Isaiah 2

Lao Bible 2012 (ພຣະຄຳພີສັກສິ)

← Chapter 1 Jump to: Chapter 3 →

1ຕໍ່ໄປນີ້ ແມ່ນຖ້ອຍຄຳທີ່ພຣະເຈົ້າໄດ້ບອກເອຊາຢາລູກຊາຍຂອງອາໂມດ ກ່ຽວກັບຢູດາຍແລະນະຄອນເຢຣູຊາເລັມວ່າ:

2ໃນວັນທັງຫລາຍທີ່ຈະໝູນວຽນມາເຖິງ ພູບ່ອນທີ່ຕັ້ງພຣະວິຫານຂອງພຣະເຈົ້າຢາເວຈະສູງກວ່າທຸກໆແຫ່ງ ພູນັ້ນຈະຕັ້ງຢູ່ສູງສົ່ງເທິງເນີນພູທັງໝົດ ດັ່ງນັ້ນ ຫລາຍຊົນຊາດຈຶ່ງຈະຫລັ່ງມາສູ່ທີ່ນັ້ນ

3ປະຊາຊົນຫລາຍຊົນຊາດຈະພາກັນກ່າວວ່າ, “ໃຫ້ພວກເຮົາຂຶ້ນໄປເທິງພູເຂົາຂອງພຣະເຈົ້າຢາເວເດີ ສູ່ວິຫານຂອງພຣະເຈົ້າແຫ່ງຊາດອິດສະຣາເອນ ພຣະອົງຈະສັ່ງສອນພວກເຮົາເຖິງສິ່ງທີ່ພຣະອົງຢາກໃຫ້ເຮັດ. ພວກເຮົາຈະພາກັນຍ່າງຕາມຮ່ອມແຫ່ງຫົນທາງ ທີ່ພຣະອົງໄດ້ເລືອກສັນໄວ້ແລ້ວນັ້ນ. ຖ້ອຍຄຳຂອງພຣະເຈົ້າຢາເວມາແຕ່ນະຄອນເຢຣູຊາເລັມ ແຕ່ພູເຂົາຊີໂອນທີ່ພຣະອົງກ່າວແກ່ປະຊາຊົນນັ້ນ.”

4ພຣະອົງຈະຕັດສິນການຂັດແຍ່ງ ໃນທ່າມກາງຊົນຊາດທັງຫລາຍ. ພວກເຂົາຈະຕີດາບເປັນໝາກສົບໄຖ ແລະຕີຫອກເປັນມີດຕອນຕົ້ນໄມ້. ຊົນຊາດທັງຫລາຍຈະບໍ່ເຮັດເສິກອີກຕໍ່ໄປ ຈະບໍ່ຕຽມເຂົ້າສູ່ການສົງຄາມອີກຈັກເທື່ອ.

5ບັດນີ້ ເຊື້ອສາຍຂອງຢາໂຄບເອີຍ ໃຫ້ພວກເຮົາເດີນໄປໃນຄວາມສະຫວ່າງ ຊຶ່ງພຣະເຈົ້າຢາເວໄດ້ມອບໃຫ້ນັ້ນເທີ້ນ.

6ໂອພຣະເຈົ້າເອີຍ ພຣະອົງໄດ້ປະຖິ້ມປະຊາຊົນຂອງພຣະອົງສາແລ້ວ ຄືເຊື້ອສາຍຂອງຢາໂຄບ ດິນແດນເຕັມແຕ່ການໃຊ້ເວດມົນຄາຖາ ຈາກທິດຕາເວັນອອກແລະຈາກຟີລິດສະຕິນ. ປະຊາຊົນຕ່າງກໍເຮັດຕາມປະເພນີຂອງຊາວຕ່າງຊາດ.

7ດິນແດນຂອງພວກເຂົານັ້ນເຕັມໄປດ້ວຍເງິນແລະຄຳ ແລະຊັບສົມບັດຂອງພວກເຂົາກໍບໍ່ໝົດເປັນຈັກເທື່ອ. ດິນແດນຂອງພວກເຂົາເຕັມໄປດ້ວຍຝູງມ້າ ແລະລົດຮົບຂອງພວກເຂົາກໍບໍ່ໝົດເປັນຈັກເທື່ອ.

8ດິນແດນຂອງພວກເຂົາເຕັມໄປດ້ວຍຮູບເຄົາຣົບ ແລະຕ່າງກໍຂາບໄຫວ້ວັດຖຸທີ່ຖືກສ້າງຂຶ້ນດ້ວຍມືຂອງພວກເຂົາເອງ.

9ທຸກຄົນຈະຖືກລົດກຽດແລະຖືກອັບອາຍຂາຍໜ້າ, ຂໍຢ່າຍົກໂທດໃຫ້ພວກເຂົາເລີຍ.

