Isaiah 57

Lao Bible 2012 (ພຣະຄຳພີສັກສິ)

← Chapter 56 Jump to: Chapter 58 →

1ຄົນຊອບທຳຕາຍໄປໂດຍບໍ່ມີຜູ້ໃດເຂົ້າໃຈຫລືເອົາໃຈໃສ່ເລີຍ, ແຕ່ເມື່ອເຂົາຕາຍໄປນັ້ນ ບໍ່ມີໂພຍໄພອັນໃດຈະທຳຮ້າຍເຂົາໄດ້.

2ພວກທີ່ດຳເນີນຊີວິດໃນຄວາມທ່ຽງທຳຈະພົບສັນຕິສຸກ ແລະການພັກຜ່ອນໃນຄວາມຕາຍຂອງພວກເຂົາ.

3ພວກຄົນບາບເອີຍ ຈົ່ງມານີ້ ຮັບເອົາການພິພາກສາ ພວກເຈົ້າບໍ່ດີໄປກວ່າພວກໝໍວິຊາອາຄົມ, ຄົນຜິດປະເວນີ ແລະພວກແມ່ຈ້າງນາງເລງ.

4ພວກເຈົ້າຫຍໍ້ຫຍັນຜູ້ໃດກັນໜໍ? ຄົນຂີ້ຕົວະເອີຍ

5ພວກເຈົ້າຂາບໄຫວ້ບັນດາພະແຫ່ງຄວາມອຸດົມສົມບູນ ໂດຍສົມສູ່ກັນທາງເພດຢູ່ລຸ່ມຕົ້ນໄມ້ສັກສິດຂອງພວກເຈົ້າ. ພວກເຈົ້າຖວາຍລູກຂອງພວກເຈົ້າເປັນເຄື່ອງບູຊາຢູ່ໃນຖໍ້າຫີນຂ້າງຫ້ວຍນໍ້າ.

6ພວກເຈົ້າເອົາຫີນກ້ຽງຈາກທີ່ນັ້ນມາເຮັດເປັນຮູບພະເພື່ອຂາບໄຫວ້ບູຊາ. ພວກເຈົ້າໄດ້ຖອກເຫຼົ້າອະງຸ່ນແລະນຳພືດຜົນເປັນເມັດຖວາຍເປັນເຄື່ອງບູຊາແກ່ຮູບພະເຫຼົ່ານີ້. ພວກເຈົ້າຄິດວ່າເຮົາພໍໃຈນຳສິ່ງທັງໝົດເຫຼົ່ານີ້ຊັ້ນບໍ?

7ພວກເຈົ້າໄດ້ຂຶ້ນໄປທີ່ເທິງພູໜ່ວຍສູງໆ ເພື່ອຖວາຍບູຊາແລະສົມສູ່ກັນທາງເພດ.

8ພວກເຈົ້າໄດ້ຕັ້ງຮູບລາມົກໄວ້ຢູ່ຕໍ່ໜ້າປະຕູເຂົ້າບ້ານຂອງພວກເຈົ້າ. ພວກເຈົ້າປະຖິ້ມເຮົາ, ພວກເຈົ້າແກ້ເສື້ອຜ້າອອກ, ແລະກ້າວຂຶ້ນເທິງຕຽງໃຫຍ່ນອນນຳຄູ່ຮັກຂອງພວກເຈົ້າ ຄືຜູ້ທີ່ພວກເຈົ້າໄດ້ຈ່າຍເງິນຄຳໃຫ້ເພື່ອຈະໄດ້ນອນນຳ. ໃນທີ່ນັ້ນ ພວກເຈົ້າອີ່ມໜຳສຳລານໃຈກັບຕັນຫາຂອງພວກເຈົ້າ.

9ພວກເຈົ້າໃສ່ນໍ້າຫອມແລະທານວດສະເໜ່ໄປຂາບໄຫວ້ພະໂມເລັກ. ເພື່ອຈະໄດ້ບັນດາພະມາຂາບໄຫວ້ ພວກເຈົ້າໄດ້ສົ່ງຄະນະທູດໄປສູ່ແດນໄກໄປຮອດແມ່ນແຕ່ແດນຂອງຄົນຕາຍ.

10ພວກເຈົ້າຊອກຫາບັນດາພະຕົນອື່ນ ຈົນພວກເຈົ້າເອງໝົດເຮື່ອໝົດແຮງ ແຕ່ພວກເຈົ້າກໍຍັງບໍ່ຍອມຍົກເລີກ. ພວກເຈົ້າຄິດວ່າບັນດາຮູບລາມົກໃຫ້ກຳລັງພວກເຈົ້າໄດ້; ສະນັ້ນ ພວກເຈົ້າຈຶ່ງບໍ່ຍອມອ່ອນເພຍ.

11ອົງພຣະຜູ້ເປັນເຈົ້າຖາມວ່າ, “ບັນດາພະເຫຼົ່ານີ້ ທີ່ເຮັດໃຫ້ພວກເຈົ້າຢ້ານນັ້ນເປັນຜູ້ໃດ ຈຶ່ງເຮັດໃຫ້ພວກເຈົ້າເວົ້າຕົວະແລະລືມໄລເຮົາໄປຢ່າງໝົດສິ້ນ? ພວກເຈົ້າເຊົາໃຫ້ກຽດເຮົາຍ້ອນເຮົາມິດງຽບຢູ່ຕັ້ງດົນນານຊັ້ນບໍ?

