Jeremiah 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Ang Ginoo nagsiling sa akon,

2“Dulhog ka sa balay sang maninihon, kag didto ihatag ko sa imo ang akon inughambal.”

3Gani nagkadto ako didto kag nakita ko ang maninihon nga nagaobra sa iya aliling.

4Kon ang lunang nga sulodlan nga iya ginhimo indi maayo ang korte, ginakuha niya ang lunang kag ginahimo nga iban nga sulodlan.

5Dayon ang Ginoo nagsiling sa akon,

6“Wala bala ako sing kinamatarong sa paghimo sa inyo nga mga tawo sang Israel subong sang ginhimo sang maninihon sa lunang? Yara kamo sa akon mga kamot, subong sang lunang sa mga kamot sang maninihon.

7Kon magasiling ako sa bisan ano nga tion nga akon batakon ukon pauboson, ukon laglagon ang bisan ano nga pungsod ukon ginharian,

8kag kon ina nga pungsod magbiya sang iya kalautan, indi ko paghimuon ang akon ginsiling.

9Sa baylo, kon ako nagsiling nga akon ipasad kag patindugon ang bisan ano nga pungsod ukon ginharian,

10kag kon ina nga pungsod wala nagatuman sa akon kag nagahimo sing malaut, indi ko paghimuon ang akon ginsiling.

11Gani karon, singgana ang mga tawo sang Juda kag sang Jerusalem nga nagahimo ako sing mga plano batok sa ila kag nagahanda ako sa pagsilot sa ila. Singgana sila nga untatan na nila ang pagkabuhi sing malaut, sa pagbaylo sang ila mga pagginawi kag sang mga butang nga ila ginahimo.

12Magasabat sila, ‘Indi mahimo, ngaa bala magbaylo kami? Manginmatig-a sing ulo kami tanan kag manginmalaut, suno sa amon naluyagan.’”

13Ang Ginoo nagasiling, “Pamangkuta ang tanan nga mga pungsod kon ini nga butang nahanabo sang una. Ang mga tawo sang Israel naghimo sang makahuloya nga butang!

14Nagakawad-an bala ang batuhon nga mga bukid sang Libano sang yelo? Nagakamalhan bala ini sang matugnaw nga mga sapa sa kabukiran?

15Pero ang akon mga tawo nagkalimot sa akon, nagsunog sila sing mga insyenso sa mga diosdios. Nakasandad sila sa dalan nga ila dapat agyan, wala na sila nagasunod sa daan nga mga alagyan, kag nagalakat sila sa mga banas nga wala sing tanda.

16Ginhimo nila ining duta subong nga isa ka kahaladlukan, nga pagatamayon sa walay katapusan. Ang tanan nga nagaagi maurongan sang ila makita, magalungolungo sila sang ila mga ulo sa katingala.

17Paalaplaagon ko ang akon mga tawo sa atubang sang ila mga kaaway, subong sang yab-ok nga ginahuyop sang salatan. Talikdan ko sila, kag indi ko sila pagbuligan kon mag-abot ang kalalat-an.”

18Dayon ang mga tawo nagsiling, “Magplano kita batok kay Jeremias! May mga pari man sa gihapon nga magatudlo sa aton, mga mangin-alamon nga magalaygay sa aton, kag mga propeta nga magawali sang pulong sang Dios sa aton. Isumbong naton sia, kag indi na kita magpamati sa iya ginahambal.”

19Gani nagpangamuyo ako, “O Ginoo, pamatii ang akon ginasiling kag pamatii man ang ginasiling sang akon mga kaaway batok sa akon.

20Malaut bala ang bayad sang maayo? Pero nagkutkot sila sing buho agod mahulog ako. Dumdoma kon paano ako nagdangop sa imo kag nagpakitluoy tungod sa ila, agod indi ka magsilot sa ila sa imo kaakig.

21Pero karon, O Ginoo, pagutomi ang ila mga kabataan tubtob mapatay, kag ipapatay sila sa inaway. Itugot nga ang ila mga kababayin-an madulaan sing mga bana kag kabataan. Itugot nga ang mga kalalakin-an magakalamatay sa balatian, kag ang ila mga pamatan-on nga lalaki magakalamatay sa inaway.

22Padalhi sila sing mga tawo nga magakuha sang malahalon nga mga pagkabutang sang ila mga balay nga wala sing paandam. Pahibia sila sa kahadlok. Nagkutkot sila sing buho para sa akon agod mahulog ako, kag nagbutang sila sing mga siod sa pagdakop sa akon.

23Pero, O Ginoo, nahibaluan mo ang tanan nila nga mga pagplano sa pagpatay sa akon. Indi pagpatawara ang ila kalautan. Indi pagpanasa ang ila mga sala. Ipalutos sila kag siluti sila samtang ikaw nagakaakig.”

← Chapter 17 Jump to: Chapter 19 →