko ang bugal sang Juda kag ang daku nga bugal sang Jerusalem.

10Ining malaut nga mga tawo indi luyag magtuman sang akon mga pulong, kag sila matig-a sing ulo kag malaut sa gihapon. Ginsimba nila kag gin-alagad ang iban nga mga dios. Gani, manginkaangay sila sa sining karsonsilyo nga indi na mapuslan.

11Subong nga ang karsonsilyo nagahugot sa hawak sang isa ka tawo, amo man ini ang luyag ko sa tanan nga mga tawo sang Israel kag sa tanan nga mga tawo sang Juda nga mag-uyat sila sing hugot sa akon. Ginhimo ko ini agod nga sila mangin-akon mga tawo, kag sila magdayaw kag magpasidungog sang akon ngalan, pero indi sila magtuman sa akon.”

12Ang Ginoo, ang Dios sang Israel, nagsiling sa akon, “Jeremias, singgana ang mga tawo nga ang tagsa ka tibod nga sulodlan sang bino pagapun-on sing bino. Magasiling sila sa imo nga nakahibalo sila nga ang tagsa ka tibod nga sulodlan sang bino kinahanglan pagapun-on sang bino.

13Dayon singgana pa gid sila nga ako, ang Ginoo, magapainom sing bino sa tanan nga mga tawo sa sining duta tubtob nga sila mahubog: ang mga hari nga mga kaliwat ni David, ang mga pari, ang mga propeta, kag ang tanan nga mga tawo sang Jerusalem.

14Dayon pamuk-on ko sila kaangay sang mga tibod paagi sa pagbunggo sang isa kag isa, ang mga tigulang kag amo man ang mga pamatan-on. Wala sing kaawa, pagpaiway ukon pagkaluoy nga makapugong sang akon pagpamatay sa ila.”

15Mga tawo sang Israel, ang Ginoo naghambal! Magpaubos kamo kag magpamati sa iya.

16Pasidunggi ang Ginoo nga inyo Dios, sa wala pa sia magpadala sing kadudulman, kag masandad kamo sa mga bukid, sa wala pa niya mapadulom sing mangitungito ang kapawa nga inyo ginalauman.

17Kon indi kamo magpamati, magahibi ako sing tago tungod sang inyo bugal, magahibi ako sing mapait, kag magailig ang akon mga luha tungod kay ginbihag ang mga tawo sang Ginoo.

18Ang Ginoo nagsiling sa akon, “Singgani ang hari kag ang iya iloy sa pagpanaog sa ila mga trono, tungod kay ang ila matahom nga mga korona nahulog gikan sa ila mga ulo.

19Ang mga kabanwahanan sang nabagatnan nga bahin sang Juda nakibon kag wala gid sing may makasulod pakadto sa ila. Ang tanan nga mga tawo sang Juda ginbihag.”

20Mga tawo sang Jerusalem, tan-awa ninyo! Ang inyo mga kaaway nagadulhog gikan sa aminhan! Diin na bala ang mga tawo nga gintugyan sa inyo pagtatap, ang inyo mga tawo nga inyo ginapabugal?

21Ano ang masiling ninyo, kon ang mga tawo nga ginhunahuna ninyo nga inyo mga abyan ginbutang nga maggahom sa inyo? Magakasakit kamo subong sang isa ka babayi nga manugbata.

22Kon magpamangkot kamo ngaa natabo ini sa inyo, kon ngaa ang inyo mga bayu nagisi, kag ginlugos kamo, ini tungod kay ang inyo sala tama gid kadako.

23Mailisan bala sang isa ka Etiopiahanon ang kolor sang iya panit, ukon mabayluhan bala sang isa ka leopardo ang iya mga pintukpintok? Kon mahimo nila ina, dayon kamo nga nagahimo lamang sing malaut makatuon sa paghimo sing maayo.

24Ang Ginoo magalapta sa inyo subong sang dagami nga napalid sang hangin sang desierto.

25Nagsiling sia nga mangin-amo ini ang inyo maabutan. Amo ini ang iya ginpat-od nga himuon sa inyo, tungod kay ginkalimtan ninyo sia, kag nagsalig kamo sa indi matuod nga mga dios.

26Ang Ginoo gid magahublas sa inyo, kag sia magapakahuya sa inyo.

27Nakita niya nga ginahimo ninyo ang mga butang nga iya ginakangil-aran. Nakita niya nga ginalagas ninyo ang mga dios sang mga pagano sa mga kabakuloran kag sa mga kaumhan kaangay sang isa ka lalaki nga nagakaibog sa asawa sang iya kasilingan ukon kaangay sang isa ka lalaki nga kabayo nga nagapangita sang iya pareha. Mga tawo sang Jerusalem, tapos gid kamo! San-o pa bala kamo manginputli?

← Chapter 12 Jump to: Chapter 14 →