Jeremiah 31

Ewe 2014 (EƲEGBE BIBLIA)

← Chapter 30 Jump to: Chapter 32 →

1Aƒetɔ be: “Ɣe ma ɣi la, manye Mawu na Israel-ƒomeawo katã, eye woawo anye nye dukɔ.”

2Aƒetɔ be: “Dukɔ si tsi agbe tso yi nu kpɔ amenuveve le gbedadaƒo. Esime Israel nɔ gbɔɖemeƒe dim la,

3Aƒetɔ ɖe eɖokui fiae le didiƒe. Melɔ̃ wò kple lɔlɔ̃ mavɔ, eya tae meyi edzi le nuteƒe wɔm na wò ɖo.

4Israel, ɖetugbi leaƒe, matso wò, eye nànye du si wotso nyateƒe. Àgatsɔ wò asiʋuiwo age ɖe tò me anɔ dzidzɔkpɔlawo dome aɖu ɣe.

5Àgade waingble ɖe Samaria-towo ŋu, agblea delawo ado nu, eye woaɖu eƒe kutsetse.

6Elabe ɣeyiɣi aɖe gbɔna esi dzi gbetakpɔlawo ado ɣli le Efrayim-towo dzi be: ‘Mitso, mina míayi Zion ɖe Aƒetɔ, mía Mawu la gbɔ!’ ”

7Elabe Aƒetɔ be: “Midzi ha sesĩe kple dzidzɔ na Yakob, eye mitso aseye ɖe dukɔwo ƒe tatɔ ŋu! Miɖe gbeƒã, mikafui, eye migblɔ be: ‘Aƒetɔ xɔ eƒe dukɔ ɖe agbe! Exɔ na Israelvi siwo susɔ la!’

8Kpɔ ɖa, makplɔ wo tso dzigbemenyigbawo dzi agbɔe. Maƒo wo nu ƒu tso keke didiƒewo ʋĩi ke le anyigba dzi vɛ. Ŋkunɔwo, xɔdrɔ̃wo, funɔwo, nyɔnu siwo le ku lém gɔ̃ hã anɔ wo dome! Wo katã anɔ hame hoo atrɔ gbɔ va afii.

9Woanɔ avi dzi ava, eye woanɔ koko ƒom makplɔ wo vɛ. Makplɔ wo to mɔ dzɔdzɔe dzi ayi tɔʋuwo to; womakli nu o, elabe tɔ́e menye na Israel, eye Efrayim nye vinye ŋgɔgbea.”

10“Dukɔwo, mise Aƒetɔ ƒe nya! Miɖe gbeƒãe le ƒutanyigbawo dzi le didiƒe ʋĩi be: ‘Eya, ame si kaka Israel hlẽ la, agaƒo enu ƒu, eye wòakpɔ edzi abe ale si alẽkplɔla kpɔa eƒe alẽhawo dzii ene.’

11Elabe Aƒetɔ xɔ Yakob ƒle tso aboyo me heɖee tso asi si sẽ wui la me.

12Woava dzi ha sesĩe kple dzidzɔ le Zion-togbɛ la dzi, eye dzi adzɔ wo le nu nyui si Aƒetɔ wɔ la ŋu. Woakpɔ dzidzɔ le lu, wain kple ami, alẽviwo ƒe ha kple nyihawo ŋu. Woanɔ agbe abe abɔ si wode tsii ene, eye womagaxa nu azɔ o.

13Ekema ɖetugbiwo akpɔ dzidzɔ aɖu ɣe; ɖekakpuiwo kple ame tsitsiwo atso aseye. Matrɔ woƒe nuxaxa wòazu dzidzɔ. Mafa akɔ na wo, eye mana woakpɔ dzidzɔ ɖe konyifafa teƒe.

14Mana nuɖuɖu nasu nunɔlawo ƒe luʋɔ, eye maɖi ƒo na nye dukɔ kple nye nu nyui geɖe.” Aƒetɔ lae gblɔe.

