Isaiah 11

Lao Bible 2012 (ພຣະຄຳພີສັກສິ)

← Chapter 10 Jump to: Chapter 12 →

1ເຊື້ອວົງຂອງກະສັດດາວິດເປັນດັ່ງກົກໄມ້ທີ່ຖືກປໍ້າລົງແລ້ວ, ແຕ່ຍັງມີກິ່ງເກີດອອກມາຈາກຕໍນັ້ນສັນໃດ ກໍຈະມີກະສັດອົງໃໝ່ ເກີດຂຶ້ນມາຈາກເຊື້ອສາຍຂອງດາວິດສັນນັ້ນ.

2ພຣະວິນຍານຂອງພຣະເຈົ້າຢາເວຈະຊົງສະຖິດຢູ່ກັບເພິ່ນ, ວິນຍານແຫ່ງສະຕິປັນຍາ ວິນຍານແຫ່ງຄວາມເຂົ້າໃຈ. ວິນຍານແຫ່ງທີ່ປຶກສາ ວິນຍານແຫ່ງຣິດອຳນາດ ວິນຍານແຫ່ງຄວາມຮູ້ ວິນຍານແຫ່ງການຢຳເກງພຣະເຈົ້າຢາເວ

3ແລະເພິ່ນຈະຊົມຊື່ນດ້ວຍຄວາມຢຳເກງພຣະເຈົ້າຢາເວ ເພິ່ນຈະບໍ່ຕັດສິນຕາມຕາເຫັນ ຫລືຕາມຄຳທີ່ຄົນເວົ້າ;

4ເພິ່ນຈະຕັດສິນຄົນທຸກລຳບາກຢ່າງຍຸດຕິທຳ ແລະປ້ອງກັນສິດທິຂອງຜູ້ທີ່ຕໍ່າຕ້ອຍ. ເມື່ອເພິ່ນສັ່ງແລ້ວຄົນຈະຕ້ອງໄດ້ຮັບໂທດກຳ ແລະຄົນກະທຳການຊົ່ວຮ້າຍຕ່າງກໍຈະຕາຍໄປສິ້ນ.

5ເພິ່ນຈະປົກຄອງຊົນຊາດຂອງເພິ່ນໂດຍຕົນເອງ ດ້ວຍຄວາມຍຸດຕິທຳແລະດ້ວຍຄວາມສັດຊື່.

6ໝາໄນກັບແກະຈະຢູ່ນຳກັນຢ່າງສັນຕິສຸກ ແລະເສືອດາວຈະນອນຮ່ວມກັນກັບໂຕແບ້. ລູກງົວກັບລູກໂຕສິງຈະຫາຢູ່ຫາກິນນຳກັນ ແລະເດັກນ້ອຍກໍຈະດູແລສັດເຫຼົ່ານັ້ນ.

7ງົວກັບໝີນັ້ນຈະກິນນຳກັນ ລູກພວກມັນຈະນອນຢ່າງເປັນສຸກລົ້ນ. ສ່ວນໂຕສິງນັ້ນກໍຈະກິນເຟືອງ ດັ່ງໂຕງົວກິນເຟືອງແລະຫຍ້າ.

8ແມ່ນແຕ່ເດັກອ່ອນນ້ອຍກໍບໍ່ມີອັນຕະລາຍ ເມື່ອພວກເຂົາຫລິ້ນຢູ່ໃກ້ກັບງູມີພິດ.

9ເທິງເນີນພູສັກສິດຂອງພຣະເຈົ້າຄືພູເຂົາຊີໂອນ ທີ່ນັ້ນຈະບໍ່ມີສິ່ງໃດໆທຳຮ້າຍ ແລະຊົ່ວຊ້າ. ຄົນທີ່ຮູ້ເຖິງພຣະເຈົ້າຢາເວຈະມີຢູ່ເຕັມດິນແດນ ດັ່ງທ້ອງທະເລຫລວງທີ່ເຕັມໄປດ້ວຍນໍ້າ.

