Isaiah 9

Lao Bible 2012 (ພຣະຄຳພີສັກສິ)

← Chapter 8 Jump to: Chapter 10 →

1ດິນແດນຂອງເຜົ່າເຊບູໂລນກັບເຜົ່າເນັບທາລີ ເຄີຍໄດ້ເສື່ອມເສຍກຽດສັກສີມາເທື່ອໜຶ່ງແລ້ວ. ແຕ່ໃນອະນາຄົດ ກຽດສັກສີຈະຖືກນຳມາສູ່ພູມີພາກນີ້ ຄືຕັ້ງແຕ່ທະເລເມດີແຕຣາເນ ຈົນເຖິງດິນແດນທາງທິດຕາເວັນອອກຂອງແມ່ນໍ້າຈໍແດນຟາກນັ້ນ ແລະຈົນຮອດແຂວງຄາລີເລ ຄືບ່ອນທີ່ຊາວຕ່າງປະເທດອາໄສຢູ່.

2ປະຊາຊົນຜູ້ທີ່ໃຊ້ຊີວິດຢູ່ໃນຄວາມມືດໜາ ກໍໄດ້ເຫັນແສງແຈ້ງອັນຍິ່ງໃຫຍ່ສາແລ້ວ. ພວກເຂົາເຄີຍອາໄສຢູ່ໃນດິນແດນແຫ່ງເງົາມືດມົວ ແຕ່ບັດນີ້ ແສງແຈ້ງໃສກຳລັງສ່ອງໃສ່ພວກເຂົາເຈົ້າ.

3ພຣະອົງໃຫ້ພວກເຂົາມີຄວາມຍິນດີອັນຍິ່ງໃຫຍ່ ພຣະອົງໄດ້ເຮັດໃຫ້ພວກເຂົາມີຄວາມສຸກໃນຈິດໃຈ. ພວກເຂົາຊົມຊື່ນຍິນດີດ້ວຍສິ່ງທີ່ພຣະອົງໄດ້ກະທຳ ດັ່ງຄົນຊົມຊື່ນຍິນດີເມື່ອພວກເຂົາເກັບກ່ຽວເຂົ້າ ຫລືເໝືອນດັ່ງຄົນໂຮຮ້ອງຢ່າງຊົມຊື່ນຍິນດີ ເວລາທີ່ພວກເຂົາແບ່ງປັນຊັບສິນທີ່ຢຶດມາໄດ້.

4ເພາະພຣະອົງໄດ້ຫັກແອກທີ່ເປັນພາລະໜັກ ແລະຫັກໄມ້ແສ້ທີ່ໃຊ້ຕີບ່າພວກເຂົານັ້ນ. ພຣະອົງໄດ້ເອົາຊະນະຊົນຊາດທັງຫລາຍ ທີ່ໄດ້ກົດຂີ່ຫາປະໂຫຍດນຳຄົນຂອງພຣະເຈົ້າ ດັ່ງພຣະອົງໄດ້ເອົາຊະນະແຕ່ດົນນານຜ່ານມາ ຄືກອງທັບມີດີອານແຕ່ດົນນານມາແລ້ວ.

5ເກີບທຸກຄູ່ທັງເສື້ອທີ່ເປິເປື້ອນດ້ວຍເລືອດທຸກໂຕ ຂອງສັດຕູທີ່ຮຸກຮານຈະຖືກເຜົາໄຟທັງສິ້ນ.

6ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ ມີລູກຊາຍຜູ້ໜຶ່ງຖືກມອບໝາຍໃຫ້ພວກເຮົາແລ້ວ ພຣະອົງຈະຊົງນາມວ່າ, “ຜູ້ປຶກສາທີ່ອັດສະຈັນ” “ພຣະເຈົ້າຊົງຣິດ” “ພຣະບິດາສືບໄປ” “ອົງສັນຕິຣາດ”

7ພຣະຣາຊອຳນາດຈະເພີ່ມຂຶ້ນຢູ່ສະເໝີ ພຣະຣາຊອານາຈັກຈະມີສັນຕິສຸກໄປເລື້ອຍໆ. ພຣະອົງຈະຂຶ້ນປົກຄອງສືບຕໍ່ດາວິດຜູ້ເປັນກະສັດ ທີ່ອຳນາດຫລັກຄືຄວາມຍຸດຕິທຳແລະຖືກຕ້ອງ ເລີ່ມຕັ້ງແຕ່ບັດນີ້ຈົນເຖິງເທົ່າອະວະສານ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ຕັ້ງໃຈເຮັດທຸກສິ່ງນີ້.

8ອົງພຣະຜູ້ເປັນເຈົ້າໄດ້ກ່າວໂທດໃສ່ອານາຈັກອິດສະຣາເອນສາແລ້ວ ຄືໃສ່ເຊື້ອສາຍຂອງຢາໂຄບ.

9ປະຊາຊົນອິດສະຣາເອນທັງໝົດ ຄືໝົດທຸກຄົນທີ່ຢູ່ໃນນະຄອນຊາມາເຣຍ ຈະຮູ້ຈັກວ່າພຣະອົງໄດ້ເຮັດສິ່ງນີ້ແລ້ວ. ບັດນີ້ ພວກເຂົາພັດອວດອົ່ງຈອງຫອງ. ພວກເຂົາເວົ້າວ່າ,

10“ຕຶກທີ່ໃຊ້ດິນຈີ່ສ້າງເພພັງລົງກໍຈິງ, ແຕ່ພວກເຮົາຈະໃຊ້ກ້ອນຫີນສ້າງຕຶກນັ້ນຂຶ້ນໃໝ່. ກົກເດື່ອໄດ້ຖືກຕັດລົງແລ້ວກໍຈິງ, ແຕ່ພວກເຮົາຈະເອົາກົກສົນທີ່ງາມປູກໄວ້ແທນ.”