15Aƒetɔ be: “Gbe aɖe le ɖiɖim le Rama. Konyifafa kple avifafa kutɔkutɔ ƒe gbee. Raxel ye le fafam na viawo, eye wògbe be womegafa akɔ na ye le ɖeviawo ta o elabe womegali o.”

16Aƒetɔ be: “Dzudzɔ avia fafa, nàtutu ŋkume elabe woaxe dɔ si nèwɔ la ƒe fetu na wò, Aƒetɔ lae gblɔe, eye woagatrɔ gbɔ tso futɔwo ƒe anyigba dzi.

17Mɔkpɔkpɔ li na wò le etsɔ me, Aƒetɔ lae gblɔe, eye viwòwo agatrɔ va woawo ŋutɔ wo de.

18Mese Efrayim xa nu be: ‘Èhe to nam, eye mebɔbɔ ɖokuinye xɔe kpoo. Mele abe nyivi si womemla o ene. Gakplɔm gbɔe, ne magatrɔ ɖe ŋuwò, elabe wòe nye Aƒetɔ, nye Mawu.

19Elabe esi meɖe ɖa le ŋuwò la, metrɔ dzime. Esi medze si nu si mewɔ la, meƒo aklito. Ŋu kpem, eye gbɔgblɔ bu ɖem, elabe nye ɖekakpuime ŋukpenanuwo zu ŋukpe nam.’

20Ɖe Efrayim nye vinye ŋutsu lɔlɔ̃a? Eyae nye vinye si gbɔ nyemelɔ̃a nu le oa? Elabe zi ale si menyale nya aɖe gblɔm ɖe eŋu ko la, meɖoa ŋku edzi kokoko. Eya ta nye dzi le edim vevie; makpɔ nublanui nɛ godoo,” Aƒetɔ lae gblɔe.

21“Fɔ kpewo ɖo ɖe mɔ to na ɖokuiwò nàtsɔ de dzesi mɔ lae. Tu dzesidenu siwo akpe ɖe ŋuwò la ɖi. Lé ŋku ɖe mɔ gã si nèto yi la ŋu. Israel ɖetugbi leaƒe, trɔ gbɔ, trɔ gbɔ va mia dedu siawo me.

22Vinyɔnu mawɔnuteƒe, ɣe ka ɣi nàtsa tsa glãla ase ɖo? Elabe Aƒetɔ wɔ nu yeye aɖe ɖe anyigba dzi: nyɔnu le ŋutsu ta ʋlim.”

23Aƒetɔ, Aʋakɔwokplɔla, Israel ƒe Mawu la be: “Ne megaɖo dukɔ la ƒe nunyonamewo te la, woagawɔ nyagbɔgblɔ sia ŋudɔ le Yuda-nyigba dzi kple eƒe duwo me be: ‘Aƒetɔ ayra wò, wò nu dzɔdzɔe wɔƒe! Wò togbɛ kɔkɔe!’

24Amewo anɔ Yuda kple eƒe duwo katã me. Agbledelawo kple ame siwo ʋuna kple woƒe lãhawo tso teƒe yi teƒe la hã akpe ɖe wo ŋu.

25Elabe mana ŋusẽ naɖo ame siwo ŋu ɖeɖi te la ŋu, eye manyi ame siwo katã dɔ le wuwum la.”

26Afi mae menyɔ le, eye mekpɔ be alɔ̃ vivi nam.

27Aƒetɔ be: “Kpɔ ɖa, ɣeyiɣi gbɔna, esime mana amegbetɔwo kple lãwo nadzi ɖe Israel-nyigba kple Yuda-nyigba dzi fũu abe nukuwo meƒã ene.

28Ava eme be ale si menɔ ŋute ɖe wo ŋu be maho wo, agbã wo, aɖe wo ɖa, atsrɔ̃ wo, eye mana vɔ̃ nadzɔ ɖe wo dzi la, nenema ke maganɔ ŋudzɔ ɖe wo ŋu be matu wo, eye mado woe. Aƒetɔ lae gblɔe.

