Jeremiah 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Ang Ginoo nagsugo sa akon sa paglakat kag sa pagbakal sing banga. Ginsingganan man niya ako sa pagdala upod sa akon sang pila ka mga pangulo sang mga tawo kag sang pila ka tigulang nga mga pari,

2kag sa paglakat nga nagaagi sa Pwerta sang Hilimuan sang Kolon padulong sa Kapatagan sang Hinom. Didto isugid ko ang mga pulong nga igahatag sang Ginoo sa akon.

3Ang Ginoo nagsugo sa akon sa pagsiling, “Mga hari sang Juda kag mga tawo sang Jerusalem, pamatii ninyo ang inugsiling ko, ako ang Ginoo sang mga hangaway, ang Dios sang Israel. Magapadala ako sing kalalat-an sa sini nga lugar, agod nga ang mga dulonggan sang tagsatagsa nga makabati sini matingilan.

4Himuon ko ini tungod kay ang mga tawo nagbiya sa akon kag nagdagta sini nga lugar paagi sa ila pagdulot sing mga halad sa iban nga mga dios, mga dios nga bisan sila ukon ang ila mga katigulangan, ukon ang mga hari sang Juda wala makakilala. Ginpuno nila ini nga lugar sang dugo sang mga tawo nga wala sing sala,

5kag nagpatindog sila sing mga altar para kay Baal, agod masunog nila ang ila mga kabataan sa kalayo subong mga halad. Wala gid ako magsugo sa ila sa paghimo sini, wala gani ini mag-abot sa akon hunahuna.

6Gani, ako, ang Ginoo, nagasiling nga ang tion magaabot nga ini nga lugar indi na pagtawgon nga Topet ukon Kapatagan sang Hinom. Sa baylo pagatawgon ini nga Kapatagan nga Ilihawan.

7Sa sini nga lugar gub-on ko ang tanan nga mga plano sang mga tawo sang Juda kag Jerusalem. Padag-on ko batok sa ila ang ila mga kaaway nga amo ang magapamatay sa ila sa inaway. Ihatag ko ang ila mga bangkay sa mga pispis kag sa mga sapat nga talunon subong kalan-on.

8Padalhan ko sing tama kadako nga kalaglagan ini nga siudad, sa bagay nga ang tanan nga nagaagi sa sini nga lugar maurongan kag matingala.

9Ang mga kaaway magakibon sang siudad kag magatinguha sa pagpamatay sang mga pumoluyo sini. Ang pagkibon tama ka makahaladlok sa bagay nga ang mga tawo sa sulod sang siudad magakaon sang unod sang ila mga kaingod kag bisan pa sang ila kaugalingon nga mga kabataan.”

10Dayon ang Ginoo nagsugo sa akon sa pagbuka sang banga sa atubang sang mga tawo nga nag-upod sa akon

11kag sa pagsugid sa ila nga ang Ginoo sang mga hangaway nagsiling, “Pamuk-on ko ining mga tawo kag ining siudad kag manginkaangay ini sang ginbuka nga banga nga indi na mauli. Ang mga tawo magalubong sang ila mga minatay bisan pa sa Topet, tungod kay wala na sila sing lugar nga malubngan.

12Nagasaad ako nga himuon ko ini nga siudad kag ang mga pumoluyo sini kaangay sang Topet. Ako, ang Ginoo, naghambal sini.

13Ang mga balay sa Jerusalem, ang mga balay sang mga hari sang Juda, kag ang tanan gid nga mga balay nga sa mga atop sini ginsunog ang insyenso para sa mga bituon kag sa diin gin-ula ang bino subong isa ka dulot sa iban nga mga dios, ini tanan mangindi-matinlo kaangay sang Topet.”

14Dayon naghalin ako sa Topet, sa diin ginpadala ako sang Ginoo sa pagsugid sang iya mga pulong. Nagsulod ako kag nagtindog sa pasiyuhan sang Templo kag ginsingganan ko ang tanan nga mga tawo,

15nga ang Ginoo sang mga hangaway, ang Dios sang Israel, nagsiling, “Pagadalhon ko sa sini nga siudad kag sa tanan nga mga kabanwahanan sa palibot ang tanan nga silot nga ginsiling ko nga akon dalhon, tungod kay matig-a ang inyo mga ulo kag indi kamo magpamati sa akon ginasiling.”

← Chapter 18 Jump to: Chapter 20 →