Jeremiah 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Ang Ginoo nagsugo sa akon

2sa pagsugid sa tagsatagsa sa Jerusalem sini nga mensahe: “Nadumdoman ko kon daw ano katutom sa imo sang pamatan-on pa ikaw, kon daw ano ang paghigugma mo sa akon sang bag-o pa lang kita makasal. Ginsunod mo ako sa desierto, sa duta nga wala pa matamni.

3O Israel, akon lamang ikaw, ikaw ang labing matinggas sa akon patubas. Ginpaantos ko ang tanan nga nagpintas sa imo, kag ginpadalhan ko sila sing kalisdanan. Ako, ang Ginoo, naghambal sini.”

4Pamatii ninyo ang mensahe sang Ginoo, kamo nga mga kaliwat ni Jacob, kamo nga mga panimalay ni Israel.

5Ang Ginoo nagasiling: “Ano bala nga sala ang ginasumbong sang inyo mga katigulangan batok sa akon, sa bagay nga ginbayaan nila ako? Nagsimba sila sa mga diosdios nga wala sing pulos, kag sila mismo nanginwalay pulos.

6Wala sila magsapak sa akon, bisan pa nga ginluwas ko sila gikan sa Ehipto kag ginpangulohan ko sila sa desierto: isa ka duta sang mga desierto kag mga buho, kigas nga duta kag puno sang katalagman kag wala gid sing may nagaestar, sa diin wala gid sing may nagapanglakaton.

7Gindala ko sila sa mapatubason nga duta, sa pagpulos sang iya sini patubas kag sang iban pa nga maayo nga mga butang. Pero sa baylo ginlaglag nila ang akon duta, gindagtaan nila ang duta nga akon ginhatag sa ila.

8Ang mga pari wala magpamangkot, “Diin na bala ang Ginoo?’ Ang akon kaugalingon nga mga pari wala makakilala sa akon. Ang mga pangulo nagpamatok sa akon, ang mga propeta naghambal sa ngalan ni Baal kag nagsimba sa mga diosdios nga wala sing pulos.”

9“Gani, ako, ang Ginoo, magapasaka liwat sang akon panumbongon batok sa akon mga tawo. Pasakaan ko sing panumbongon batok sa ila mga kaliwat.

10Lakat ka padulong sa nakatundan sa isla sang Cipre, kag magpadala ka sing isa ka tawo sa sidlangan sa duta sang Kedar. Makita mo nga wala sing kasubong sini nga natabo sang una.

11Wala sing pungsod nga nagbaylo sang ila mga dios, bisan ini sila indi matuod. Pero ginbayluhan ako sang akon mga tawo, ang Dios nga naghatag sa ila sing kadungganan, sa mga dios nga indi makabulig sa ila.

12Gani, nagasugo ako nga ang langit mag-uyog sa kahadlok, nga magkahangawa kag magkatingala.

13Kay ang akon mga tawo nakahimo sing duha ka sala: nagtalikod sila sa akon, nga amo ang tuboran sang mabugnaw nga tubig, kag nagkutkot sila sing mga bubon, sing mga bubon nga may litik nga indi matiniran sang tubig.

14“Ang Israel indi ulipon, wala sia matawo nga ulipon. Ngaa bala nga ginahingabot sia sang iya mga kaaway?

15Nagngurob sila sa iya subong sang mga leon, nagngurob sila sing mabaskog. Ginhimo nila nga desierto ang iya duta, yara sa kalaglagan ang iya mga kabanwahanan, kag wala na gid sing may nagaestar sa ila.

16Huo, ang mga tawo sa Memfis kag Tapanes nagbuka sang iya ulo.

17O Israel, ikaw gid sini ang may sala! Ginbayaan mo ako, ang Ginoo nga imo Dios, sang ginpangulohan ko ikaw sa imo dalanon.

18Karon, ano bala ang imo makuha sa pagkadto sa Ehipto kag sa pag-inom sing tubig sa Suba sang Nilo? Ano bala ang imo makuha sa pagkadto sa Asiria kag sa pag-inom sing tubig sa Suba sang Eufrates?

19Ang imo kaugalingon nga kalautan magasilot sa imo, kag ang imo pagbiya sa akon magakondenar sa imo. Mahibaluan mo kon ano kapait kag kalaut ang pagbiya sa akon, ang Ginoo nga imo Dios, kag kon indi na ikaw magpabilin nga matutom sa akon. Ako, ang Ginoong Dios sang mga hangaway, naghambal sini.”

