Jeremiah 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1Daw ano ka makakulogmat ang paghukom sang Ginoo sa mga pangulo nga nagalaglag kag nagapaalaplaag sang iya mga tawo!

2Amo ini ang ginasiling sang Ginoo, ang Dios sang Israel, nahanungod sa mga pangulo nga dapat kuntani mag-atipan sang iya mga tawo: “Wala ninyo gin-atipan ang akon mga tawo. Ginpaalaplaag kag gintabog ninyo sila. Karon silutan ko kamo tungod sang malaut nga mga butang nga inyo nahimo.

3Pagatipunon ko ang nabilin sang akon mga tawo gikan sa mga kapungsoran sa diin ginpaalaplaag ko sila, kag pagadalhon ko sila pabalik sa ila duta nga natawhan. Magadamo ang ila mga kabataan kag magamuad sila.

4Magapili ako sing mga pangulo nga magatatap sa ila. Ang akon mga tawo indi na magkahadlok ukon kugmaton, kag indi ko na sila pagsilutan liwat. Ako, ang Ginoo, naghambal sini.”

5Ang Ginoo nagasiling, “Magaabot gid ang tion nga magapili ako sang isa ka matarong nga hari gikan sa kaliwat ni David. Ini nga hari magadumala nga may kaalam kag magahimo sing matarong kag nagakaigo sa bug-os nga duta.

6Kon sia amo na ang hari, ang mga tawo sang Juda may kalig-unan, kag ang mga tawo sang Israel magakabuhi sa paghidait. Pagatawgon nila ina nga hari nga ‘Ang Ginoo Amo ang Aton Kaluwasan.’”

7Nagasiling ang Ginoo, “Magaabot ang tion nga ang mga tawo indi na magsumpa sa akon subong Dios nga buhi nga nagpagwa sang mga tawo sang Israel gikan sa duta sang Ehipto.

8Sa baylo, magasumpa sila sa akon subong Dios nga buhi nga nagpagwa sang mga tawo sang Israel gikan sa naaminhan nga duta, kag gikan sa tanan nga mga kapungsoran sa diin ginpaalaplaag ko sila. Dayon magaestar sila sa ila kaugalingon nga duta.”

9Nabuka ang akon tagipusoon, kag nagakurog ako. tungod sa Ginoo, tungod sa iya balaan nga mga pulong, kaangay ako sang isa ka tawo nga hubog, isa ka tawo nga natam-an inom sang madamo nga bino.

10Ang duta puno sang mga tawo nga indi matutom sa Ginoo, malaut ang ila pagkabuhi kag ginagamit nila ang ila gahom sa indi maayo. Tungod sang pagpakamalaut sang Ginoo ang duta nagakasubo, kag ang mga halalban nalaya.

11Ang Ginoo nagasiling, “Ang mga propeta kag ang mga pari di-diosnon, nadakpan ko sila nga nagahimo sing malaut sa sulod gid sang Templo.

12Ang mga banas nga ila ginasunod madanlog kag madulom, pasandaron ko sila kag pukanon, padalhan ko sila sing kalalat-an, nagaabot na ang tion sang ila silot. Ako, ang Ginoo, naghambal sini.

13Nakit-an ko ang sala sang mga propeta sang Samaria: nagpanagna sila sa ngalan ni Baal, kag ila ginpatalang ang akon mga tawo.

14Pero nakit-an ko nga mas malaut pa gid ang ginahimo sang mga propeta sa Jerusalem: nagapanginbabayi sila kag nagabutig, ginabuligan nila ang mga tawo sa paghimo sing malaut, sa bagay nga wala sing isa nga nagauntat sa paghimo sing malain. Para sa akon tanan sila subong kalain sang mga pumoluyo sang Sodoma kag Gomorra.

15“Gani, ako, ang Ginoo sang mga hangaway, nagasiling nahanungod sa mga propeta sang Jerusalem: Pakan-on ko sila sing mapait nga mga tanom, kag paimnon sing tubig nga may hilo, tungod kay ginpalapnag nila ang pagkadi-diosnon sa bug-os nga duta.”

16Ang Ginoo sang mga hangaway nagsiling sa mga tawo sang Jerusalem, “Indi kamo magpamati sa ginasiling sang mga propeta, kay ginapasalig nila kamo sa indi matuod nga mga paglaom. Ginasugid nila sa inyo ang ila lamang ginahunahuna, kag indi ang akon ginsiling.

17Nagapadayon sila sa pagsugid sa mga tawo nga wala sang pagtahod sa akon. Nagsiling sila ‘Ang tanan manginmaayo sa inyo, kag nagasugid sila sa kay bisan sin-o nga matig-a sing ulo, ‘Ang kalalat-an indi gid mag-abot sa inyo.’”

18Nagsiling ako, “Wala sing bisan isa sining mga propeta ang nakahibalo sang tago nga mga panghunahuna sang Ginoo. Wala gid sing bisan isa sa ila nga nakabati ukon nakahangop sang iya pulong, ukon nakapamati ukon nakatalupangod sa iya ginsiling.

