Jeremiah 38

Ilonggo (Maayong Balita nga Biblia (2012))

← Chapter 37 Jump to: Chapter 39 →

1Karon si Sefatias, anak ni Matan, si Gedalias nga anak ni Pasur, si Jucal nga anak ni Selemias kag si Pasur nga anak ni Malquias, nakabati nga ako nagsiling sa mga tawo nga

2ang Ginoo nagsiling, “Ang bisan sin-o nga nagapabilin sa siudad mapatay sa inaway, ukon gutom, ukon balatian. Pero ang bisan sin-o nga nagagwa kag nagaampo sa mga taga-Babilonia indi mapatay. Maluwas sia kag indi maano.”

3Naghambal man ako sa ila nga ang Ginoo nagsiling, “Itugyan ko ang siudad sa mga hangaway sang Babilonia, kag ila ini agawon.”

4Dayon ang mga opisyales nagkadto sa hari kag nagsiling, “Dapat patyon ini nga tawo. Sa iya paghambal sini, ang mga soldado sa siudad nagakadulaan sing kaisog, kag amo man ini ang iya ginahimo sa tagsatagsa nga nabilin sa siudad. Ini sia wala nagatinguha sa pagbulig sa mga tawo, kundi luyag lamang sia maghalit sa ila.”

5Si Haring Sedequias nagsabat, “Sigi, himua ninyo ang luyag ninyo himuon sa iya. Indi ako makapugong sa inyo.”

6Gani ginkuha nila ako kag gintunton sa bubon ni Prinsipe Malquias, nga yadto didto sa pasiyuhan. Wala sing tubig ang bubon, kundi lunang lamang, kag naglubong ako sa lunang.

7Pero si Ebedmelec nga Etiopiahanon, isa ka kapon nga tawo nga nagaobra sa palasyo sang hari, nakabati nga gintunton nila ako sa bubon. Sa sadto nga tion ang hari nagapakigsapol sa hukmanan sa Pwerta ni Benjamin.

8Gani si Ebedmelec nagkadto didto sa palasyo kag nagsiling sa hari,

9“Mahal nga hari, sayop ang ginhimo sini nga mga tawo. Gintunton nila si Jeremias sa bubon, sa diin pat-od gid nga mapatay sia sa gutom, kay wala na sing kalan-on sa siudad.”

10Dayon ginsugo sang hari si Ebedmelec sa pagdala sing tatlo ka mga tawo nga yadto didto kag sa pagbatak sa akon sa bubon sa wala pa ako mapatay.

11Gani gindala ni Ebedmelec ang mga tawo kag nagkadto sila sa talaguan sang mga pagkabutang sa palasyo, kag nagkuha sing daan nga mga bayu nga iya gintunton sa akon sa idalom sang bubon.

12Si Ebedmelec nagsiling sa akon nga ihapin ang mga lapat sa akon mga ilok agod nga ang kalat indi makasamad sa akon. Ginhimo ko ini,

13kag ginbatak nila ako paggwa sa bubon. Sa tapos ini, ginbutang ako sa pasiyuhan.

14Sang isa ka tion ginpatawag ako ni Haring Sedequias sa ikatlo nga pwertahan sa Templo, kag nagsiling, “Mamangkot ako sa imo, kag luyag ko nga magasugid ikaw sang bug-os nga kamatuoran.”

15Nagsabat ako, “Kon sugiran ko ikaw sang kamatuoran, ipapatay mo ako, kag kon laygayan ko ikaw, indi ikaw magpati sa akon.”

16Gani si Haring Sedequias nagsaad sa akon sa tago lamang. Nagsiling sia, “Nagasumpa ako sa Dios nga buhi, sa Dios nga naghatag sa aton sing kabuhi, nga indi ko ikaw pag-ipapatay, ukon pag-itugyan sa mga tawo nga luyag magpatay sa imo.”

17Dayon ginsugiran ko si Sedequias nga ang Ginoo, ang Dios sang mga hangaway, ang Dios sang Israel, nagsiling, “Kon mag-ampo ikaw sa mga opisyales sang hari sang Babilonia, maluwas ikaw, kag ini nga siudad indi pagsunogon. Ikaw kag ang imo panimalay maluwas.

18Pero kon indi ikaw mag-ampo, ti ini nga siudad pagaitugyan sa mga taga-Babilonia, nga magasunog sini, kag indi gid kamo makapalagyo sa ila.”

19Pero si Haring Sedequias nagsabat, “Nahadlok ako sa aton mga kasimanwa nga nagbuylog sa mga taga-Babilonia. Basi itugyan ako sa ila kag ila ako sakiton.”

20Nagsiling ako, “Indi ka pag-itugyan sa ila. Ginapangabay ko sa imo nga tumanon mo ang ginsiling sang Ginoo, kag ang tanan manginmaayo para sa imo, kag maluwas ang imo kabuhi.

21Pero ang Ginoo nagpakita sa akon sa isa ka palanan-awon kon ano ang matabo kon indi ikaw mag-ampo.

22Tan-awa! Ang tanan nga mga babayi nga nabilin sa palasyo sang hari sang Juda ginadala pa gwa sang mga opisyales sang hari sang Babilonia. Pamatii ang ila ginasiling samtang nagalakat sila: ‘Ang suod nga mga abyan sang hari nagpatalang sa iya, ila sia gindaog. Karon nga ang iya mga tiil naglubong sa lunang, ang iya mga abyan nagbiya sa iya.’”

23Dayon nagsiling pa gid ako, “Ang tanan nimo nga mga asawa kag mga kabataan pagadalhon sang mga taga-Babilonia, kag ikaw mismo indi makapalagyo sa ila. Pagadalhon ikaw subong binilanggo sang hari sang Babilonia, kag ini nga siudad pagasunogon.”

24Si Sedequias nagsabat, “Indi pagpahibalua ang bisan sin-o sining aton ginhambalan, kag ang imo kabuhi indi mabutang sa katalagman.

25Kon ang mga opisyales makabati nga ako nagpakighambal sa imo, magaabot sila kag magapamangkot sa imo kon ano ang aton ginhambalan. Magasaad sila nga indi nila ikaw pagpatyon kon sugiran mo sila sang tanan.

26Sugiri lang sila nga nagpakitluoy ka sa akon nga indi ko ikaw pagpabalikon sa balay ni Jonatan agod mapatay didto.”

27Dayon ang tanan nga mga opisyales nagkadto sa akon kag nagpamangkot kag ginsugiran ko sila sang ginsiling sa akon sang hari nga isugid. Wala sila sing may mahimo, tungod kay wala sing may nakabati sang amon ginhambalan.

28Kag ginbilanggo ako sa pasiyuhan sang palasyo tubtob sa adlaw nga gin-agaw ang Jerusalem.

← Chapter 37 Jump to: Chapter 39 →