Isaiah 24

Lao Bible 2012 (ພຣະຄຳພີສັກສິ)

← Chapter 23 Jump to: Chapter 25 →

1ພຣະເຈົ້າຢາເວກຳລັງຈະທຳລາຍແຜ່ນດິນໂລກ ແລະປະໄວ້ໃຫ້ເປົ່າປ່ຽວ. ພຣະອົງຈະບິດໜ້າດິນ ແລະເຮັດໃຫ້ປະຊາກອນກະຈັດກະຈາຍ.

2ທຸກຄົນຈະໄດ້ຮັບຊາຕາກຳຢ່າງດຽວກັນເຊັ່ນ: ປະໂຣຫິດແລະປະຊາຊົນ, ທາດຮັບໃຊ້ແລະນາຍ, ຜູ້ຂາຍແລະຜູ້ຊື້, ຜູ້ຢືມກັບຜູ້ໃຫ້ຢືມ, ຄົນຮັ່ງມີກັບຄົນຍາກຈົນ.

3ແຜ່ນດິນໂລກຈະພິນາດແລະຮົກຮ້າງເພພັງ. ພຣະເຈົ້າຢາເວໄດ້ກ່າວໄວ້ຢ່າງໃດກໍຈະເປັນໄປຢ່າງນັ້ນ.

4ແຜ່ນດິນໂລກຈະແຫ້ງແລ້ງ ແລະທຸກສິ່ງຈະຫ່ຽວແຫ້ງໄປ; ທົ່ວທັງໂລກຈະອ່ອນລົງ ທັງແຜ່ນດິນໂລກ ແລະຟ້າສະຫວັນ ກໍຈະເສື່ອມເສຍໄປ.

5ປະຊາກອນໄດ້ເຮັດໃຫ້ໂລກນີ້ເປັນມົນທິນ ໂດຍລະເມີດກົດບັນຍັດຂອງພຣະເຈົ້າ ແລະຝ່າຝືນພັນທະສັນຍາທີ່ພຣະອົງໄດ້ເຮັດໄວ້ກັບພວກເຂົາຕະຫລອດໄປ.

6ສະນັ້ນ ແຜ່ນດິນໂລກນີ້ ຈຶ່ງຖືກສາບແຊ່ງ ໃຫ້ສົມກັບສິ່ງທີ່ພວກເຂົາໄດ້ເຮັດ ຄືໜ້ອຍຄົນທີ່ສຸດຈະມີຊີວິດຢູ່.

7ກົກອະງຸ່ນຈະຫ່ຽວແຫ້ງໄປ ແລະເຫຼົ້າອະງຸ່ນຈະຫາຍາກທີ່ສຸດ. ທຸກໆຄົນທີ່ເຄີຍມີຄວາມສຸກ ບັດນີ້ ກໍຈະມີແຕ່ຄວາມທຸກ

8ແລະສຽງພິນ ແລະສຽງກອງທີ່ເຄີຍດັງຢ່າງອອນຊອນ ກໍໄດ້ຢຸດສະງັກລົງ.

9ການຮ້ອງເພງເຮຮາເພາະລິດເຫຼົ້າອະງຸ່ນບໍ່ມີອີກຕໍ່ໄປ; ແລະບໍ່ມີຜູ້ໃດຊົມຊື່ນຍ້ອນໄດ້ຊີມຣົດເຫຼົ້າອະງຸ່ນອີກຕໍ່ໄປ.

10ຢູ່ໃນເມືອງເກີດສັບສົນວຸ້ນວາຍກັນໄປໝົດ ແລະຊາວເມືອງກໍຢູ່ໃນເຮືອນອັດປະຕູໃສ່ໄລໄວ້ເພື່ອຄວາມປອດໄພ.

11ຊາວເມືອງຮ້ອງດ່າຕາມຫົນທາງຍ້ອນບໍ່ມີເຫຼົ້າອະງຸ່ນດື່ມອີກ. ຄວາມສຸກໝົດໄປຈາກດິນແດນຢ່າງບໍ່ມີມື້ຈະກັບຄືນມາ.

12ເມືອງຮົກຮ້າງຫັກພັງ ແລະປະຕູເມືອງກໍເພພັງລົງ.

13ສິ່ງນີ້ແຫລະ ຈະເກີດຂຶ້ນກັບທຸກໆຊາດທົ່ວໂລກນີ້. ຈະເປັນດັ່ງຕອນທີ່ສິ້ນສຸດຂອງລະດູເກັບກ່ຽວ ເມື່ອເຂົາສັ່ນເອົາໝາກກອກເທດໃນທຸກກົກ ແລະເກັບເອົາພົ້ວໝາກອະງຸ່ນໃນທຸກຕົ້ນ.