19Ang iya kaakig isa ka bagyo, isa ka nagahagunos nga hangin nga magaalimpulos sa mga ulo sang malaut.

20Indi ini mag-untat tubtob mahimo niya ang luyag niya himuon. Sa palaabuton nga mga inadlaw mahangpan ini sing maayo sang iya mga tawo.”

21Ang Ginoo nagsiling, “Wala ko ginpadala ini nga mga propeta, pero naglakat sila. Wala ko sila ginhatagi sing inughambal, pero naghambal sila sa akon ngalan.

22Kon nakahibalo lamang sila sang akon tinago nga mga panghunahuna, dayon mawali nila kuntani ang akon mensahe sa akon mga tawo, kag mapauntat nila sila sa ila malaut nga pagkabuhi kag ang malaut nga mga butang nga ila ginahimo.

23“Ako amo ang Dios nga yara sa bisan diin, kag indi sa isa lamang ka lugar.

24Wala sing bisan isa nga makapanago sa bisan diin nga indi ko makita. Wala bala kamo makahibalo nga yara ako sa tanan nga lugar sa langit kag sa duta?

25Nahibal-an ko kon ano ang ginsiling sadtong mga propeta nga nagahambal sing kabutigan sa akon ngalan kag nagasiling nga ginhatagan ko sila sang akon mensahe sa ila mga damgo.

26Tubtob pa bala san-o ang pagpatalang sining mga propeta sa akon mga tawo paagi sa mga kabutigan nga ila ginpatupato?

27Nagahunahuna bala sila nga ang mga damgo nga ila ginasugid magapalimot sang akon mga tawo sa akon, subong nga ang ila mga katigulangan nagkalimot sa akon kag nag-alagad kay Baal?

28Ang propeta nga nagdamgo dapat magsiling nga isa lamang ini ka damgo, pero ang propeta nga nakabati sang akon mensahe dapat magwali sang amo gid nga mensahe. Ano bala ang kinaayo sang dagami kon ipaanggid mo sa trigo?

29Ang akon pulong kaangay sang isa ka kalayo, kag kaangay sang isa ka maso nga nagapamuka sang mga igang.

30Batok ako sa mga propeta nga nagakuha sang ila inughambal sa kapareho nila nga mga propeta kag ila ini ginawali subong akon mga pulong.

31Batok man ako sa mga propeta nga nagahambal sang ila kaugalingon nga mga pulong kag nagasiling nga nagikan ini sa akon.

32Pamatii ninyo ang akon ginasiling, ako, ang Ginoo! Batok ako sa mga propeta nga nagasugid sang ila mga damgo nga puno sing mga kabutigan. Ginasugid nila ini nga mga damgo kag ginapatalang nila ang akon mga tawo paagi sa ila mga kabutigan kag pagpabugal. Wala ko sila ginpadala ukon ginsugo nga maglakat, kag tanan sila indi gid makabulig sa mga tawo. Ako, ang Ginoo, ang naghambal sini.”

33Ang Ginoo nagsiling sa akon, “Jeremias, kon ang isa sang akon mga tawo, ukon ang isa ka propeta, ukon isa ka pari magpamangkot sa imo, ‘Ano bala ang mensahe sang Ginoo?’ Singgana sia, ‘Palas-anon ikaw sa Ginoo, kag sia magasikway sa imo.’

34Kon ang isa ka propeta, ukon isa ka pari, ukon isa sining mga tawo maggamit sang mga pulong, ‘ang palas-anon sang Ginoo,’ silutan ko sia kag ang iya panimalay.

35Sa baylo, ang tagsatagsa dapat magpamangkot sa iya mga abyan kag mga pariente, ‘Ano bala ang sabat nga ginhatag sang Ginoo? Ano bala ang ginsiling sang Ginoo?’

36Gani indi na sila dapat magsiling sining mga pulong, ‘ang palas-anon sang Ginoo,’ tungod kay kon may isa nga magsiling sini, himuon ko ang akon pulong nga isa ka matuod nga palas-anon sa iya. Ang mga tawo naglubag sang mga pulong sang ila Dios, ang Dios nga buhi, ang Ginoo sang mga hangaway.

37Jeremias, pamangkuta ang mga propeta, ‘Ano nga sabat ang ginhatag sa inyo sang Ginoo? Ano ang ginsiling sang Ginoo?’

38Kag kon indi sila magtuman sang akon sugo kag gamiton nila ang mga pulong, ‘ang palas-anon sang Ginoo ’ dayon singgana sila nga

39panghakwaton ko gid sila kag itapok malayo sa akon, sila kag ang siudad nga akon ginhatag sa ila kag sa ila mga katigulangan.

40Padalhan ko sila sing walay katapusan nga kahuloy-an kag pagtamay, nga indi gid nila malimtan.”

← Chapter 22 Jump to: Chapter 24 →