12ພວກເຈົ້າຄິດວ່າສິ່ງທີ່ພວກເຈົ້າເຮັດນັ້ນຖືກຕ້ອງ; ແຕ່ເຮົາຈະເປີດເຜີຍຄວາມປະພຶດຂອງພວກເຈົ້າ ແລະຮູບພະເຫຼົ່ານັ້ນຈະຊ່ວຍຫຍັງພວກເຈົ້າບໍ່ໄດ້.

13ເມື່ອພວກເຈົ້າຮ້ອງຫາໃຫ້ຊ່ວຍເຫລືອ ຈົ່ງໃຫ້ບັນດາຮູບພະຂອງພວກເຈົ້າຊ່ວຍເຫລືອພວກເຈົ້າສາ ລົມພະຍຸພັດມາພຽງເທື່ອດຽວກໍຈະກວາດເອົາບັນດາຮູບພະເຫຼົ່ານີ້ໄປໝົດ ແຕ່ພວກທີ່ໄວ້ວາງໃຈໃນເຮົາຈະອາໄສຢູ່ໃນດິນແດນ ແລະຈະນະມັດສະການເຮົາຢູ່ໃນພຣະວິຫານຂອງເຮົາ.”

14ອົງພຣະຜູ້ເປັນເຈົ້າກ່າວວ່າ, “ໃຫ້ປະຊາຊົນຂອງເຮົາກັບມາຫາເຮົາສາ. ຈົ່ງຍົກຍ້າຍສິ່ງທີ່ກີດຂວາງທຸກຢ່າງຈາກທາງຂອງພວກເຂົາ ຈົ່ງສ້າງຖະໜົນແລະຕຽມຫົນທາງໃຫ້ພ້ອມເຖີດ.

15ເຮົາເປັນພຣະເຈົ້າອົງສູງສຸດ, ອົງບໍຣິສຸດ, ແລະອົງຊົງຊີວິດຢູ່ຕະຫລອດໄປ. ເຮົາຢູ່ໃນສະຖານທີ່ສູງສຸດແລະບໍຣິສຸດ; ແຕ່ເຮົາຢູ່ນຳປະຊາຊົນຜູ້ທີ່ຖ່ອມໃຈແລະຜູ້ທີ່ກັບໃຈໃໝ່ ເພື່ອວ່າເຮົາຈະໄດ້ຟື້ນຟູຈິດວິນຍານ ແລະຄວາມຫວັງຂອງພວກເຂົາຂຶ້ນໃໝ່.

16ເຮົາໄດ້ໃຫ້ຊີວິດແກ່ປະຊາຊົນຂອງເຮົາ ແລະເຮົາຈະບໍ່ສືບຕໍ່ກ່າວຫາຫລືໂກດຮ້າຍພວກເຂົາຕະຫລອດໄປ.

17ເຮົາໂກດຮ້າຍພວກເຂົາ ເພາະການບາບແລະຄວາມໂລບມາກຂອງພວກເຂົາ; ສະນັ້ນ ເຮົາຈຶ່ງໄດ້ລົງໂທດແລະປະຖິ້ມພວກເຂົາ. ແຕ່ພວກເຂົາຍັງດື້ດ້ານແລະສືບຕໍ່ເຮັດຕາມວິຖີທາງຂອງຕົນຢູ່.

18ເຮົາເຫັນວ່າພວກເຂົາໄດ້ປະພຶດຕົນຢ່າງໃດ, ແຕ່ເຮົາກໍຈະປິ່ນປົວພວກເຂົາໃຫ້ດີ. ເຮົາຈະນຳພາແລະຊ່ວຍເຫລືອພວກເຂົາ ແລະເຮົາຈະເລົ້າໂລມອອຍໃຈຄົນທີ່ໂສກເສົ້າເສຍໃຈ.

19ເຮົາໃຫ້ສັນຕິສຸກແກ່ທຸກຄົນ ທັງຜູ້ທີ່ຢູ່ໄກແລະຜູ້ທີ່ຢູ່ໃກ້, ພຣະເຈົ້າຢາເວກ່າວດັ່ງນີ້ ເຮົາຈະປິ່ນປົວປະຊາຊົນຂອງເຮົາໃຫ້ດີ.

20ແຕ່ຄົນຊົ່ວຮ້າຍກໍເປັນດັ່ງທະເລທີ່ປັ່ນປ່ວນ ຊຶ່ງຄື້ນຂອງມັນບໍ່ເຊົາພັດຕີຕາຝັ່ງຈັກເທື່ອ ທັງນຳເອົາຂອງເປິເປື້ອນແລະຂີ້ຕົມມາດ້ວຍ.”

21ພຣະເຈົ້າຂອງເຮົາກ່າວວ່າ, “ຄົນຊົ່ວຮ້າຍຈະບໍ່ໄດ້ຮັບສັນຕິສຸກຈັກເທື່ອ.”

← Chapter 56 Jump to: Chapter 58 →