Isaiah 54

Lao Bible 2012 (ພຣະຄຳພີສັກສິ)

← Chapter 53 Jump to: Chapter 55 →

1ເຢຣູຊາເລັມເອີຍ ເຈົ້ານັ້ນເປັນດັ່ງຍິງເປັນໝັນ ແຕ່ບັດນີ້ ຈົ່ງຮ້ອງລຳທຳເພງຍິນດີກັນເຖີດ ບັດນີ້ ເຈົ້າຈະມີລູກຕື່ມຢ່າງຫລວງຫລາຍ ລື່ນກວ່າຍິງຜູ້ທີ່ຜົວບໍ່ເຄີຍໜີປະຈັກເທື່ອ. ພຣະເຈົ້າຢາເວກ່າວດັ່ງນີ້ແຫຼະ.

2ຈົ່ງເຮັດຜ້າເຕັນຂອງເຈົ້າໃຫ້ກວ້າງຂວາງ, ຕໍ່ເຊືອກເຕັນໃຫ້ຍາວທັງສຽບຫລັກລົງໃຫ້ແໜ້ນ.

3ເຈົ້າຈະຂະຫຍາຍເຂດແດນຂອງເຈົ້າໄປທຸກທິດທາງ ຄົນຂອງເຈົ້າຈະໄດ້ດິນແດນໃກ້ຄຽງຄືນມາອີກ ເປັນດິນແດນທີ່ຊາດອື່ນໄດ້ຢຶດໃນປະຈຸບັນ ເມືອງຮົກຮ້າງກໍຈະເຕັມແຕ່ຄົນອາໄສຢູ່.

4ຢ່າສູ່ຢ້ານ ເພາະເຈົ້າຈະບໍ່ຖືກອັບອາຍອີກເລີຍ ເຈົ້າຈະບໍ່ໄດ້ເສຍກຽດສັກສີແຕ່ຢ່າງໃດ. ເຈົ້າຈະລືມຄວາມອາຍໃນໄວສາວ ເຈົ້າຈະບໍ່ຈົດຈຳຄຳຕ້ອງຕິໃນຄາວເຈົ້າເປັນໝ້າຍ.

5ພຣະຜູ້ສ້າງຂອງເຈົ້າຈະເປັນຄືຜົວຂອງເຈົ້າເດີ ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ແມ່ນພຣະນາມຂອງພຣະອົງ. ແລະພຣະຜູ້ໄຖ່ໃຫ້ພົ້ນຂອງເຈົ້າຄືພຣະເຈົ້າອົງບໍຣິສຸດຂອງຊາດອິດສະຣາເອນ ພຣະອົງຊົງປົກຄອງທົ່ວທັງໂລກນີ້.

6ອິດສະຣາເອນເອີຍ ເຈົ້າເປັນຄືເມຍສາວຜູ້ໜຶ່ງ ທີ່ຖືກຜົວປະແລະອຸກອັ່ງຄັ່ງໃຈຈົນສຸດຂີດ. ແຕ່ພຣະເຈົ້າຢາເວເອີ້ນເຈົ້າໃຫ້ກັບຄືນມາ ຈົ່ງກັບມາຫາພຣະອົງຜູ້ທີ່ເວົ້າກັບເຈົ້າວ່າ,

7“ເຮົາໄດ້ປະຮ້າງເຈົ້າພຽງແຕ່ໄລຍະຊົ່ວຄາວ ເຮົາຈະເອົາເຈົ້າຄືນດ້ວຍຄວາມຮັກອັນສຸດຫົວໃຈ.

8ເຮົາປິ່ນໜ້າດ້ວຍຄວາມໂກດຮ້າຍພຽງຊົ່ວຄາວ ເຮົາບໍ່ໄດ້ແນມເບິ່ງໜ້າເຈົ້າພຽງໄລຍະໜຶ່ງ ແຕ່ເຮົາຈະສຳແດງຄວາມຮັກຕໍ່ເຈົ້າສືບໄປ.” ພຣະເຈົ້າຢາເວພຣະຜູ້ໄຖ່ກ່າວດັ່ງນີ້ແຫລະ.

