Jeremiah 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Liwat ang Ginoo naghambal sa akon kag nagsiling,

2“Indi ka magpangasawa ukon mag-anak sa lugar nga kaangay sini.

3Sugiran ko ikaw kon ano ang matabo sa mga kabataan nga matawo diri kag sa ila mga ginikanan.

4Mapatay sila sa makakulogmat nga mga balatian kag wala sing may magalalaw kag magalubong sa ila. Ang ila mga bangkay magatumpok kaangay sang mga tinumpukan sang ipot sa duta. Magakalamatay sila sa inaway ukon sa gutom, kag ang ila mga bangkay manginkalan-on sang mga pispis kag sang mga sapat nga talunon.

5“Indi ka magsulod sa isa ka balay sa diin may nagalalaw. Indi ka magpangalisod sa kay bisan sin-o. Indi ko na paghatagan sing paghidait ang akon mga tawo ukon pakitaan ko sila sang gugma kag kaluoy.

6Ang mga manggaranon kag mga imol mapatay sa sini nga duta, pero wala sing may magalubong ukon magalalaw sa ila. Wala sing may magpilas sang iya kaugalingon ukon magpabulog sang iya ulo sa pagpakita nga sia nagapangalisod.

7Wala sing may magkaon ukon mag-inom upod sa kay bisan sin-o sa paglipay sa iya kon ang iya hinigugma mapatay. Wala gid sing may magapakita sang iya pagbuylog sa kalisod, bisan pa kay bisan sin-o nga nadulaan sing amay ukon iloy.

8“Indi ka magsulod sa isa ka balay sa diin ang mga tawo nagakinalipay. Indi ka magpungko upod sa ila, sa pagkaon ukon sa pag-inom.

9Pamatii ang akon inughambal, ako, ang Ginoo sang mga hangaway, ang Dios sang Israel. Pahipuson ko ang ginahod sang ila pagkinalipay kag pagkinasadya, kag ang mga tingog sang mga nobyo kag nobya sa sini nga lugar. Ang mga tawo diri magakabuhi pa sa pagtan-aw sini nga mahanabo.

10“Kon sugiran mo sila sini nga mga butang, magapamangkot sila sa imo kon ngaa nagpamat-od ako sa pagsilot sa ila sing mapintas. Magapamangkot sila kon ano nga kalautan ang ila nahimo, kag kon ano nga sala ang ila nahimo batok sa Ginoo nga ila Dios.

11Dayon singgana sila nga ang Ginoo nagsiling, ‘Ang inyo mga katigulangan nagbiya sa akon kag nagsimba kag nag-alagad sa iban nga mga dios. Ginbayaan nila ako kag wala nila gintuman ang akon mga ginatudlo.

12Pero ang inyo ginhimo labi pa kalain sang sa inyo mga katigulangan. Tanan kamo matig-a sing ulo kag malaut, kag wala nagatuman sa akon.

13Gani, tabugon ko kamo paggwa sa sini nga duta pakadto sa isa ka duta nga wala ninyo mahibaloi kag sang inyo mga katigulangan. Didto magaalagad kamo sa iban nga mga dios sa adlaw kag sa gab-i, kag indi gid ako magkaluoy sa inyo.’”

14Ang Ginoo nagasiling, “Magaabot ang tion nga wala na gid sing may magpanawag sa akon subong Dios nga buhi nga nagpagwa sang mga tawo sang Israel sa duta sang Ehipto.

15Sa baylo magapanawag sila sa akon subong Dios nga buhi nga nagpagwa sang mga tawo sang Israel halin sa naaminhan nga duta, kag halin sa iban nga mga kapungsoran sa diin ginpaalaplaag ko sila. Pabalikon ko sila sa ila kaugalingon nga pungsod, sa duta nga akon ginhatag sa ila mga katigulangan. Ako, ang Ginoo naghambal sini.”

16Ang Ginoo nagasiling, “Ipadala ko ang madamo nga mga mangingisda sa pagdakop sini nga mga tawo. Dayon ipadala ko ang madamo nga mga mangangayam sa pag-ayam sa ila sa tagsa ka bukid kag bakulod, kag bisan pa sa mga gikab sa dalagku nga mga bato.

17Nakita ko ang tanan nga ila ginahimo. Wala sing bisan ano nga butang nga natago sa akon. Nakita ko ang ila mga sala.

18Pabayron ko sila sing pilo tungod sang ila mga sala kag kalautan tungod kay ginadagtaan nila ang akon duta sang ila mga diosdios nga wala sing kabuhi subong sang mga bangkay. Kag ginpuno nila ang akon duta nga akon ginhatag sa ila sang ila di-matuod nga mga dios.”

19O Ginoo, ginaapinan mo ako kag ginahatagan sing kusog. Ginabuligan mo ako sa tion sang kalalat-an. Ang mga kapungsoran magapalapit sa imo gikan sa mga punta sang duta kag magasiling, “Wala gid sing may ginpanubli ang amon mga katigulangan kundi ang di-matuod nga mga dios, wala gid kundi mga diosdios nga wala sing pulos.

20Makahimo bala ang isa ka tawo sang iya kaugalingon nga mga dios? Indi! Kay kon nakahimo sia, indi gid sila matuod nga mga dios.”

21Nagasiling ang Ginoo, “Gani, sing makaisa gid lang pakilalahon ko ang mga kapungsoran sang akon gahom kag sang akon kusog. Makilala nila nga ako amo ang Ginoo.”

← Chapter 15 Jump to: Chapter 17 →