Jeremiah 34

Ilonggo (Maayong Balita nga Biblia (2012))

← Chapter 33 Jump to: Chapter 35 →

1Ang Ginoo naghambal sa akon sang si Haring Nabucodonosor sang Babilonia kag ang iya mga hangaway, nga nabuligan sang mga tropa gikan sa tanan nga mga kapungsoran kag mga kaliwatan nga sakop niya, nagasalakay sang Jerusalem kag sang iya sini palibot nga mga kabanwahanan.

2Ang Ginoo, ang Dios sang Israel, nagsugo sa akon sa paglakat kag sa pagsiling kay Haring Sedequias sang Juda, “Ako, ang Ginoo, magatugyan sini nga siudad sa hari sang Babilonia, kag iya ini pagasunogon.

3Indi ka makapalagyo. Pagadakpon ka kag itugyan sa iya. Magaatubangay kamo kag magahambal ka sa iya. Dayon pagadal-on ka sa Babilonia.

4Sedequias, pamati ka sa akon ginasiling nahanungod sa imo. Indi ka mapatay sa inaway.

5Mapatay ka sa paghidait, kag subong nga ang mga tawo nagsunog sing insyenso sang paglubong nila sang inyo mga katigulangan, nga mga hari nga una sa imo, sila man magasunog sing mga insyenso para sa imo. Magalalaw sila sa imo kag magasiling, ‘Ang amon hari patay na!’ Ako, ang Ginoo, naghambal sini.”

6Dayon ginsugid ko ini nga mga pulong kay Haring Sedequias sa Jerusalem,

7samtang ang mga hangaway sang hari sang Babilonia nagasalakay sang siudad. Ang mga hangaway nagasalakay man sang Lakis kag Aseka, ang nabilin nga mga siudad sang Juda nga napamakuran.

8Si Haring Sedequias kag ang mga tawo sang Jerusalem naghimo sing kasugtanan sa paghilway

9sang ila mga ulipon nga Hebreo nga lalaki kag babayi, agod nga wala sing isa nga may ulipon nga kapareho niya nga Israelinhon.

10Kag ang tanan nga mga tawo kag ang ila mga pangulo nagpasugot sa paghilway sang ila mga ulipon, kag indi na gid mag-ulipon sa ila liwat. Ginhilway nila ang ila mga ulipon,

11pero sang ulihi nagbaylo ang ila mga panghunahuna kag ginpabalik sila, kag ginpilit nga mangin-ulipon liwat.

12Dayon ang Ginoo,

13ang Dios sang Israel, nagsugo sa akon sa paghambal sa mga tawo: “Naghimo ako sing kasugtanan sa inyo mga katigulangan sang pagluwas ko sa ila gikan sa Ehipto kag ginhilway sila sa pagkaulipon. Ginsingganan ko sila nga

14sa tagsa ka pito ka tuig dapat nila hilwayon ang isa ka Hebreo nga ulipon nga nakaalagad sa ila sa sulod sang anom ka tuig. Pero ang inyo mga katigulangan wala nagsapak ukon nagpamati sa akon ginsiling.

15Sang pila lang ka adlaw nga nagligad ginbayluhan ninyo ang inyo mga panghunahuna kag ginhimo ninyo ang akon nahamut-an. Tanan kamo nagkasugot sa paghilway sang inyo kapareho nga mga Israelinhon, kag naghimo kamo sing kasugtanan sa akon atubang, sa Templo sa diin ako ginasimba.

16Pero nagbaylo naman ang inyo mga panghunahuna kag wala ninyo ako ginpasidunggi. Tanan kamo naghupot liwat sang inyo mga ulipon nga inyo ginhilway suno sa ila naluyagan, kag inyo sila ginpilit nga mangin-ulipon ninyo liwat.

17Gani karon, ako, ang Ginoo, nagasiling nga wala ninyo ako gintuman. Wala ninyo ginhatagi ang inyo kapareho nga mga Israelinhon sing kahilwayan. Gani tungod sina, hatagan ko kamo sing kahilwayan: ang kahilwayan nga mapatay kamo paagi sa inaway, balatian kag gutom. Himuon ko nga ang tagsa ka pungsod sa kalibutan magakakugmat sa akon ginahimo sa inyo.

18Ang mga opisyales sang Juda kag sang Jerusalem, lakip ang mga opisyales sang palasyo, ang mga pari, kag ang tanan nga mga pangulo, naghimo sing kasugtanan sa akon paagi sa paglakat sa tunga sang ginpihak nga toro nga baka nga ila ginpihak sa duha ka bahin. Pero ginlapas nila ang kasugtanan nga ila ginhimo sa akon atubang kag wala nila gintuman ang mga tulomanon sini. Gani, himuon ko sa sini nga mga tawo ang ginhimo nila sa toro nga baka.

20Itugyan ko sila sa ila mga kaaway, nga luyag magpatay sa ila, kag ang ila mga bangkay pagakaunon sang mga pispis kag sang mga sapat sa talon.

21Itugyan ko man si Haring Sedequias sang Juda kag ang iya mga opisyales sa ila mga kaaway nga luyag magpatay sa ila. Itugyan ko sila sa mga hangaway sang Babilonia, nga nag-untat sa ila pagsalakay sa inyo.

22Magamando ako, kag magabalik sila sa sini nga siudad. Ila ini salakayon, agawon, kag sunogon. Himuon ko ang mga kabanwahanan sang Juda kaangay sang isa ka desierto nga wala sing may nagaestar. Ako, ang Ginoo, naghambal sini.”

← Chapter 33 Jump to: Chapter 35 →