Isaiah 32

Lao Bible 2012 (ພຣະຄຳພີສັກສິ)

← Chapter 31 Jump to: Chapter 33 →

1ວັນໜຶ່ງຈະມາເຖິງ ຄືຈະມີກະສັດຄົນໜຶ່ງຜູ້ທີ່ປົກຄອງດ້ວຍຄວາມຊອບທຳ ແລະຜູ້ນຳພາຊາດທີ່ປົກຄອງດ້ວຍຄວາມຍຸດຕິທຳ.

2ແຕ່ລະຄົນໃນພວກເຂົານັ້ນ ຈະເປັນດັ່ງບ່ອນຊົ້ນຈາກລົມ ແລະບ່ອນຫລົບລີ້ຈາກພະຍຸ. ພວກເຂົາຈະເປັນດັ່ງສາຍນໍ້າທີ່ຫລັ່ງໄຫລຢູ່ໃນຖິ່ນແຫ້ງແລ້ງກັນດານ ດັ່ງຮົ່ມເງົາໂງ່ນຫີນໃຫຍ່ໃນດິນແດນທີ່ແຫ້ງແລ້ງ.

3ພວກເຂົາຈະມືນຕາເບິ່ງ ແລະງ່ຽງຫູຟັງຄຳຮ້ອງທຸກຕ່າງໆຂອງປະຊາຊົນ.

4ພວກເຂົາຈະບໍ່ຂາດຄວາມອົດທົນອີກຕໍ່ໄປ ແຕ່ພວກເຂົາຈະດຳເນີນການດ້ວຍຄວາມເຂົ້າໃຈ ແລະເວົ້າຈາຢ່າງກົງໄປກົງມາ.

5ບໍ່ມີຜູ້ໃດເລີຍທີ່ຈະຄິດຍົກຍ້ອງຄົນໂງ່ຈ້າຫລືຈະເວົ້າວ່າ, ຄົນອັນທະພານມີໃຈສັດຊື່.

6ຄົນໂງ່ກໍເວົ້າຢ່າງໂງ່ໆ ແລະຄິດຫາເຮັດແຕ່ສິ່ງຊົ່ວໆ. ສິ່ງທີ່ລາວເຮັດ ແລະສິ່ງທີ່ລາວເວົ້ານັ້ນ ເປັນການໝິ່ນປະໝາດພຣະເຈົ້າຢາເວທັງນັ້ນ ແລະລາວກໍບໍ່ເຄີຍໃຫ້ອາຫານແກ່ຄົນທີ່ອຶດຫິວ ແລະໃຫ້ນໍ້າດື່ມແກ່ຄົນທີ່ກະຫາຍ.

7ຄົນໂງ່ຈ້ານັ້ນຊົ່ວຊ້າ ແລະເຮັດແຕ່ສິ່ງທີ່ບໍ່ດີ; ລາວວາງແຜນລ້າງຜານຄົນຍາກຈົນ ໂດຍເວົ້າຕົວະແລະກີດກັ້ນພວກເຂົາ ບໍ່ໃຫ້ໄດ້ຮັບສິດທິທີ່ພວກເຂົາຄວນໄດ້ຮັບ.

8ແຕ່ຄົນທີ່ມີກຽດກະທຳຢ່າງສັດຊື່ ແລະຕັ້ງໝັ້ນຄົງຢູ່ໃນຄວາມຖືກຕ້ອງ.

9ບັນດາຜູ້ຍິງທີ່ໃຊ້ຊີວິດຢູ່ຢ່າງສຸກສະບາຍ ແລະບໍ່ວິຕົກກັງວົນກັບສິ່ງໃດເອີຍ ຈົ່ງຟັງສິ່ງທີ່ຂ້າພະເຈົ້າກ່າວ.

10ດຽວນີ້ ພວກເຈົ້າຄົງອີ່ມໜຳສຳລານໃຈແລ້ວນໍ ແຕ່ປີໜ້າໃນເວລາດຽວກັນນີ້ ພວກເຈົ້າຈະສິ້ນຫວັງເພາະຈະບໍ່ມີໝາກອະງຸ່ນໃຫ້ພວກເຈົ້າເກັບ.

