Jeremiah 42

Ilonggo (Maayong Balita nga Biblia (2012))

← Chapter 41 Jump to: Chapter 43 →

1Dayon ang tanan nga mga pangulo sang hangaway, lakip si Johanan, anak ni Karea kag si Azarias, anak ni Hosaya nag-abot upod sa nagakalainlain nga mga tawo,

2kag nagsiling sa akon, “Kon mahimo tumana ang amon ginapangayo sa imo! Pangamuyo ka sa Ginoo nga aton Dios para sa amon. Pangamuyo ka para sa amon nga nabilin. Sang una madamo kami, pero sa makita mo karon, diutay na lang kami nga nabilin.

3Pangamuyo ka nga ang Ginoo nga aton Dios magapakita sa amon sang dalan nga amon pagaagyan kag kon ano ang amon dapat himuon.”

4Nagsabat ako, “Maayo man. Mangamuyo ako sa Ginoo nga aton Dios, suno sa inyo ginpangabay, kag kon ano ang iya isiling, sugiran ko kamo. Indi ko pag-ilikom sa inyo ang bisan ano.”

5Dayon nagsiling sila sa akon, “Kabay nga ang Ginoo manginmatuod kag matutom nga saksi batok sa amon, kon indi kami magtuman sang tanan nga mga sugo nga ihatag sang Ginoo nga amon Dios sa imo para sa amon.

6Bisan maayo ukon malain para sa amon, tumanon namon ang Ginoo nga aton Dios. Magpangamuyo ikaw sa iya suno sa amon pangabay. Ang tanan manginmaayo para sa amon, kon tumanon namon sia.”

7Sa tapos ang napulo ka adlaw, ang Ginoo naghambal sa akon.

8Gani ginpatawag ko sing tingob si Johanan, ang tanan nga mga pangulo sang hangaway nga nag-upod sa iya, kag ang iban pa gid nga mga tawo.

9Ginsingganan ko sila, “Ang Ginoo, ang Dios sang Israel, nga sa iya ginpadala ninyo ako tungod sa inyo pagpangabay nagsiling,

10‘Kon luyag kamo magpadayon sa pag-estar sa sini nga duta, patindugon ko kamo liwat, kag indi pagpukanon. Itanom ko kamo kag indi paggabuton. Ang kalaglagan nga ginpadala ko sa inyo naghatag gid sa akon sing daku nga kalisod.

11Indi na kamo magkahadlok sa hari sang Babilonia. Ako magaupod sa inyo, kag luwason ko kamo sa iya gahom.

12Tungod kay ako maluloy-on himuon ko nga sia magakaluoy sa inyo kag papaulion niya kamo.’ Ako ang Ginoo naghambal sini.

13“Pero kamo nga mga tawo nga nabilin sa Juda dapat magtuman sa Ginoo nga inyo Dios kag indi na kamo mag-estar sa sini nga duta. Indi kamo magsiling nga ‘Indi! Malakat kami kag mag-estar sa Ehipto sa diin indi na kami masakpan sang inaway, ukon makabati sang pagpanawag sa inaway, ukon magutoman.’ Kon magsiling kamo sini, dayon ang Ginoo sang mga hangaway, ang Dios sang Israel, nagasiling, ‘Kon nakapamat-od na gid kamo sa paglakat kag pag-estar didto sa Ehipto,

16dayon ang inaway nga inyo ginakahadlukan magaabot sa inyo, kag ang gutom nga inyo ginakakugmatan magasunod sa inyo, kag didto kamo magakalamatay sa Ehipto.

17Ang tanan nga mga tawo nga nagpamat-od sa paglakat kag pag-estar sa Ehipto mapatay sa inaway, ukon sa gutom, ukon sa balatian. Wala sing bisan isa sa ila nga mabuhi, wala sing isa nga makapalagyo sa kalalat-an nga akon ipadala sa ila.’

18“Ang Ginoo, ang Dios sang Israel, nagasiling, ‘Subong nga gin-ula ko ang akon kaakig kag pagbalingaso sa mga tawo sang Jerusalem, iula ko man ang akon pagbalingaso sa inyo kon magkadto kamo sa Ehipto. Ang mga tawo makibot sa pagtan-aw sa inyo, yagutaon nila kamo kag gamiton ang inyo ngalan subong pagpakamalaut. Indi na kamo makakita liwat sini nga lugar.’”

19Nagpadayon ako sa pagsiling, “Ang Ginoo nagasugo sa inyo nga mga nabilin sa Juda nga indi kamo magkadto sa Ehipto. Gani ginapaandaman ko kamo karon

20nga nagahimo kamo sang isa ka daku nga sayop. Nagpangabay kamo nga magpangamuyo ako sa Ginoo nga aton Dios para sa inyo, kag nagsaad kamo nga tumanon ninyo ang tanan nga iya ginasugo.

21Karon ginasugiran ko kamo, pero wala ninyo gintuman ang tanan nga ginsugo sa akon sang Ginoo nga aton Dios nga isiling sa inyo.

22Gani karon, dumdoma ninyo ini: mapatay kamo sa inaway, ukon sa gutom, ukon sa balatian sa duta, sa diin luyag kamo magkadto kag mag-estar.”

← Chapter 41 Jump to: Chapter 43 →