Jeremiah 36

Ilonggo (Maayong Balita nga Biblia (2012))

← Chapter 35 Jump to: Chapter 37 →

1Sa ikap-at nga tuig nga si Joaquim, anak ni Josias amo ang hari sang Juda, ang Ginoo nagsiling sa akon,

2“Kuha ka sang isa ka linukot nga tulon-an kag isulat ang tanan nga akon ginsiling sa imo nahanungod sa Israel kag sa Juda, kag sa tanan nga mga kapungsoran. Isulat ang tanan nga ginsiling ko sa imo halin sang nahauna nga paghambal ko sa imo, sang si Josias amo ang hari, tubtob karon.

3Ayhan kon ang mga tawo sang Juda makabati sang tanan nga kalaglagan nga akon ginatuyo nga ipadala sa ila, magabiya sila sang ila malaut nga mga pagginawi. Dayon patawaron ko ang ila mga kalautan kag ang ila mga sala.”

4Gani gintawag ko si Baruc, anak ni Nerias, kag gindikta sa iya ang tanan nga ginsiling sang Ginoo sa akon. Kag ginsulat ini tanan ni Baruc sa linukot nga sulolatan.

5Dayon ginhatag ko kay Baruc ang masunod nga mga tulomanon: “Indi na ako pagpasudlon sa Templo.

6Pero luyag ko nga magkadto ikaw didto sa madason nga tion nga ang mga tawo nagapuasa, kag basaha sing mabaskog ang linukot nga tulon-an, agod mabatian nila ang tanan nga ginsiling sa akon sang Ginoo, kag ang gindikta ko sa imo. Basaha ini sa diin mabatian ikaw sang tanan, lakip ang mga tawo sang Juda nga nagasulod didto halin sa ila mga kabanwahanan.

7Ayhan magapangamuyo sila sa Ginoo kag magabiya sila sang ila malaut nga mga pagginawi, tungod kay ang Ginoo nagpamahog sa iya mga tawo sa iya makakulogmat nga kaakig kag kasingkal.”

8Gani ginbasa ni Baruc ang mga pulong sang Ginoo sa Templo suno gid sa akon ginsugo sa iya nga iya himuon.

9Sa ikasiyam nga bulan sang ikalima nga tuig nga si Joaquim amo ang hari sang Juda, ang mga tawo nagpuasa agod nga ang Ginoo mahamuot sa ila. Ginhimo ini sang tanan nga nagaestar sa Jerusalem kag sang tanan nga nagkadto didto gikan sa mga kabanwahanan sang Juda.

10Dayon samtang nagapamati ang tanan nga mga tawo, si Baruc nagbasa sa linukot nga tulon-an sang tanan nga akon ginsiling. Ginhimo niya ini sa sulod sang Templo, sa kwarto ni Gemarias, anak ni Safan nga sekretaryo sang korte. Ang iya kwarto yara nahamtang sa naibabaw nga pasiyuhan malapit sa salamputan sang Bag-o nga Pwerta sang Templo.

11Si Micaya, anak ni Gemarias kag apo ni Safan, nakabati kay Baruc nga nagabasa gikan sa linukot nga tulon-an sang ginsiling sang Ginoo.

12Dayon nagkadto sia sa palasyo sang hari, sa kwarto sang sekretaryo sang korte sa diin ang tanan nga iban nga mga opisyales nagasinapol. Yadto didto si Elisama nga sekretaryo sang korte, si Delaya nga anak ni Semaya, si Elnatan nga anak ni Acbor, si Gemarias nga anak ni Safan, si Sedequias nga anak ni Hananias, kag ang tanan nga iban nga mga opisyales.

13Ginsugiran sila ni Micaya sang tanan nga ginbasa ni Baruc sa mga tawo.

14Dayon ginpadala sang mga opisyal si Jehudi nga anak ni Netanias, apo ni Selemias kag apo sa tuhod ni Cusi, sa pagsiling kay Baruc nga dalhon sa ila ang linukot nga tulon-an nga iya ginbasa sa mga tawo. Gindala sa ila ni Baruc ang linukot nga tulon-an.

15Nagsiling sila, “Pungko anay, kag basaha sa amon ang linukot nga tulon-an.” Gani ginbasa ini sa ila ni Baruc.

