Jeremiah 44

Ilonggo (Maayong Balita nga Biblia (2012))

← Chapter 43 Jump to: Chapter 45 →

1Ang Ginoo naghambal sa akon nahanungod sa tanan nga mga Israelinhon nga nagaestar sa Ehipto, sa mga siudad sang Migdol, sa Tapanes, kag sa Memfis, kag sa bagatnan nga bahin sang pungsod.

2Ang Ginoo sang mga hangaway, ang Dios sang Israel, nagsiling, “Kamo mismo nakakita sang kalaglagan nga akon ginpadala sa Jerusalem kag sa tanan nga mga siudad sang Juda. Bisan tubtob karon yara pa ini sa kalaglagan, kag wala sing may nagaestar sa sini

3tungod kay ang mga pumoluyo sini naghimo sing malaut nga mga butang kag nagpaakig sa akon. Nagdulot sila sing mga halad sa iban nga mga dios kag nag-alagad sa mga dios nga bisan sila ukon kamo ukon ang inyo mga katigulangan wala magsimba.

4Nagpadayon ako sa pagpadala sa inyo sang akon mga alagad nga mga propeta, nga nagsiling sa inyo nga indi ninyo paghimuon ining makangilil-ad nga butang nga akon ginadumtan.

5Pero indi kamo magpati ukon magpamati. Indi kamo magbiya sang inyo malaut nga ginahimo sa paghalad sa iban nga mga dios.

6Gani gin-ula ko ang akon kaakig kag kasingkal sa mga kabanwahanan sang Juda kag sa mga dalan sang Jerusalem, kag ginsunog ko ang mga ini. Nalaglag sila kag makahaladlok tan-awon, tubtob karon nga adlaw.

7“Gani, ako, ang Ginoo sang mga hangaway, ang Dios sang Israel, nagapamangkot karon kon ngaa ginhimo ninyo ining malaut nga butang sa inyo kaugalingon. Luyag bala kamo magdala sing kalaglagan sa mga lalaki kag mga babayi, sa mga kabataan kag mga lapsag, agod nga wala na sing may mabilin sa inyo?

8Ngaa ginpaakig ninyo ako paagi sa inyo pagsimba sa mga diosdios kag paagi sa paghalad sa iban nga mga dios diri sa Ehipto, sa diin nagkadto kamo sa pag-estar? Ginahimo bala ninyo ini sa paglaglag sang inyo kaugalingon agod nga ang tagsa ka pungsod sa duta magayaguta sa inyo kag magagamit sang inyo ngalan subong pagpakamalaut?

9Nalimtan bala ninyo ang tanan nga malaut nga mga butang nga nahimo sa mga kabanwahanan sang Juda kag sa mga dalan sang Jerusalem sang inyo mga katigulangan, sang mga hari sang Juda kag sang ila mga asawa, kag ninyo kag sang inyo mga asawa?

10Pero tubtob karon nga adlaw wala gid kamo magpaubos sang inyo kaugalingon. Wala kamo magpasidungog sa akon, ukon magkabuhi suno sa tanan nga mga kasugoan nga akon ginhatag sa inyo kag sa inyo mga katigulangan.

11“Gani ako, ang Ginoo sang mga hangaway, ang Dios sang Israel, magapadala sa inyo sing kalaglagan, kag magalaglag sang bug-os nga Juda.

12Nahanungod sa mga tawo sang Juda nga nabilin kag nagpamat-od sa paglakat kag sa pag-estar sa Ehipto, pat-uron ko nga sila tanan malaglag. Tanan sila, dalagku kag magagmay, mapatay sa Ehipto, sa inaway ukon sa gutom. Manginmakahaladlok sila tan-awon. Ang mga tawo magayaguta sa ila kag maggamit sang ila ngalan subong pagpakamalaut.

13Silutan ko ang mga nagaestar sa Ehipto, subong nga ginsilutan ko ang Jerusalem, paagi sa inaway, sa gutom, kag sa balatian.

14Wala sing tawo sang Juda nga nabilin kag nagkadto sa pag-estar sa Ehipto nga makapalagyo ukon mabuhi. Wala gid sing bisan isa sa ila nga magabalik sa Juda, sa diin magahandom sila sa pagkabuhi liwat. Wala gid sing may makabalik luas sa pila nga nakapalagyo.”

15Dayon ang tanan nga mga lalaki nga nakahibalo nga ang ila mga asawa nagdulot sing mga halad sa iban nga mga dios, kag ang tanan nga mga babayi nga nagatindog didto, lakip ang mga Israelinhon nga nag-estar sa nabagatnan nga bahin sang Ehipto—isa ka daku nga hubon sang mga tawo—nagsiling sa akon,

16“Indi kami magpamati sa ginasugid mo sa amon sa ngalan sang Ginoo.

