Isaiah 25

Lao Bible 2012 (ພຣະຄຳພີສັກສິ)

← Chapter 24 Jump to: Chapter 26 →

1ຂ້າແດ່ພຣະເຈົ້າຢາເວ ພຣະອົງເປັນພຣະເຈົ້າຂອງຂ້ານ້ອຍ ຂ້ານ້ອຍຈະຍ້ອງຍໍໃຫ້ກຽດພຣະອົງ ແລະສັນລະເສີນພຣະນາມພຣະເຈົ້າ. ພຣະອົງນັ້ນໄດ້ເຮັດສິ່ງອັດສະຈັນນາໆປະການ ພຣະອົງເຮັດຕາມແຜນການທີ່ຊົງໄດ້ວາງໄວ້.

2ພຣະອົງໄດ້ປ່ຽນເມືອງຕ່າງໆໃຫ້ຮົກຮ້າງເພພັງ ແລະທຳລາຍປ້ອມປ້ອງກັນເມືອງຂອງເຂົາເຈົ້າ. ຜາສາດຣາຊວັງທີ່ເຫຼົ່າສັດຕູໄດ້ສ້າງຂຶ້ນມາ ກໍໄດ້ສູນເສຍຕະຫລອດໄປສາແລ້ວ.

3ຊົນຊາດທີ່ມີອຳນາດຈະສັນລະເສີນພຣະອົງ ປະຊາຊາດທີ່ໂຫດຮ້າຍຈະຢ້ານກົວພຣະອົງດ້ວຍ.

4ຄົນຍາກຈົນຂາດທີ່ເພິ່ງໄດ້ປົບມາຫາພຣະອົງ ແລະໄດ້ມີຄວາມປອດໄພໃນຄາວເດືອດຮ້ອນ. ພຣະອົງໄດ້ໃຫ້ພວກເຂົາມີບ່ອນຊົ້ນຈາກພະຍຸຮ້າຍ ແລະໃຫ້ເພິ່ງໃນຮົ່ມຈາກແສງແດດຮ້ອນ. ເຫຼົ່າສັດຕູຜູ້ໂຫດຮ້າຍກໍໄດ້ມາໂຈມຕີ ດັ່ງກັບພະຍຸຮ້າຍໂຈມຕີຍາມລະດູໜາວ

5ດັ່ງຄວາມແຫ້ງແລ້ງເກີດຂຶ້ນໃນດິນແດນ ແຕ່ແມ່ນພຣະອົງທີ່ເຮັດໄດ້; ຄືເຮັດໃຫ້ສັດຕູຜູ້ໂຫດຮ້າຍມິດງຽບໄປ ດັ່ງເມກເຮັດໃຫ້ຊຸ່ມເຢັນໃນມື້ທີ່ມີແດດຮ້ອນ.

6ທີ່ເທິງພູເຂົາຊີໂອນບ່ອນນີ້ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ຈະຕຽມງານກິນລ້ຽງໃຫຍ່ສຳລັບຊົນຊາດທັງໝົດໃນໂລກ ຄືການກິນລ້ຽງໃຫຍ່ທີ່ມີອາຫານບໍຣິບູນທີ່ສຸດ ແລະມີເຫຼົ້າອະງຸ່ນທີ່ດີເລີດ.

7ໃນງານກິນລ້ຽງນີ້ ພຣະອົງຈະຍົກຍ້າຍຄວາມທຸກໂສກ ຊຶ່ງເປັນດັ່ງເມກປົກຄຸມເທິງຊາດທັງໝົດນັ້ນໃຫ້ໜີໄປໃນທັນທີ.

8ອົງພຣະຜູ້ເປັນເຈົ້າ ພຣະເຈົ້າຈະທຳລາຍຄວາມຕາຍຕະຫລອດໄປ ພຣະອົງຈະເຊັດນໍ້າຕາໃຫ້ໝົດທຸກຄົນແລະກຳຈັດຄວາມອັບອາຍ ທີ່ປະຊາຊົນຂອງພຣະອົງໄດ້ຮັບຢູ່ທົ່ວໂລກ. ພຣະເຈົ້າຢາເວເອງໄດ້ກ່າວດັ່ງນີ້ແຫລະ.

9ໃນວັນນັ້ນ ພວກເຂົາກໍຈະເວົ້າວ່າ, “ພຣະອົງເປັນພຣະເຈົ້າຂອງພວກຂ້ານ້ອຍ ພວກຂ້ານ້ອຍລໍຄອຍພຣະອົງ; ສະນັ້ນ ພຣະອົງຈຶ່ງຊ່ວຍເອົາພວກຂ້ານ້ອຍໄວ້. ພຣະອົງແມ່ນພຣະເຈົ້າຢາເວ ອົງທີ່ພວກຂ້ານ້ອຍລໍຄອຍພຣະອົງ; ພວກຂ້ານ້ອຍຊົມຊື່ນຍິນດີແລະມີຄວາມສຸກຫລາຍ ໃນການຊ່ວຍໃຫ້ພົ້ນຂອງພຣະອົງ.”

10ພຣະເຈົ້າຢາເວຈະປົກປ້ອງພູເຂົາຊີໂອນ; ແຕ່ປະຊາຊົນຊາວໂມອາບຈະຖືກຢຽບຢໍ່າລົງ ເໝືອນກັນກັບຄົນຢຽບຢໍ່າເຟືອງເພື່ອເຮັດຝຸ່ນ.

11ພວກເຂົາຈະເດ່ມືອອກເໝືອນຄົນທີ່ພະຍາຍາມລອຍນໍ້າໄປ, ແຕ່ພຣະອົງຈະເຮັດໃຫ້ພວກເຂົາອ່ອນແຮງ ແລະມືພວກເຂົາຈະຈົມລົງຢ່າງຂາດຜູ້ຊ່ວຍ.

12ພຣະອົງຈະທຳລາຍປ້ອມປ້ອງກັນເມືອງບ່ອນສູງໆໃນດິນແດນໂມອາບລົງ ແລະເຮັດໃຫ້ມັນຮົກຮ້າງເພພັງຈົນກາຍເປັນຂີ້ຝຸ່ນ.

← Chapter 24 Jump to: Chapter 26 →