Jeremiah 32

Ilonggo (Maayong Balita nga Biblia (2012))

← Chapter 31 Jump to: Chapter 33 →

1Ang Ginoo naghambal sa akon sa ika-10 nga tuig nga si Sedequias amo ang hari sang Juda, nga amo man ang ika-18 nga tuig sang paggahom ni Haring Nabucodonosor sa Babilonia.

2Sa sadto nga tion ang mga hangaway sang hari sang Babilonia nagasalakay sang Jerusalem, kag nabilanggo ako sa sulod sang pasiyuhan sang palasyo.

3Ginpabilanggo ako didto ni Haring Sedequias, kag ginsumbong ako sa akon pagpahibalo nga ang Ginoo nagsiling, “Ipaagaw ko ini nga siudad sa hari sang Babilonia,

4kag si Haring Sedequias indi makapalagyo. Pagaitugyan sia sa hari sang Babilonia, magaatubang kag magahambal sia sa iya.

5Si Sedequias pagadalhon sa Babilonia, kag magapabilin sia didto tubtob nga silutan ko sia. Bisan pa nga magpakig-away sia sa mga taga-Babilonia, indi sia magdaog. Ako, ang Ginoo, naghambal sini.”

6Ang Ginoo nagsiling sa akon

7nga si Hanamel, anak sang akon tiyo nga si Salum, magaabot sa pagpangabay sa akon nga baklon ko ang iya uma sa Anatot sa kadutaan ni Benjamin, tungod kay ako amo ang iya pinakamalapit nga pariente, kag may kinamatarong ako sa pagbakal sini.

8Dayon, sang makasiling sini ang Ginoo, ang akon pakaisa nga si Hanamel nagpalapit sa akon didto sa pasiyuhan kag nagpangabay sa akon sa pagbakal sang uma. Dayon nahibaluan ko nga ang Ginoo naghambal gid sa akon sini.

9Gani, ginbakal ko ang uma kay Hanamel kag gintimbang ko ang kwarta nga akon inugbayad sa iya. Ang bili nakalambot sa desi siete ka bilog nga pilak.

10Ginpirmahan ko kag ginsilyuhan ang kasugtanan, ginpasaksihan ini sa mga tawo, kag gintimbang ang kwarta.

11Dayon ginkuha ko ang duha ka kopya sang kasugtanan sang pagbakal, ang naselyohan nga kopya nga may iya sini mga tulomanon; kag ang kopya nga wala masilyuhi.

12Ginhatag ko ini kay Baruc, anak ni Nerias kag apo ni Maseya. Ginhatag ko ini sa iya sa atubang ni Hanamel, sa atubang sang mga saksi nga nagpirma sang kasugtanan sang pagbakal, kag sa atubang sang tanan nga mga tawo nga nagapungko didto sa pasiyuhan.

13Sa atubang nila tanan nagsiling ako kay Baruc,

14“Ang Ginoo sang mga hangaway, ang Dios sang Israel, nagsugo sa imo sa pagkuha sini nga mga kasugtanan, ang naselyohan nga kopya sang pagbakal kag ang kopya nga wala masilyuhi, kag isulod mo ini sa tibod nga nahimo sa lunang, agod indi maano sa sulod sang palaabuton nga mga tinuig.

15Ang Ginoo sang mga hangaway, ang Dios sang Israel, nagsiling nga ang mga balay, ang mga uma kag ang mga talamnan sang ubas pagabaklon liwat sa sini nga duta.”

16Sa tapos ko mahatag ang kasugtanan sang pagbakal kay Baruc, anak ni Nerias, nagpangamuyo ako,

17“O Ginoo nga Gamhanan! Gintuga mo ang langit kag ang duta sa imo daku nga gahom kag kusog. Wala sing mabudlay nga butang para sa imo.

18Nagpakita ka sang imo mapinadayunon nga gugma sa linibo ka mga tawo, pero imo man ginasilutan ang mga tawo tungod sang mga sala sang ila mga ginikanan. Ikaw daku kag gamhanan nga Dios, ikaw amo ang Ginoo sang mga hangaway.

19Maayo ang imo mga plano, kag nagahimo ikaw sang gamhanan nga mga butang. Makita mo ang tanan nga ginahimo sang mga tawo, kag imo sila ginabalusan suno sa ila pagkabuhi kag ginahimo.

20Sang una, naghimo ikaw sing mga milagro kag katingalahan nga mga buhat sa duta sang Ehipto. Nagapadayon ikaw sa paghimo sini tubtob karon, sa Israel kag sa iban nga mga kapungsoran, sa bagay nga nakilala na ikaw sa bisan diin nga lugar.

21Paagi sa mga milagro kag katingalahan nga mga buhat nga nagpahadlok sa amon mga kaaway, gingamit mo ang imo gahom kag kusog sa pagpagwa sang mga Israelinhon nga imo mga tawo sa Ehipto.

22Ginhatag mo sa ila ining maayo kag mapatubason nga duta, suno sa imo ginsaad sa ila mga katigulangan.

