Isaiah 39

Lao Bible 2012 (ພຣະຄຳພີສັກສິ)

← Chapter 38 Jump to: Chapter 40 →

1ໃນເວລາດຽວກັນນັ້ນ ເມໂຣດັກບາລາດານກະສັດແຫ່ງບາບີໂລນ ລູກຊາຍຂອງບາລາດານໄດ້ຍິນວ່າກະສັດເຮເຊກີຢາລົ້ມປ່ວຍ; ດັ່ງນັ້ນ ເພິ່ນຈຶ່ງສົ່ງຈົດໝາຍແລະຂອງຂວັນມາໃຫ້.

2ກະສັດເຮເຊກີຢາໄດ້ຕ້ອນຮັບຄະນະທູດເປັນຢ່າງດີ ແລະພາເລາະຊົມບ່ອນຮັກສາຊັບສົມບັດຂອງຕົນເຊັ່ນ: ເງິນ, ຄຳ, ເຄື່ອງເທດກັບເຄື່ອງຫອມ ແລະອາວຸດຍຸດທະພັນທັງໝົດໃນກອງທັບ. ບໍ່ມີບ່ອນໃດໃນຄັງມ້ຽນເຄື່ອງຫລືບ່ອນອື່ນໆໃນຣາຊອານາຈັກ ທີ່ເພິ່ນບໍ່ໄດ້ພາພວກເຂົາເລາະຊົມ.

3ແລ້ວຜູ້ທຳນວາຍເອຊາຢາກໍໄດ້ມາຫາເຈົ້າເຮເຊກີຢາ ແລະຖາມເພິ່ນວ່າ, “ຄົນເຫຼົ່ານີ້ມາແຕ່ໃສ ແລະພວກເຂົາເວົ້າຫຍັງແດ່ກັບທ່ານ?” ເຈົ້າເຮເຊກີຢາໄດ້ຕອບວ່າ, “ພວກເຂົາມາແຕ່ປະເທດໄກ ຄືມາຈາກບາບີໂລນ.”

4ເອຊາຢາຖາມອີກວ່າ, “ພວກເຂົາໄດ້ເຫັນຫຍັງແດ່ໃນວັງ?” ເພິ່ນຕອບວ່າ, “ພວກເຂົາເຫັນໝົດທຸກສິ່ງ ບໍ່ມີບ່ອນໃດໃນຄັງມ້ຽນເຄື່ອງທີ່ເຮົາບໍ່ໄດ້ພາພວກເຂົາເລາະຊົມ.”

5ແລ້ວເອຊາຢາກໍບອກກະສັດວ່າ, “ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ກ່າວວ່າ

6ເວລາມາເຖິງແລ້ວທີ່ທຸກໆສິ່ງໃນວັງຂອງທ່ານ ຄືທຸກສິ່ງທີ່ບັນພະບຸລຸດຂອງທ່ານໄດ້ສະສົມໄວ້ຈົນຮອດວັນນີ້ ຈະຖືກຂົນໄປບາບີໂລນ. ຈະບໍ່ມີສິ່ງໃດເຫຼືອຢູ່ເລີຍ. ພຣະເຈົ້າຢາເວກ່າວດັ່ງນີ້ແຫຼະ.

7ພວກທີ່ເປັນເຊື້ອສາຍແທ້ຂອງທ່ານບາງຄົນຈະຖືກຈັບໄປເປັນຊາຍຕອນ ເພື່ອຮັບໃຊ້ຢູ່ໃນວັງຂອງກະສັດແຫ່ງບາບີໂລນ.”

8ກະສັດເຮເຊກີຢາໄດ້ເຂົ້າໃຈເລື່ອງນີ້ໂດຍຕີຄວາມໝາຍເອົາວ່າ ໃນຣາຊການຂອງເພິ່ນນັ້ນຈະມີຄວາມສະຫງົບສຸກ ແລະມີຄວາມໝັ້ນຄົງດີ; ສະນັ້ນ ເພິ່ນຈຶ່ງຕອບເອຊາຢາວ່າ, “ຖ້ອຍຄຳທີ່ພຣະເຈົ້າຢາເວໄດ້ໃຫ້ເຈົ້າ ນຳມາບອກເຮົານັ້ນດີຫລາຍ.”

← Chapter 38 Jump to: Chapter 40 →