16Sa tapos niya mabasa ini tanan, nagtinulokay sila nga may kahadlok, kag nagsiling kay Baruc, “Kinahanglan isugid naton ini sa hari.”

17Dayon ginpamangkot nila si Baruc, “Karon sugiri kami, paano mo ginsulat ini tanan? Gindikta bala ini sa imo ni Jeremias?”

18Si Baruc nagsabat, “Gindikta ini tanan sa akon ni Jeremias, kag ginsulat ko ini sang tinta sa sini nga linukot nga tulon-an.”

19Dayon ginsingganan nila sia, “Ikaw kag si Jeremias dapat maglakat kag magpanago. Indi kamo magpahibalo sa kay bisan sin-o kon diin kamo.”

20Gani gintago sang mga opisyales ang linukot nga tulon-an sa kwarto ni Elisama nga sekretaryo sang korte, kag nagkadto sila sa kwarto sang hari, sa diin ginsugid nila sa hari ang tanan.

21Dayon ginsugo sang hari si Jehudi nga kuhaon ang linukot nga tulon-an. Ginkuha niya ini sa kwarto ni Elisama, kag ginbasa ini sa hari kag sa tanan nga mga opisyales nga nagatindog sa palibot niya.

22Tigtulognaw sadto kag ang hari nagapungko sa atubangan sang kalayo didto sa iya palasyo para sa tigtulognaw.

23Sa tapos mabasa ni Jehudi ang tagsa ka tatlo ukon apat ka mga idas, ginapang-utod ini sang hari paagi sa iya diutay nga kutsilyo kag ginahaboy ini sa kalayo. Nagpadayon sia sa paghimo sini tubtob nga ang bug-os nga linukot nga tulon-an nasunog.

24Pero ang hari ukon ang bisan isa sang iya mga opisyales nga nakabati sini tanan wala nagkahadlok ukon nagpakita sang tanda sang pagpangasubo.

25Bisan pa nga nagpakitluoy si Elnatan, si Delaya kag si Gemarias sa hari nga indi niya pagsunogon ang linukot nga tulon-an, ang hari wala magsapak sa ila.

26Dayon ginsugo niya ang prinsipe nga si Jerameel, upod kay Seraya nga anak ni Aseriel kag kay Selemias nga anak ni Abdel, sa pagdakop sa akon kag sa sekretaryo nga si Baruc. Pero gintago kami sang Ginoo.

27Sa tapos masunog ni Haring Joaquim ang linukot nga tulon-an nga akon gindikta kay Baruc, ang Ginoo nagsugo sa akon

28sa pagkuha sang isa pa gid ka linukot nga tulon-an kag sa sini isulat ang tanan nga yadto didto sa nahauna nga linukot nga tulon-an.

29Ang Ginoo nagsugo sa akon sa pagsiling sa hari, “Ginsunog mo ang linukot nga tulon-an, kag ginpamangkot mo si Jeremias kon ngaa ginsulat niya nga magaabot ang hari sang Babilonia kag magalaglag sini nga duta kag magapamatay sang iya sini mga tawo kag mga kasapatan.

30Gani karon, ako, ang Ginoo, nagasiling sa imo, Haring Joaquim, wala gid ikaw sing kaliwat nga magagahom sa ginharian ni David. Ang imo bangkay pagaihaboy sa gwa sa diin pagainitan ini kon adlaw kag pagatun-ogan kon gab-i.

31Silutan ko ikaw kag ang imo mga kaliwat, lakip ang imo mga opisyales, tungod sang mga sala nga inyo tanan nahimo. Ikaw, ukon ang mga tawo sang Jerusalem kag Juda wala magpamati sa akon mga paandam. Gani, ipadala ko sa inyo tanan ang kalalat-an nga akon ginsiling nga ipadala.”

32Dayon nagkuha ako sang isa pa gid ka linukot nga tulon-an kag ginhatag ko ini sa akon sekretaryo nga si Baruc, kag ginsulat niya ang tanan nga akon gindikta. Ginsulat niya ang tanan nga nasulat sa nahauna nga linukot nga tulon-an kag ang dugang nga mga pulong nga akon gindikta sa iya.

← Chapter 35 Jump to: Chapter 37 →