14ຜູ້ໃດທີ່ມີຊີວິດຢູ່ຈະຮ້ອງເພງດ້ວຍຄວາມຊົມຊື່ນຍິນດີ. ຜູ້ທີ່ຢູ່ທາງທິດຕາເວັນຕົກກໍຈະບອກວ່າ, ພຣະເຈົ້າຢາເວຍິ່ງໃຫຍ່ສໍ່າໃດ

15ແລະຜູ້ທີ່ຢູ່ທາງທິດຕາເວັນອອກກໍຈະສັນລະເສີນພຣະເຈົ້າຢາເວ. ປະຊາຊົນທີ່ຢູ່ຕາມແຄມທະເລຈະສັນລະເສີນພຣະນາມຂອງພຣະເຈົ້າຢາເວ ພຣະເຈົ້າຂອງຊາດອິດສະຣາເອນ.

16ແຕ່ທາງພາກຕ່າງໆຂອງໂລກທີ່ຢູ່ໄກສຸດ ພວກເຮົາຈະໄດ້ຍິນສຽງເພງຮ້ອງສັນລະເສີນອິດສະຣາເອນ ຊົນຊາດທີ່ຊອບທຳ. ສ່ວນຂ້າພະເຈົ້ານັ້ນໝົດຫວັງສາແລ້ວ ຂ້າພະເຈົ້າຈ່ອຍຜອມລົງເລື້ອຍໆ ພວກທີ່ທໍລະຍົດກໍສືບຕໍ່ທໍລະຍົດ ແລະພວກເຂົາຍິ່ງທໍລະຍົດຢ່າງຊົ່ວຮ້າຍຫລາຍຂຶ້ນ.

17ທຸກຄົນຈົ່ງຟັງຂ້າພະເຈົ້າເທີ້ນ ຄວາມຢ້ານກົວອັນໃຫຍ່, ຫລຸມ ແລະແຮ້ວກຳລັງລໍດັກຈັບພວກເຮົາຢູ່.

18ຜູ້ໃດທີ່ຊອກຫາປົບໜີຈາກຄວາມຢ້ານກົວອັນໃຫຍ່ນັ້ນ ກໍຈະຕົກລົງໃນຫລຸມ; ແລະຜູ້ໃດທີ່ປົບໜີຈາກຫລຸມກໍຈະຖືກແຮ້ວ. ຫ່າຝົນຈະຕົກລົງມາຈາກທ້ອງຟ້າ ແລະຮາກຖານຂອງໂລກກໍຈະສັ່ນຄອນແຄນໝົດ.

19ໂລກຈະແຕກເປັນປ່ຽງແລະຍະອອກ.

20ແຜ່ນດິນໂລກຈະໂຊເຊໄປມາດັ່ງຄົນເມົາເຫຼົ້າ ຫລືໂຢກເຢກດັ່ງຕູບໄມ້ໃນທ່າມກາງພະຍຸຮ້າຍ. ບາບໄດ້ເຮັດໃຫ້ໂລກນີ້ເສື່ອມໂຊມລົງຈົນລົ້ມທະລາຍ ແລະແຜ່ນດິນໂລກກໍຈະຟື້ນຕົວຂຶ້ນມາອີກບໍ່ໄດ້ຈັກເທື່ອ.

21ເມື່ອເວລານັ້ນມາເຖິງ ພຣະເຈົ້າຢາເວຈະລົງໂທດບັນດາອຳນາດເບື້ອງເທິງ ແລະບັນດານັກປົກຄອງເບື້ອງລຸ່ມທີ່ເທິງແຜ່ນດິນໂລກນີ້.

22ພຣະເຈົ້າຈະນຳບັນດາກະສັດມາຮ່ວມກັນເປັນຝູງ ດັ່ງນຳຊະເລີຍເສິກມາໃນເຫວ. ພຣະອົງຈະຂັງພວກເຂົາໄວ້ໃນຄຸກ ຈົນຮອດເວລາຕັດສິນລົງໂທດ.

23ດວງຈັນຈະມືດມົວ ແລະດວງອາທິດຈະບໍ່ສ່ອງແສງ. ດ້ວຍວ່າ, ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ຈະຂຶ້ນເປັນກະສັດ. ພຣະອົງຈະປົກຄອງຢູ່ໃນນະຄອນເຢຣູຊາເລັມທີ່ເທິງພູເຂົາຊີໂອນ ແລະພວກຜູ້ນຳປະຊາຊົນຈະເຫັນສະຫງ່າຣາສີຂອງພຣະອົງ.

← Chapter 23 Jump to: Chapter 25 →