Isaiah 34

Lao Bible 2012 (ພຣະຄຳພີສັກສິ)

← Chapter 33 Jump to: Chapter 35 →

1ປະຊາຊົນທຸກຊົນຊາດເອີຍ ຈົ່ງມາເທີ້ນ ຈົ່ງມາເຕົ້າໂຮມກັນແລະຟັງ. ຈົ່ງໃຫ້ໝົດທັງໂລກ ແລະໝົດທຸກຄົນຢູ່ໃນໂລກມາທີ່ນີ້ແລະຟັງ.

2ພຣະເຈົ້າຢາເວໂກດຮ້າຍຊົນຊາດທັງໝົດ ແລະກອງທັບທັງຫລາຍຂອງພວກເຂົາ. ພຣະອົງລົງໂທດພວກເຂົາໃຫ້ໄປສູ່ຄວາມຈິບຫາຍ.

3ຈະບໍ່ມີຜູ້ໃດຝັງຊາກສົບຂອງພວກເຂົາ ແຕ່ຈະຖືກປະໃຫ້ເປື່ອຍແລະເນົ່າເໝັນ ຈົນພູເຂົາທັງຫລາຍຈະນອງໄປດ້ວຍເລືອດ.

4ດວງອາທິດ, ດວງຈັນ ແລະດວງດາວທັງຫລາຍຈະໝຸ່ນເປັນຂີ້ຝຸ່ນດິນ. ທ້ອງຟ້າຈະດັບສູນໄປດັ່ງໜັງສືມ້ວນທີ່ໄດ້ມ້ວນໄວ້ ແລະດວງດາວຈະຕົກລົງດັ່ງໃບໄມ້ທີ່ຫລົ່ນຈາກເຄືອອະງຸ່ນແລະກົກໝາກເດື່ອ.

5ພຣະເຈົ້າຢາເວໄດ້ຈັດຕຽມດາບຂອງພຣະອົງໄວ້ໃນຟ້າສະຫວັນ; ບັດນີ້ ພຣະອົງຈະໃຊ້ດາບນັ້ນຟັນເມືອງເອໂດມ ຄືຟັນປະຊາຊົນເຫຼົ່ານັ້ນທີ່ພຣະອົງລົງໂທດໄປສູ່ຄວາມຈິບຫາຍ.

6ດາບຂອງພຣະອົງຈະເຕັມໄປດ້ວຍເລືອດແລະໄຂມັນ ດັ່ງເລືອດແລະໄຂມັນຂອງແກະ ແລະແບ້ທີ່ຄົນໄດ້ຂ້າເພື່ອຖວາຍບູຊາ. ພຣະເຈົ້າຢາເວຈະຖວາຍເຄື່ອງບູຊານີ້ຢູ່ໃນເມືອງໂບຊະຣາ; ພຣະອົງຈະໃຫ້ການຂ້າລ້າງຜານນີ້ເກີດຂຶ້ນໃນດິນແດນເອໂດມ.

7ປະຊາຊົນຈະລົ້ມຕາຍດັ່ງງົວປ່າ ແລະງົວເຖິກໜຸ່ມ ແລະແຜ່ນດິນຈະນອງໄປດ້ວຍເລືອດ ແລະເຕັມໄປດ້ວຍໄຂມັນ.

8ມາເຖິງຕອນນີ້ແມ່ນເວລາທີ່ພຣະເຈົ້າຢາເວຈະຊ່ວຍກູ້ເອົາພູເຂົາຊີໂອນ ແລະແກ້ແຄ້ນເຫຼົ່າສັດຕູຂອງພູເຂົາຊີໂອນໃຫ້ໝົດສິ້ນ.

9ແມ່ນໍ້າຕ່າງໆຂອງເອໂດມຈະກາຍເປັນນໍ້າມັນດິນ ແລະຂີ້ດິນກໍຈະກາຍເປັນມາດທີ່ໄໝ້ເຜົາຜານທົ່ວປະເທດ.

10ມັນຈະໄໝ້ເຜົາຜານທັງເວັນທັງຄືນ ແລະຄວັນຈະພຸ່ງຂຶ້ນຈາກທີ່ນັ້ນຕະຫລອດໄປ. ດິນແດນຈະຖືກປະເປົ່າລ້າທຸກຍຸກທຸກສະໄໝ ແລະທັງຈະບໍ່ມີຜູ້ໃດທ່ອງທ່ຽວໄປມາຜ່ານທີ່ນັ້ນອີກຈັກເທື່ອ.

11ນົກເຄົ້າກັບນົກກາເວົາຈະເປັນເຈົ້າຂອງດິນແດນນັ້ນ. ອົງພຣະຜູ້ເປັນເຈົ້າຈະເຮັດໃຫ້ດິນແດນເປັນທີ່ແຫ້ງແລ້ງອີກ ດັ່ງກ່ອນຄາວການນິຣະມິດສ້າງ.

12ໃນໂລກນີ້ຈະບໍ່ມີກະສັດປົກຄອງ ແລະພວກຜູ້ນຳກໍຈະໝົດສິ້ນໄປ.

13ກົກໜາມໃຫຍ່ນ້ອຍຈະປົ່ງຂຶ້ນເຕັມຣາຊວັງ ແລະຕາມກຳແພງເມືອງ ແລະທີ່ນັ້ນຈະເປັນບ່ອນຢູ່ຂອງໝາປ່າແລະນົກເຄົ້າ.

14ໃນທີ່ນັ້ນຈະເປັນບ່ອນທ່ອງທ່ຽວຂອງສັດປ່າ ແລະຝູງຜີປີສາດກໍຈະຮ້ອງໃສ່ກັນແລະກັນ. ສັດປະຫລາດ ຈະມາຫາທີ່ພັກເຊົາຢູ່ໃນບ່ອນນັ້ນ.

15ນົກເຄົ້າຈະເຮັດຮັງຟັກໄຂ່ອອກລູກ ແລະລ້ຽງລູກຂອງຕົນໃນທີ່ນັ້ນ. ແຮ້ງຈະບິນມາເທື່ອລະໂຕເພື່ອເຕົ້າໂຮມກັນຢູ່ໃນບ່ອນນັ້ນ.

16ຈົ່ງຄົ້ນເບິ່ງໃນໜັງສືຂອງພຣະເຈົ້າຢາເວ ກ່ຽວກັບສັບພະທຸກສິ່ງທີ່ມີຊີວິດວ່າ ມີກ່າວໄວ້ຢ່າງໃດ. ສັດເຫຼົ່ານີ້ຈະບໍ່ຂາດໄປຈັກໂຕແລະຈະບໍ່ມີໂຕໃດຂາດຄູ່. ພຣະເຈົ້າຢາເວສັ່ງໄວ້ເພື່ອໃຫ້ເປັນດັ່ງນັ້ນ ວິນຍານຂອງພຣະອົງຈະເປັນຜູ້ນຳສັດເຫຼົ່ານີ້ມາເຕົ້າໂຮມກັນ.

17ພຣະອົງທີ່ຈະເປັນຜູ້ແບ່ງປັນດິນແດນໃຫ້ສັດເຫຼົ່ານັ້ນ ແລະແບ່ງສ່ວນໃຫ້. ພວກມັນຈະຢູ່ໃນດິນແດນທຸກຍຸກທຸກສະໄໝ ແລະດິນແດນນັ້ນກໍຈະເປັນຂອງພວກມັນຕະຫລອດໄປ.

← Chapter 33 Jump to: Chapter 35 →