Isaiah 47

Lao Bible 2012 (ພຣະຄຳພີສັກສິ)

← Chapter 46 Jump to: Chapter 48 →

1ອົງພຣະຜູ້ເປັນເຈົ້າກ່າວວ່າ, “ຈົ່ງລົງຈາກບັນລັງເຖີດ ນະຄອນບາບີໂລນເອີຍ ແລະນັ່ງເທິງພື້ນຕາມຂີ້ຝຸ່ນດິນສາເຖີດ ຄັ້ງໜຶ່ງ ເຈົ້າເປັນດັ່ງສາວປອດຜູ້ໜຶ່ງໃດ ເປັນນະຄອນໜຶ່ງທີ່ບໍ່ມີຜູ້ໃດກ້າໂຈມຕີເອົາໄດ້ ແຕ່ເຈົ້າຈະບໍ່ອ່ອນໂຍນແລະໜ້າຈັບໃຈຕໍ່ໄປ ບັດນີ້ ເຈົ້າໄດ້ຕົກເປັນທາດຮັບໃຊ້ສາແລ້ວ

2ຈົ່ງສີເຂົ້າເປືອກເຖີດ ຈົ່ງໂມ້ແປ້ງສາ ຈົ່ງເອົາຜ້າປົກໂສມໜ້າເຈົ້າອອກສາເຖີດ ຈົ່ງແກ້ເຄື່ອງງາມລະອຽດຂອງເຈົ້າອອກສາ ຈົ່ງຮື້ກະໂປ່ງເຈົ້າຂຶ້ນ ແລະຍ່າງຂ້າມຫ້ວຍນໍ້າ

3ເພື່ອປະຊາຊົນຈະໄດ້ເຫັນເຈົ້າເປືອຍກາຍ ພວກເຂົາຈະໄດ້ເຫັນເຈົ້າຕົກຕໍ່າແລະຂາຍໜ້າ. ເຮົາຈະລົງມືແກ້ແຄ້ນໃຫ້ແກ່ເຮົາເອງ ແລະຈະບໍ່ມີຜູ້ໃດຂັດຂືນທັງຢັບຢັ້ງເຮົາໄດ້.”

4ພຣະຜູ້ໄຖ່ຂອງພວກເຮົາມີນາມຊື່ວ່າພຣະເຈົ້າຢາເວ ອົງຊົງຣິດອຳນາດຍິ່ງໃຫຍ່ອົງບໍຣິສຸດແຫ່ງຊາດອິດສະຣາເອນ.

5ອົງພຣະຜູ້ເປັນເຈົ້າລັ່ນປາກກ່າວຕໍ່ນະຄອນບາບີໂລນວ່າ, “ຈົ່ງນັ່ງໃນທີ່ງຽບສະຫງົບ ແລະໃນທີ່ມືດສາເຖີດ ເພາະເຈົ້າໄດ້ສູນເສຍຕໍ່າແໜ່ງຂອງເຈົ້າໄປ ຄືຕໍ່າແໜ່ງແຫ່ງຣາຊີນີຂອງບັນດາຊົນຊາດ

6ເຮົາໄດ້ໂກດຮ້າຍໃຫ້ປະຊາຊົນຂອງເຮົາ ເຮົາໄດ້ເຮັດຕໍ່ພວກເຂົາດັ່ງບໍ່ໄດ້ເປັນຂອງເຮົາອີກ: ເຮົາໄດ້ມອບພວກເຂົາໄວ້ໃນອຳນາດຂອງເຈົ້າໝົດ ເຈົ້າບໍ່ໄດ້ເມດຕາປານີພວກເຂົາເລີຍ.

7ເຈົ້າຄິດວ່າເຈົ້າຈະໄດ້ເປັນຣາຊີນີສືບໄປບໍ? ຈຶ່ງບໍ່ຄິດວ່າເລື່ອງຈະຈົບລົງຢ່າງໃດແທ້? ແມ່ນແຕ່ຄົນເຖົ້າແກ່ຊະຣາກໍຕາມ ກໍໄດ້ເຮັດກັບພວກເຂົາຢ່າງໂຫດຮ້າຍທາລຸນ.

8ເຈົ້າຜູ້ມັກມ່ວນຊື່ນເອີຍ ຈົ່ງຟັງເລື່ອງນີ້ ເຈົ້າເຄີຍຄິດວ່າຕົນປອດໄພແລະໝັ້ນຄົງແລ້ວ. ເຈົ້າອ້າງຕົນວ່າຍິ່ງໃຫຍ່ເທົ່າກັບພຣະເຈົ້າບໍ ເວົ້າວ່າ, ບໍ່ມີຜູ້ໜຶ່ງຜູ້ໃດດຸດດັ່ງຕົນໄດ້. ເຈົ້າຄິດວ່າຈະບໍ່ໄດ້ເປັນຍິງໝ້າຍຜົວຕາຍປະບໍ ຫລືທຸກຮ້ອນໃຈຍ້ອນຕົນສູນເສຍລູກ.

