Jeremiah 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1“Sa sadto nga panahon, ang mga tul-an sang mga hari kag sang mga opisyales sang Juda, subong man ang mga tul-an sang mga pari, sang mga propeta, kag sang iban nga mga tawo nga nag-estar sa Jerusalem, pagakalkalon sa ila mga lulobngan.

2Pagalaptahon ini sa atubangan sang adlaw, bulan kag mga bituon nga ila ginhigugma kag gin-alagad, nga ila ginpamangkutan kag ginsimba. Sa baylo nga tipunon ini kag ilubong, manginkaangay ini sang ipot nga nagalapta sa duta.

3Kag ang mga tawo nga mabilin sa sining malaut nga kaliwatan, nga nagaestar sa mga lugar sa diin ginlapta ko sila, magapasulabi nga mapatay sang sa magpadayon sa pagkabuhi. Ako, ang Ginoo sang mga hangaway, naghambal sini.”

4Ang Ginoo nagsugo sa akon sa pagsiling sa iya mga tawo, “Kon may mapukan, wala bala sia nagabangon? Kon may nagatalang, wala bala sia nagabalik?

5Ngaa bala, mga tawo ko, nga nagatalikod kamo kag wala nagabalik sa akon? Indi ninyo pagbayaan ang inyo mga diosdios, kag indi na kamo magbalik sa akon.

6Nagpamati ako sing maayo, pero wala kamo maghambal sing matuod. Wala sing bisan isa sa inyo nga naghinulsol tungod sang iya kalautan, wala sing bisan isa sa inyo nga nagpamangkot, ‘Ano nga malaut ang akon nahimo?’ Ang tagsatagsa nagpadayon sa iya pagginawi, kaangay sang isa ka kabayo nga nagahuganas pakadto sa inaway.

7Bisan pa ang tulabong nakahibalo kon tion na sa pagbalik, ang pating, ang salimbabatang, kag ang dugwak nakahibalo kon san-o ang tion sa pagsaylo. Pero, akon mga tawo, wala kamo makahibalo sang mga kasugoan nga paagi sini ginagamhan ko kamo.

8Paano bala ang pagsiling ninyo nga kamo mga maalam kag nahibal-an ninyo ang akon mga kasugoan? Tan-awa, ang mga kasugoan gin-islan sang indi masaligan nga mga escriba.

9Ang inyo maalam nga mga tawo nahuy-an, nagsalangisag sila kag nadakpan. Ginsikway nila ang akon mga pulong, ano karon nga kaalam ang yara sa ila?

10Gani, ihatag ko ang ila mga asawa sa iban nga mga tawo, kag ang ila mga uma sa bag-o nga mga tag-iya. Ang tagsatagsa, manggaranon kag imol, nagatinguha sa pagpangwarta sa indi maayo nga paagi. Bisan pa ang mga propeta kag ang mga pari nagadaya sa mga tawo.

11Ginabulong nila ang mga pilas sang akon mga tawo sing pasapayan lang. Nagasiling sila, ‘Maayo ang tanan,’ bisan pa nga ang tanan indi maayo.

12Mga tawo ko, nahuya bala kamo tungod kay ginhimo ninyo ining makangilil-ad nga mga butang? Wala! Wala gid kamo mahuya. Wala gani kamo nagapanghilawhilaw! Gani, mapukan kamo subong nga ang iban napukan, kon silutan ko kamo, matapos gid kamo. Ako, ang Ginoo, naghambal sini.

13“Luyag ko tipunon ang akon mga tawo kaangay sang mangungoma nga nagatipon sang iya patubas. Pero kaangay sila sang balagon nga wala sing ubas, kaangay sila sang kahoy nga higera nga wala sing mga higos, bisan ang mga dahon sini nalaya. Gani, tugotan ko ang mga tawo sa gwa sa pagpanag-iya sang duta.”

14Ang mga tawo sang Dios nagapamangkot, “Ngaa nagapanimuko pa kita? Dali, manago kita sa mga siudad nga nalibutan sing pader kag didto kita mapatay. Ang Ginoo nga aton Dios nagsilot sa aton agod mapatay, iya kita ginhatagan sing tubig nga may hilo agod imnon, tungod kay nagpakasala kita batok sa iya.

15Naghandom kita sang paghidait, kag tion sang pag-ayo pero wala ini pulos. Sa baylo sini nag-abot ang kakugmat.

16Ang aton mga kaaway nakalambot na sa siudad sang Dan, kag mabatian naton ang hirihiri sang ila mga kabayo. Ang bug-os nga duta nagakurog sang maghirihiri ang ila mga kabayo. Ang aton mga kaaway nag-abot sa paglaglag sang aton duta kag sang tanan nga yara sa sini, sang aton siudad kag sang tanan nga mga pumoluyo sini.”

17Ang Ginoo nagasiling, “Mag-andam kamo! Magapadala ako sa inyo sing mga man-og, mga man-og nga dalitan nga indi maanta, kag ila kamo buntogon.”

18Ang akon kalisod indi gid makuha. Nagakasakit ang akon tagipusoon.

19Pamati kamo! Sa bug-os nga duta nabatian ko ang akon mga tawo nga nagahinibi, “Wala na bala sa Sion ang Ginoo? Wala na bala dira ang hari sang Sion?” Ang Ginoo nga ila hari nagasabat, “Ngaa ginpaakig ninyo ako paagi sa inyo pagsimba sa mga diosdios kag sa inyo pagsaludo sa wala sing pulos nga dumoluong nga mga dios?”

20Ang mga tawo nagsinggit, “Nakaligad na ang tig-ilinit, natapos na ang ani, pero wala kami maluwas.”

21Ang akon tagipusoon nabuong tungod kay ang akon mga tawo nalaglag. Nagpangalisod ako, kag tuman gid ang akon pagkahadlok.

22Wala na bala sing bulong sa Galaad? Wala bala sing mga manugbulong didto? Ngaa bala wala mag-ayo ang akon mga tawo?

← Chapter 7 Jump to: Chapter 9 →