29Le ɣe ma ɣi la, womagblɔ be: ‘Vi tɔ́wo ɖu waintsetse hɔhlɔ̃e, aɖu nyɔ viwo’ o.

30Ke ame sia ame aku ɖe eya ŋutɔ ƒe nuvɔ̃ si wòwɔ la ta; ame sia ame si ɖu waintsetse hɔhlɔ̃e la, eyae aɖu anyɔ.

31Aƒetɔ be: Kpɔ ɖa, ɣeyiɣi gbɔna, esime mabla nu yeye kple Israel ƒe aƒe kple Yuda ƒe aƒe.

32Eya manɔ abe esi mebla kple wo tɔgbuiwo esime melé woƒe alɔnu hekplɔ wo tso Egipte-nyigba dzi la ene o; nye nubabla si wotu togbɔ be menɔ na wo abe srɔ̃ŋutsu ene hã. Aƒetɔ lae gblɔe.

33Ke Aƒetɔ be: Nu, si mele babla ge kple Israel-dukɔ le ŋkeke mawo megbe lae nye esi: Matsɔ nye se la ade wo me, eye maŋlɔe ɖe woƒe dzi ŋu. Manye woƒe Mawu, eye woawo anye nye dukɔ.

34Ame aɖeke magafia nu ehavi alo agblɔ na nɔvia be: ‘Dze si Aƒetɔ’ o, elabe ame sia ame adze sim tso ame gblɔewo dzi va se ɖe ame ŋkutawo dzi; elabe matsɔ woƒe nuvɔ̃ɖi wɔwɔ ake wo, eye nyemagaɖo ŋku woƒe nuvɔ̃ dzi o.” Aƒetɔ lae gblɔe.

35Aƒetɔ, ame si na ŋusẽ ɣe be wòaklẽ le ŋkeke me, eye wòɖoe na ɣleti kple ɣletiviwo be woaklẽ le zã me; eya ame si blua atsiaƒu ale be eƒe tsotsoewo dzea agbo, ame si ŋkɔe nye Aƒetɔ, Aʋakɔwokplɔla la, be:

36“Ne ɖoɖo matrɔmatrɔ sia trɔ le ŋkunye me la, ekema Israel ƒe dzidzime aɖeke hã maganɔ anyi abe dukɔ ene le ŋkunye me akpɔ gbeɖe o.” Aƒetɔ lae gblɔe.

37Aƒetɔ be: “Ne woate ŋu adzidze dziƒowo le dzime, eye woate ŋu atsa le anyigba ƒe gɔmeɖoɖowo ŋu le to me kpɔ la, ekema magbe Israel ƒe dzidzimeviwo katã le nu siwo katã wowɔ la ta.” Aƒetɔ lae gblɔe.

38Aƒetɔ be: “Kpɔ ɖa, ɣeyiɣi gbɔna, esime woagbugbɔ du la atso na Aƒetɔ. Atso Xananel ƒe xɔ tsrala la gbɔ va se ɖe Dzogoegbo la nu.

39Liƒoa azɔ tso afi ma le ɣetoɖoƒe ato Gareb ƒe togbɛ dzi tẽe, eye wòanye kpò aɖo ta Goa.

40Bali si me woɖia ame ɖo, afi si woƒoa ƒu dzowɔ hã ɖo kple agble siwo katã le afi ma yi ɖake ɖe Kidron-tɔʋu la nu va do ɖe Sɔgbo la ƒe dzogoe dzi la, anɔ kɔkɔe na Aƒetɔ. Womagagblẽ dua alo agbãe akpɔ gbeɖe o.”

← Chapter 30 Jump to: Chapter 32 →

Recommended Reading

Commentary Jeremiah Commentaries → Devotional Jeremiah Devotional Guide → Get This Bible Ewe (EƲEGBE BIBLIA) Study Bible →