9ແຕ່ພຽງບຶດດຽວເທົ່ານັ້ນ ພຽງແຕ່ໃນມື້ດຽວ ເຫດການເຫຼົ່ານີ້ທັງສອງກໍຈະເກີດຂຶ້ນ: ເຖິງວ່າຈະໃຊ້ເວດມົນຄາຖາທັງໝົດກໍຕາມ ເຈົ້າກໍຈະສູນເສຍຜົວ ແລະລູກຂອງເຈົ້າ.

10ເຈົ້າເຊື່ອໝັ້ນໃນຄວາມຊົ່ວຊ້າຂອງເຈົ້ານໍ ເຈົ້າຄິດວ່າບໍ່ມີຜູ້ໜຶ່ງຜູ້ໃດເບິ່ງເຫັນເຈົ້າໄດ້. ປັນຍາຂອງເຈົ້າ ແລະຄວາມຮູ້ຂອງເຈົ້າເອງ ໄດ້ພາໃຫ້ເຈົ້າເດີນໄປໃນທາງຜິດສາແລ້ວ; ເຈົ້າຈຶ່ງຄິດວ່າ ‘ຂ້ອຍຄືພຣະເຈົ້າອົງໜຶ່ງໃດ ແລະບໍ່ມີຜູ້ໜຶ່ງຜູ້ໃດທີ່ຄ້າຍຄືກັບຂ້ອຍ.’

11ໄພພິບັດອັນໃຫຍ່ນັ້ນມັນຈະມາຖືກເຈົ້າເດີ ບໍ່ມີເວດມົນຄາຖາໃດໆຈະຢັບຢັ້ງມັນໄວ້ໄດ້. ການຮົກຮ້າງເພພັງຈະມາຖືກເຈົ້າໃນທັນທີ ຄືການຮົກຮ້າງເພພັງທີ່ເຈົ້າບໍ່ຄາດຝັນມາກ່ອນ

12ຈົ່ງສືບຕໍ່ໃຊ້ເວດມົນກັບເຄື່ອງແຄ້ວຂອງຄົງສາ ເພາະເຈົ້າໄດ້ໃຊ້ມັນມາແຕ່ສະໄໝຍັງໜຸ່ມພຸ້ນ. ບາງທີມັນອາດຊ່ວຍບາງສິ່ງບາງຢ່າງໄດ້ກໍມີ ບາງທີໃຊ້ມັນໃຫ້ເຫຼົ່າສັດຕູຢ້ານກົວກໍໄດ້.

13ສິ້ນອຳນາດແລ້ວເຖິງວ່າໄດ້ຮັບຄຳແນະນຳກໍດີ ຈົ່ງໃຫ້ພວກໝໍໂຫນໝໍທວາຍອອກມາ ແລະຊ່ວຍເອົາເຈົ້າໄວ້ ຄືບັນດາຄົນທີ່ສຶກສາເບິ່ງດວງດາວທັງຫລາຍ ທັງເຮັດແຜນທີ່ຂອງຟ້າສະຫວັນອອກມາເປັນຊັ້ນໆ ແລະບອກເຈົ້າເດືອນແລ້ວເດືອນເຫຼົ່າອີກວ່າ ມີເຫດການຫຍັງແດ່ຈະເກີດຂຶ້ນກັບເຈົ້ານໍ.

14ພວກເຂົາຈະເປັນດັ່ງເຟືອງທ່ອນນ້ອຍໆທັງຫລາຍ ແລະໄຟກໍຈະໄໝ້ໃຫ້ວອດວາຍໄປໝົດສິ້ນ ພວກເຂົາຈະຊ່ວຍແມ່ນແຕ່ພວກເຂົາເອງບໍ່ໄດ້ເລີຍ ໄຟຈະລຸກແຮງສຳລັບພວກເຂົາ ບໍ່ແມ່ນໄຟໃຫ້ອົບອຸ່ນ.

15ນີ້ແຫລະ ແມ່ນສິ່ງດີທີ່ພວກເຂົາຈະເຮັດຕໍ່ເຈົ້າຄື ບັນດາໝໍໂຫນໝໍທວາຍທີ່ເຈົ້າຂໍຄຳປຶກສາມາຕະຫລອດ ພວກເຂົາຈະປະຖິ້ມເຈົ້າ ແລະໜີໄປຕາມທາງຂອງພວກເຂົາເອງ ແລະຈະບໍ່ມີຜູ້ໃດເຫຼືອຢູ່ເພື່ອຊ່ວຍເຈົ້າໃຫ້ພົ້ນ.”

← Chapter 46 Jump to: Chapter 48 →