9“ເຮົາໄດ້ສັນຍາໄວ້ໃນສະໄໝຂອງໂນອາວ່າ ເຮົາຈະບໍ່ໃຫ້ນໍ້າຖ້ວມແຜ່ນດິນໂລກອີກເລີຍ. ບັດນີ້ ເຮົາສັນຍາວ່າຈະບໍ່ໂກດຮ້າຍເຈົ້າອີກຕໍ່ໄປ ເຮົາຈະບໍ່ຕິຕຽນຫລືຈະບໍ່ລົງໂທດເຈົ້າອີກ.

10ພູໃຫຍ່ແລະພູນ້ອຍອາດພັງທະລາຍລົງ ແຕ່ຄວາມຮັກຂອງເຮົາໝັ້ນຄົງບໍ່ສິ້ນສຸດໄດ້; ເຮົາຈະຮັກສາສັນຍາຄວາມສະຫງົບສຸກໄວ້ສືບໄປ.” ພຣະເຈົ້າຢາເວຜູ້ຊົງເມດຕາເຈົ້າກ່າວດັ່ງນີ້ແຫລະ.

11ອົງພຣະຜູ້ເປັນເຈົ້າກ່າວວ່າດັ່ງນີ້: “ໂອ ເຢຣູຊາເລັມເອີຍ ເຈົ້າທົນທຸກແລ້ວ ນະຄອນຂາດທີ່ເພິ່ງຫາຜູ້ເລົ້າໂລມໃຈກໍບໍ່ມີ ດ້ວຍຫີນປະເສີດເຮົາຈະສ້າງຮາກຖານເຈົ້າໃໝ່.

12ດ້ວຍທັບທີມອັນແທ້ ເຮົາຈະສ້າງຫໍຄອຍ ດ້ວຍແກ້ວເຈຍລະໄນຈະສ້າງປະຕູເມືອງຂຶ້ນ. ດ້ວຍເພັດນິນຈິນດາຈະສ້າງກຳແພງເມືອງ ໃຫ້ເປັນປ້ອມລ້ອມກຳແພງປ້ອງກັນເຈົ້າໄວ້.

13ສ່ວນປະຊາຊົນຂອງເຈົ້າເຮົາຈະສັ່ງສອນພວກເຂົາໂດຍພຣະເຈົ້າຢາເວ ຈະໃຫ້ມີສັນຕິສຸກແລະໃຫ້ຈະເລີນຮຸ່ງເຮືອງດ້ວຍ.

14ຄວາມຍຸດຕິທຳແລະຄວາມຖືກຕ້ອງຈະໃຫ້ເຈົ້າເຂັ້ມແຂງຂຶ້ນ ເຈົ້າຈະພົ້ນຈາກການກົດຂີ່ແລະຈາກຄວາມຢ້ານ.

15ຖ້າຜູ້ໃດໂຈມຕີເຈົ້າ ກໍເຮັດໂດຍທີ່ເຮົາບໍ່ເຫັນດີ ຜູ້ໃດຂັດຂວາງຕໍ່ສູ້ເຈົ້າ ກໍຈະລົ້ມລົງ.

16ເຮົາສ້າງຊ່າງຕີເຫລັກເປົ່າໄຟເຮັດອາວຸດ ເຮົາສ້າງທະຫານໃຫ້ໃຊ້ອາວຸດຂ້າຟັນກັນ.

17ແຕ່ບໍ່ມີອາວຸດໃດໆທີ່ທຳຮ້າຍເຈົ້າໄດ້ເລີຍ ເຈົ້າຈະມີຄຳຕອບແກ່ທຸກຄົນທີ່ຟ້ອງເຈົ້າ. ເຮົາຈະປ້ອງກັນຜູ້ຮັບໃຊ້ຂອງເຮົາໃຫ້ມີໄຊ.” ພຣະເຈົ້າຢາເວໄດ້ກ່າວດັ່ງນີ້ແຫລະ.

← Chapter 53 Jump to: Chapter 55 →