10ເມື່ອວັນນັ້ນມາເຖິງ ກະສັດອົງໃໝ່ຈາກເຊື້ອວົງຂອງດາວິດ ຈະເປັນສັນຍາລັກຂອງຊົນຊາດທັງຫລາຍ. ພວກເຂົາຈະເຕົ້າໂຮມກັນຢູ່ໃນເມືອງຂອງກະສັດ ແລະຈະຍ້ອງຍໍໃຫ້ກຽດພຣະອົງ.

11ເມື່ອວັນນັ້ນມາເຖິງ ອີກເທື່ອໜຶ່ງ ອົງພຣະຜູ້ເປັນເຈົ້າຈະໃຊ້ຣິດອຳນາດຂອງພຣະອົງ ແລະນຳປະຊາຊົນຂອງພຣະອົງກັບຄືນມາຈາກດິນແດນເຫຼົ່ານີ້: ຄົນທີ່ເຫຼືອຢູ່ໃນປະເທດອັດຊີເຣຍ ແລະໃນປະເທດເອຢິບ, ໃນດິນແດນປັດໂຣດ, ປະເທດເອທີໂອເປຍ, ປະເທດເອລາມ, ປະເທດບາບີໂລນ ແລະປະເທດຮາມັດ ແລະໃນດິນແດນຕາມຝັ່ງທະເລແລະທີ່ເທິງໝູ່ເກາະ.

12ອົງພຣະຜູ້ເປັນເຈົ້າຈະຍົກທຸງຂຶ້ນເປັນສັນຍານ ເພື່ອສະແດງໃຫ້ຊົນຊາດຕ່າງໆຮູ້ວ່າ ພຣະອົງກຳລັງເຕົ້າໂຮມປະຊາຊົນຂອງພຣະອົງເຂົ້າກັນ ຄືປະຊາຊົນຂອງອິດສະຣາເອນແລະຢູດາຍ ທີ່ກະຈັດກະຈາຍຢູ່ຕາມທິດທັງສີ່ຂອງໂລກນັ້ນໃຫ້ກັບຄືນມາ.

13ອານາຈັກເອຟຣາອິມຈະບໍ່ອິດສາຢູດາຍອີກຕໍ່ໄປ ແລະອານາຈັກຢູດາຍຈະບໍ່ເປັນສັດຕູຂອງເອຟຣາອິມດ້ວຍ.

14ພວກເຂົາຈະໂຈມຕີຊາວຟີລິດສະຕິນທາງທິດຕາເວັນຕົກ ແລະປຸ້ນສະດົມປະຊາຊົນທາງທິດຕາເວັນອອກ. ພວກເຂົາຈະຕີຊະນະຊາວເອໂດມແລະຊາວໂມອາບ ແລະຊາວອຳໂມນກໍຈະເຊື່ອຟັງພວກເຂົາ.

15ພຣະເຈົ້າຢາເວຈະເຮັດໃຫ້ນໍ້າໃນອ່າວຊູແອດແຫ້ງ ແລະພຣະອົງຈະບັນດານໃຫ້ລົມຮ້ອນມາພັດແມ່ນໍ້າເອີຟຣັດໃຫ້ແຫ້ງ ໂດຍປະເຈັດຫ້ວຍນ້ອຍເທົ່ານັ້ນໃຫ້ມີນໍ້າ ເພື່ອວ່າຜູ້ໃດໆກໍຈະສາມາດຂ້າມໄປໄດ້.

16ຈະມີຖະໜົນຫລວງຈາກອັດຊີເຣຍ ໃຫ້ປະຊາຊົນອິດສະຣາເອນຂອງພຣະອົງ ຜູ້ລອດຕາຍຢູ່ໃນທີ່ນັ້ນເດີນທາງອອກມາ ດັ່ງບັນພະບຸລຸດຂອງພວກເຂົາໄດ້ເດີນທາງ ເມື່ອອອກມາຈາກປະເທດເອຢິບນັ້ນ.

← Chapter 10 Jump to: Chapter 12 →