11ພຣະເຈົ້າຢາເວໄດ້ປຸກປັ່ນເຫຼົ່າສັດຕູ ໃຫ້ມາບຸກໂຈມຕີພວກເຂົາ.

12ພວກຊີເຣຍຢູ່ທາງທິດຕາເວັນອອກ ແລະພວກຟີລິດສະຕິນຢູ່ທາງທິດຕາເວັນຕົກ ຕ່າງກໍອ້າປາກເພື່ອຈະກືນກິນອິດສະຣາເອນ. ເຖິງປານນັ້ນກໍຕາມ ຄວາມໂກດຮ້າຍຂອງພຣະອົງກໍຍັງບໍ່ສິ້ນສຸດ; ແຕ່ມືພຣະອົງຍັງຢຽດອອກຢູ່ເພື່ອລົງໂທດພວກເຂົາ.

13ເຖິງແມ່ນວ່າພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ໄດ້ລົງໂທດອິດສະຣາເອນແລ້ວກໍຕາມ; ແຕ່ພວກເຂົາກໍຍັງບໍ່ໄດ້ປ່ຽນໃຈກັບຄືນມາຫາພຣະອົງ.

14ພຣະເຈົ້າຢາເວຈະລົງໂທດບັນດາຜູ້ນຳຊາດອິດສະຣາເອນແລະປະຊາຊົນ ໃຫ້ໝົດໄປໃນພຽງວັນດຽວ; ພຣະອົງຈະຕັດຫົວຕັດຫາງພວກເຂົາຖິ້ມໝົດ.

15ຫົວແມ່ນຜູ້ອາວຸໂສກັບຄົນທີ່ມີກຽດ ສ່ວນຫາງນັ້ນແມ່ນພວກຜູ້ທຳນວາຍທີ່ສັ່ງສອນເລື່ອງບໍ່ຈິງ.

16ພວກເຂົາໄດ້ນຳພາປະຊາຊົນເຫຼົ່ານີ້ໄປໃນທາງຜິດ ແລະເຮັດໃຫ້ພວກເຂົາສັບສົນວຸ້ນວາຍ.

17ດັ່ງນັ້ນ ພຣະເຈົ້າຢາເວຈຶ່ງຈະບໍ່ໃຫ້ຄົນໜຸ່ມຜູ້ໃດໜີລອດໄປໄດ້ ທັງຈະບໍ່ເມດຕາສົງສານແມ່ໝ້າຍແລະລູກກຳພ້າຄົນໃດເລີຍ ເພາະທຸກຄົນບໍ່ນັບຖືພຣະເຈົ້າແລະຊົ່ວຮ້າຍແລະເວົ້າແຕ່ສິ່ງທີ່ຊົ່ວໆ. ສະນັ້ນ ພຣະອົງຈຶ່ງບໍ່ເຊົາໂກດຮ້າຍພວກເຂົາ; ແຕ່ມືພຣະອົງຍັງຢຽດອອກຢູ່ເພື່ອລົງໂທດພວກເຂົາ.

18ຄວາມຊົ່ວຮ້າຍຂອງປະຊາຊົນເຫຼົ່ານີ້ໄດ້ລຸກຂຶ້ນເປັນແປວໄຟ ລາມໄປທຳລາຍພຸ່ມໄມ້ໃຫຍ່ແລະນ້ອຍຖິ້ມ. ມັນຈະໄໝ້ລາມເປັນແຖວດັ່ງໄຟໄໝ້ປ່າທີ່ມີຄວັນໃຫຍ່ພຸ່ງຂຶ້ນ.

19ເພາະພຣະເຈົ້າຢາເວອົງຊົງຣິດອຳນາດຍິ່ງໃຫຍ່ໂກດຮ້າຍ ພຣະອົງຈຶ່ງທຳລາຍດິນແດນແລະປະຊາຊົນໃຫ້ຈິບຫາຍໄປດັ່ງໄຟເຜົາຜານ ໂດຍແຕ່ລະຄົນໄດ້ຮັບໂທດນັ້ນເທົ່າກັນ.

20ປະຊາຊົນທົ່ວທັງປະເທດໄດ້ເກັບເລັມເອົາອາຫານມາກິນ ບ່ອນລະເລັກລະນ້ອຍຕາມທີ່ຕົນຫາໄດ້, ແຕ່ພວກເຂົາກໍບໍ່ອີ່ມເປັນຈັກເທື່ອ ຈຶ່ງກິນແມ່ນແຕ່ລູກຂອງຕົນເອງ.

21ປະຊາຊົນຂອງເຜົ່າມານາເຊ ແລະຂອງເຜົ່າເອຟຣາອິມໄດ້ສູ້ຮົບກັນ ແລະພວກເຂົາຮ່ວມກັນໂຈມຕີຢູດາຍ. ເຖິງປານນັ້ນກໍຕາມ ພຣະອົງຍັງບໍ່ເຊົາໂກດຮ້າຍ, ແຕ່ມືພຣະອົງຍັງຢຽດອອກຢູ່ເພື່ອລົງໂທດພວກເຂົາ.

← Chapter 8 Jump to: Chapter 10 →