17Himuon namon ang tanan nga ginsiling namon nga himuon. Magadulot kami sang mga halad sa amon diosa, ang Rayna sang Langit, kag magaula kami sang mga dulot nga ilimnon sa iya, subong nga kami kag ang amon mga katigulangan, ang amon hari kag ang amon mga pangulo, naanad na sa paghimo sini sa mga kabanwahanan sang Juda kag sa mga dalan sang Jerusalem. Dayon may madamo kami nga mga kalan-on, nagmainuswagon kami, kag wala sing mga palaligban.

18Pero sang pag-untat namon sa paghalad sa Rayna sang Langit kag sa amon pag-untat sa pagdulot sang mga halad nga ilimnon sa iya, nawad-an kami kag ang amon mga tawo napatay sa inaway kag sa gutom.”

19Kag ang mga kababayin-an nagsiling pa gid, “Sang nagluto kami sang mga tinapay nga ang porma sini kaangay sang Rayna sang Langit, sang nagdulot kami sang mga halad sa iya, kag sang nag-ula kami sing mga halad nga ilimnon sa iya, ang amon mga bana nagpakamaayo sang amon ginahimo.”

20Dayon nagsiling ako sa tanan nga mga lalaki kag mga babayi nga nagsabat sa akon sing subong sini,

21“Nahanungod sa mga halad nga gindulot ninyo kag sang inyo mga katigulangan, sang inyo mga hari kag sang inyo mga pangulo, kag sang mga tawo sang duta sa mga kabanwahanan sang Juda kag sa mga dalan sang Jerusalem, nagahunahuna bala kamo nga ang Ginoo wala makahibalo sini ukon iya ini nalimtan?

22Karon gid nga adlaw ang inyo duta yara sa kalaglagan kag wala sing may nagaestar sa sini. Nanginmakahaladlok ini tan-awon kag ang mga tawo nagagamit sang iya sini ngalan subong isa ka pagpakamalaut tungod kay ang Ginoo indi na makabatas sang inyo malaut kag malain nga ginahimo.

23Ini nga kalaglagan nag-abot sa inyo sa sini nga adlaw tungod kay nagdulot kamo sing mga halad sa iban nga mga dios kag nagpakasala kamo batok sa Ginoo, paagi sa inyo paglapas sang tanan niya nga mga sugo.”

24Ginsingganan ko ang tanan nga mga tawo, ilabi na ang mga kababayin-an sang ginsiling sang Ginoo sang mga hangaway, ang Dios sang Israel, “Kamo nga mga tawo sang Juda nga nagaestar sa Ehipto kag ang inyo mga asawa nagsaad sa Rayna sang Langit sa pagdulot sing mga halad sa iya kag sa pagdulot sing mga halad nga ilimnon, kag gintuman ninyo ang inyo mga saad. Maayo gid! Tumana ninyo ang inyo mga saad kag mga sumpa!

26Pero karon pamatii ako, ang Ginoo, nga naghimo sang saad sa akon gamhanan nga ngalan sa tanan nga mga Israelinhon sa Ehipto: Indi na gid ako magtugot nga ang bisan isa sa inyo maggamit sang akon ngalan sa paghimo sing saad nga nagasiling, ‘Nagasumpa ako sa ngalan sang Ginoo nga Gamhanan!’

27Pat-uron ko nga indi kamo mag-uswag, kundi malaglag. Tanan kamo nga mga tawo sang Juda nga nagaestar sa Ehipto mapatay, ayhan sa inaway ukon balatian, tubtob nga wala gid sing isa nga mabilin sa inyo.

28Pero ang pila sa inyo indi mapatay, kag makabalik sa Juda halin sa Ehipto. Dayon ang nabilin nga buhi makahibalo kon kay sin-o mga pulong ang nanginmatuod, ang akon ukon ang ila mga pulong.

29Ako, ang Ginoo, magahatag sa inyo sining tanda nga silutan ko kamo sa sini nga lugar, kag ang akon saad sa pagpadala sing kalaglagan sa inyo manginmatuod.

30Itugyan ko si Haring Hofra sang Ehipto sa iya mga kaaway nga luyag magpatay sa iya, subong nga gintugyan ko si Haring Sedequias sang Juda kay Haring Nabucodonosor sang Babilonia nga iya kaaway kag luyag magpatay sa iya.”

← Chapter 43 Jump to: Chapter 45 →