20Ang Ginoo nga Gamhanan nagasiling, “O Israel, dugay na nga imo ginsikway ang akon awtoridad, indi ikaw magtuman kag magsimba sa akon. Sa tagsa ka mataas nga bakulod, kag sa idalom sang madabong nga kahoy, nagsimba ikaw sa mga dios nga nagapabugana sing patubas.

21Gintanom ko ikaw subong sang isa ka pinili nga balagon sang ubas, gikan sa pinakaali nga binhi. Pero tan-awa kon ano ikaw karon! Kaangay ikaw sang dunot nga balagon sang ubas, nga indi na mapuslan.

22Bisan pa magpanglugod ikaw kag maggamit sang madamo nga habon, makita ko pa gihapon ang dagta sang imo sala.

23Ano ang pagkasiling mo nga wala mo madagtai ang imo kaugalingon, nga wala gid ikaw magsimba kay Baal? Tan-awa kon paano ikaw nagpakasala sa kapatagan, dumdoma kon ano ang imo nahimo. Kaangay ikaw sang tinday nga kamelyo nga nagapahigal, nga wala mahigti kag nagadalagan pakadto pakari,

24nagadalagan sing madasig pakadto sa desierto. Kon nagapahigal sia, sin-o bala ang makapugong sa iya? Indi na mabudlayan ang lalaki nga kamelyo nga nagapangita sa iya. Mahapos sia pangitaon sa panahon nga tigkalasta.

25O Israel, indi ka magtiniil, ukon indi pagpamalaha ang imo tutonlan sa pagsunod sa iban nga mga dios. Pero nagasiling ka, ‘Indi ako makabalik. Ginhigugma ko ang dumoluong nga mga dios kag magasunod ako sa ila.’”

26Ang Ginoo nagasiling, “Subong nga ang isa ka makawat mahuy-an kon madakpan, subong man, kamo tanan nga mga tawo sang Israel pagapakahuy-an—ang inyo mga hari kag mga opisyales, ang inyo mga pari kag mga propeta.

27Pakahuy-an kamo tanan nga nagasiling sa isa ka kahoy, ‘Amay ko ikaw,’ kag sa isa ka bato, ‘Iloy ko ikaw.’ Mahanabo ini tungod kay nagbiya kamo sa akon, sa baylo nga magpalapit sa akon. Pero kon yara kamo sa kalisdanan, nagapangayo kamo sing bulig sa akon agod luwason kamo.

28“Diin na bala ang mga dios nga ginhimo ninyo para sa inyo kaugalingon? Kon yara kamo sa kalisdanan, sila ang paluwasa sa inyo, kon makasarang sila! O mga taga-Juda, ang inyo mga dios subong kadamo sang inyo mga siudad.

29Ano bala ang inyo reklamo? Ngaa bala nagabato kamo sa akon?

30Ginsilutan ko kamo, pero wala man ini sing pulos, indi kamo luyag nga tudloan. Subong sang nagangurob nga leon, ginpamatay ninyo ang inyo mga propeta.

31Mga tawo sang Israel, pamatii ang akon ginasiling. Nanginkaangay bala ako sang isa ka desierto sa inyo, kaangay sang duta nga madulom nga puno sang katalagman? Ngaa karon, nagasiling kamo nga himuon ninyo ang inyo luyag, nga indi na kamo magbalik sa akon?

32Malimtan bala sang isa ka dalaga ang iya mga alahas, ukon sang isa ka nobya ang iya bayu sa kasal? Pero ginkalimtan ako sang akon mga tawo sa indi na maisip nga mga inadlaw.

33Nakahibalo gid kamo maglagas sang inyo mga kahagugma. Bisan ang labing malain nga mga babayi makatuon sa inyo.

34Ang inyo mga bayu nadagtaan sang dugo sang mga imol nga wala sing sala, indi sang dugo sang mga makawat. “Pero wala sapayan sini nga mga butang,

35nagasiling kamo, ‘Wala kami sing sala, pat-od gid nga ang Ginoo wala na nagakaakig sa amon.’ Pero ako, ang Ginoo, magasilot sa inyo tungod kay nagasiling kamo nga wala kamo makasala.

36Ngaa kadali sa inyo magliso sa mga dios sang iban nga mga kapungsoran? Pagapakahuy-an kamo sang Ehipto, subong sang pagpakahuya sa inyo sang Asiria.

37Pagabayaan ninyo man ang Ehipto, nga nagaduko sang inyo mga ulo sa kahuya. Ako, ang Ginoo, nagsikway sang mga ginasaligan ninyo, kag indi sila magdala sing kauswagan sa inyo.”

← Chapter 1 Jump to: Chapter 3 →