11ພວກເຈົ້າໃຊ້ຊີວິດຢູ່ຢ່າງສຸກສະບາຍ ບໍ່ມີຄວາມວິຕົກກັງວົນຫຍັງເລີຍ; ແຕ່ບັດນີ້ ຈົ່ງຢ້ານກົວຈົນສັ່ນເຊັ່ນສາເຖີດ ຈົ່ງແກ້ເຄື່ອງນຸ່ງອອກ ແລະເອົາຜ້າຂາດມັດແອວໄວ້.

12ຈົ່ງຕີເອິກຮ້ອງໄຫ້ຢ່າງຂົມຂື່ນສາ ເພາະທົ່ງນາແລະສວນອະງຸ່ນທີ່ອຸດົມສົມບູນໄດ້ຖືກທຳລາຍສາແລ້ວ

13ແລະພຸ່ມໜາມນ້ອຍໃຫຍ່ກຳລັງຈະເກີດຂຶ້ນໃນດິນແດນປະຊາຊົນຂອງເຮົາ. ຈົ່ງຮ້ອງໄຫ້ຮໍ່າໄຮເຖິງເຮືອນທີ່ເຄີຍຢູ່ຢ່າງຜາສຸກ ແລະເຖິງເມືອງທີ່ເຕັມໄປດ້ວຍຊີວິດຊີວານັ້ນສາ.

14ແມ່ນແຕ່ຣາຊວັງກໍຈະຖືກປະຖິ້ມ ແລະເມືອງຫລວງກໍຈະຮ້າງຫວ່າງເປົ່າຢ່າງໝົດສິ້ນ. ເຮືອນແລະປ້ອມປ້ອງກັນທັງຫລາຍຈະຮົກຮ້າງເພພັງຕະຫລອດໄປ. ລໍປ່າຈະທ່ຽວຫລິ້ນຢູ່ທີ່ນັ້ນ ແລະຝູງແກະກໍຈະກິນຫຍ້າຢູ່ທີ່ນັ້ນ.

15ແຕ່ພຣະເຈົ້າຈະສົ່ງພຣະວິນຍານຂອງພຣະອົງມາໃຫ້ພວກເຮົາອີກເທື່ອໜຶ່ງ. ດິນທີ່ປູກຝັງບໍ່ໄດ້ກໍຈະກາຍເປັນດິນທີ່ປູກຝັງໄດ້ ແລະທົ່ງນາກໍຈະຜະລິດຜົນລະປູກໄດ້ຢ່າງອຸດົມສົມບູນ.

16ທຸກໆບ່ອນໃນດິນແດນຈະມີແຕ່ຄວາມຊອບທຳ ແລະຄວາມຍຸດຕິທຳ.

17ຄວາມສະຫງົບສຸກ ແລະຄວາມປອດໄພຈະມີຕະຫລອດໄປ ເພາະທຸກຄົນຈະເຮັດໃນສິ່ງທີ່ຖືກຕ້ອງ.

18ປະຊາຊົນຂອງພຣະເຈົ້າຈະບໍ່ວິຕົກກັງວົນກັບສິ່ງໃດໆຕໍ່ໄປ ແລະບ້ານເຮືອນຂອງພວກເຂົາກໍຈະມີແຕ່ສັນຕິສຸກ ແລະຄວາມປອດໄພ.

19ແຕ່ໝາກເຫັບຈະຕົກໃນປ່າ ແລະເມືອງກໍຈະເພພັງລົງ.

20ທຸກຄົນຈະມີຄວາມສຸກຫລາຍສໍ່າໃດ ໃນເມື່ອຢູ່ທີ່ນັ້ນມີນໍ້າຢ່າງສົມບູນສຳລັບເຄື່ອງປູກຂອງຝັງ ແລະມີທົ່ງຫຍ້າໃຫ້ລໍ ແລະຝູງແກະກິນຫຍ້າຢ່າງປອດໄພ.

← Chapter 31 Jump to: Chapter 33 →