10ພວກເຂົາຈະລີ້ຢູ່ໃນຖໍ້າ ຢູ່ໃນໂງ່ນຫີນຕາມເນີນພູ ຫລືຂຸດຮູຢູ່ໃນດິນ ເພື່ອຊອກຫາທີ່ຈະປົບໜີຈາກຄວາມໂກດຮ້າຍຂອງພຣະເຈົ້າຢາເວ ແລະຫລົບລີ້ຈາກຣິດອຳນາດແລະສະຫງ່າຣາສີຂອງພຣະອົງ

11ວັນໜຶ່ງຈະມາເຖິງ ເມື່ອຄວາມອວດອົ່ງຈອງຫອງຂອງມະນຸດຈະສິ້ນສຸດລົງ ແລະຄວາມອວດດີຂອງພວກເຂົາຈະຖືກທຳລາຍ. ແລ້ວແມ່ນພຣະເຈົ້າຢາເວເທົ່ານັ້ນ ທີ່ຈະໄດ້ຮັບກຽດແລະຄຳຍົກຍໍສັນລະເສີນ.

12ໃນວັນນັ້ນ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ຈະເຮັດໃຫ້ທຸກຄົນທີ່ມີອຳນາດ ທຸກຄົນທີ່ອວດອົ່ງ ແລະທຸກຄົນທີ່ຈອງຫອງນັ້ນໄດ້ຖ່ອມຕົວລົງ.

13ພຣະອົງຈະທຳລາຍຕົ້ນແປກສູງແຫ່ງເລບານອນ ແລະຕົ້ນໂອກທັງໝົດຢູ່ໃນດິນແດນລົງ.

14ພຣະອົງຈະເຮັດໃຫ້ພູສູງທຸກໜ່ວຍພ້ອມທັງເນີນພູທັງຫລາຍ

15ຫໍຄອຍສູງແລະປ້ອມປ້ອງກັນເມືອງທຸກແຫ່ງເຫຼົ່ານັ້ນໃຫ້ຮາບກ້ຽງ.

16ພຣະອົງຈະເຮັດໃຫ້ແມ່ນແຕ່ເຮືອໃຫຍ່ແລະງາມທີ່ສຸດຈົມ.

17ຄວາມອວດອົ່ງຈອງຫອງຂອງມະນຸດຈະຈົບລົງ ແລະຄວາມອວດດີຂອງມະນຸດຈະຖືກທຳລາຍ. ຮູບເຄົາຣົບທັງຫລາຍຈະສູນສິ້ນໄປ ແລະແມ່ນພຣະເຈົ້າຢາເວເທົ່ານັ້ນ ທີ່ຈະໄດ້ຮັບກຽດແລະຄຳຍົກຍໍສັນລະເສີນໃນວັນນັ້ນ.

19ປະຊາຊົນຈະລີ້ຢູ່ໃນຖໍ້າຢູ່ໃນໂງ່ນຫີນຕາມເນີນພູ ຫລືຂຸດຮູຢູ່ໃນດິນ ເພື່ອຊອກຫາທີ່ຈະປົບໜີຈາກຄວາມໂກດຮ້າຍຂອງພຣະເຈົ້າຢາເວ ແລະຫລົບລີ້ຈາກຣິດອຳນາດແລະສະຫງ່າຣາສີຂອງພຣະອົງ ເມື່ອພຣະອົງມາເຮັດໃຫ້ໂລກສັ່ນສະເທືອນ.

20ເມື່ອວັນນັ້ນມາເຖິງ ພວກເຂົາຈະໂຍນຮູບເຄົາຣົບເປັນເງິນເປັນຄຳ ທີ່ພວກເຂົາໄດ້ສ້າງຂຶ້ນນັ້ນຖິ້ມເສຍ ແລະປະໃຫ້ເປັນບ່ອນຢູ່ຂອງໂຕໜູແລະໂຕເຈຍ.

21ເມື່ອພຣະເຈົ້າຢາເວມາເຮັດໃຫ້ໂລກສັ່ນສະເທືອນ ປະຊາຊົນຈະລີ້ຢູ່ໃນຖໍ້າ ຢູ່ໃນໂງ່ນຫີນຕາມເນີນພູ ຫລືຂຸດຮູຢູ່ໃນດິນ ເພື່ອຊອກຫາທີ່ຈະປົບໜີຈາກຄວາມໂກດຮ້າຍຂອງພຣະອົງ ແລະຫລົບລີ້ຈາກຣິດອຳນາດແລະສະຫງ່າຣາສີຂອງພຣະອົງ.

22ຢ່າເຊື່ອໝັ້ນຕາຍໃຈໃນມະນຸດທີ່ຕາຍເປັນ. ພວກເຂົາມີຄ່າຫຍັງແດ່?

← Chapter 1 Jump to: Chapter 3 →