23Pero sang pag-abot nila sa sini nga duta kag ila ini ginpanag-iyahan, wala nila gintuman ang imo mga sugo ukon nagkabuhi sila suno sa imo pagtudlo. Wala nila gintuman ang ginsugo mo nga himuon nila. Gani, ginpadalhan mo sila sini nga mga kalaglagan.

24“Ang mga taga-Babilonia naghimo sing mga trinsera sa palibot sang siudad sa pag-agaw sini, kag nagasalakay sila. Tungod sang inaway, gutom, kag balatian ang siudad mahulog sa ila mga kamot. Nakita mo nga ang tanan nga imo ginsiling nanginmatuod.

25Pero, O Ginoo nga Gamhanan, ikaw ang nagsugo sa akon sa pagbakal sang uma sa atubang sang mga saksi, bisan pa nga ang siudad madali na lang maagaw sang mga taga-Babilonia.”

26Dayon ang Ginoo nagsiling sa akon,

27“Ako amo ang Ginoo, ang Dios sang tanan nga mga tawo. Wala sing mabudlay nga butang para sa akon.

28Gani, itugyan ko ini nga siudad kay Haring Nabucodonosor sang Babilonia kag sa iya mga hangaway; ila ini agawon

29kag ila ini sunogon. Sunogon nila ini lakip ang mga balay sa diin ginpaakig ako sang mga tawo paagi sa ila pagsunog sing insyenso kay Baal sa mga atop, kag paagi sa pag-ula sang mga halad nga bino sa iban nga mga dios.

30Sa ginsugoran gid sang ila maragtas, ang mga tawo sang Israel kag ang mga tawo sang Juda naghimo sang mga butang nga wala ko maluyagi kag nagpaakig ini sa akon.

31Ang mga tawo sini nga siudad nagpaakig kag nagpasilabo sa akon, halin sang pagtukod sini. Nagpamat-od ako nga laglagon ini,

32tungod sang tanan nga kalautan nga ginhimo sang mga tawo sang Juda kag Jerusalem, upod sa ila mga hari kag mga pangulo, upod sa ila mga pari kag mga propeta.

33Gintalikdan nila ako, kag bisan nagpadayon ako sa pagtudlo sa ila, indi sila magpamati kag magpatudlo.

34Nagbutang pa gani sila sang ila makangilil-ad nga mga diosdios sa Templo nga ginpatindog para sa akon kag ila ini gindagtaan.

35Nagpatindog sila sing mga altar kay Baal sa Kapatagan sang Hinom, sa paghalad sang ila mga anak nga lalaki kag babayi sa dios nga si Moloc. Wala ko sila ginsugo sa paghimo sini, kag wala gani mag-abot sa akon panghunahuna nga himuon nila ini nga butang, agod magpakasala ang mga tawo sang Juda.”

36Ang Ginoo, ang Dios sang Israel, nagsiling sa akon, “Jeremias, singganan mo ang mga tawo nga tungod sang inaway, gutom kag mga balatian ini nga siudad mahulog sa kamot sang hari sang Babilonia. Karon, pamatii pa gid ang akon inugsiling.

37Pagatipunon ko ang mga tawo gikan sa mga kapungsoran sa diin ginpaalaplaag ko sila tungod sang akon kaakig kag kasingkal, kag akon sila pabalikon sa sini nga lugar, kag paestaron diri nga wala sing katalagman.

38Dayon sila mangin-akon mga tawo, kag ako mangin-ila Dios.

39Hatagan ko sila sing isa lamang ka tinutuyo sa ila pagkabuhi: nga sila magpasidungog sa akon sa tanan nga tion, para sa ila kaugalingon nga kaayuhan, kag sa kaayuhan sang ila mga kaliwat.

40Magahimo ako sa ila sing kasugtanan nga wala sing katapusan. Indi gid ako mag-untat sa paghimo sing maayo nga mga butang sa ila, kag himuon ko nga magkahadlok sila sa akon sa ila bug-os nga tagipusoon, agod nga indi na gid sila magbiya sa akon.

41Magakalipay ako sa paghimo sing maayo nga mga butang para sa ila, kag paestaron ko sila sing malig-on sa sini nga duta.

42“Subong nga ginpadala ko ining kalalat-an sa sini nga mga tawo, subong man hatagan ko sila sang tanan nga maayo nga mga butang nga akon ginsaad.

43Ang mga tawo nagsiling nga ini nga duta manginkaangay sang isa ka desierto nga wala sing may nagaestar nga mga tawo ukon mga sapat, kag itugyan ini sa mga taga-Babilonia. Pero ang mga kaumhan pagabaklon liwat sa sini nga duta.

44Ang mga tawo magabakal sini, kag ang mga kasugtanan pagapirmahan, pagasilyuhan kag pagasaksihan. Pagahimuon ini sa kadutaan ni Benjamin, sa mga barangay sa palibot sang Jerusalem, sa mga kabanwahanan sang Juda, kag sa mga banwa sa kabukiran, sa mga banwa sa kunsaran sang bakulod, kag sa nabagatnan nga bahin sang Juda. Pabalikon ko ang mga tawo sa ila duta. Ako, ang Ginoo, naghambal sini.”

← Chapter 31 Jump to: Chapter 33 →