Isaiah 8

Lao Bible 2012 (ພຣະຄຳພີສັກສິ)

← Chapter 7 Jump to: Chapter 9 →

1ພຣະເຈົ້າຢາເວໄດ້ກ່າວແກ່ຂ້າພະເຈົ້າວ່າ, “ຈົ່ງເອົາປ້າຍໃຫຍ່ແຜ່ນໜຶ່ງມາ ແລະຂຽນໜັງສືໂຕໃຫຍ່ໆໃສ່ໃນນັ້ນ ວ່າ: ‘ລົງມືປຸ້ນທັນທີ ໄດ້ຂອງປຸ້ນມາໄວ.’

2ແລ້ວໃຫ້ເອົາຄົນທີ່ໄວ້ໃຈໄດ້ສອງຄົນ ຄືປະໂຣຫິດອູຣີຢາແລະເຊກາຣີຢາລູກຊາຍຂອງເຢເບເຣກີຢາ ມາເພື່ອເປັນພະຍານ.”

3ຕໍ່ມາ ເມຍຂອງຂ້າພະເຈົ້າກໍໄດ້ຖືພາແລະເກີດລູກຊາຍຜູ້ໜຶ່ງ. ພຣະເຈົ້າຢາເວໄດ້ກ່າວແກ່ຂ້າພະເຈົ້າວ່າ, “ຈົ່ງໃສ່ຊື່ເດັກນັ້ນວ່າ ‘ລົງມືປຸ້ນທັນທີ ໄດ້ຂອງປຸ້ນມາໄວ.’

4ກ່ອນເດັກນ້ອຍໃຫຍ່ຂຶ້ນມາພໍຮູ້ຈັກເອີ້ນ ‘ແມ່’ ແລະ ‘ພໍ່’ ຊັບສົມບັດທັງໝົດຢູ່ໃນນະຄອນດາມັສກັດ ແລະສິ່ງທີ່ພວກເຂົາປຸ້ນມາໄດ້ຈາກນະຄອນຊາມາເຣຍ ກໍຈະຖືກກະສັດອັດຊີເຣຍຢຶດໄປໝົດ.”

5ພຣະເຈົ້າຢາເວໄດ້ກ່າວແກ່ຂ້າພະເຈົ້າອີກ.

6ພຣະອົງບອກວ່າ, “ຍ້ອນປະຊາຊົນເຫຼົ່ານີ້ໄດ້ປະຕິເສດ ສາຍນໍ້າທີ່ງຽບສະຫງັດຈາກຫ້ວຍນໍ້າຊີໂລອາ ແລະສັ່ນເຊັນ ຕໍ່ໜ້າກະສັດເຣຊິນແລະກະສັດເປກາ

7ດັ່ງນັ້ນ ອົງພຣະຜູ້ເປັນເຈົ້າຈະໃຫ້ກະສັດອັດຊີເຣຍພ້ອມກອງທັບທັງໝົດຂອງລາວ ມາໂຈມຕີຢູດາຍ. ກອງທັບນີ້ຈະບຸກໜ້າໄປດັ່ງແມ່ນໍ້າເອີຟຣັດໄຫລນອງລົ້ນຕາຝັ່ງ.

8ທະຫານອັດຊີເຣຍຈະບຸກໂຈມຕີຢູດາຍດັ່ງຖືກກະແສນໍ້າພັດ ແລະຖ້ວມບ່າໄຫລ່ສູງຂຶ້ນໄປຈົນປົກຄຸມເອົາໝົດທຸກສິ່ງ.” ພຣະເຈົ້າສະຖິດຢູ່ນຳພວກເຮົາ ປີກຂອງພຣະອົງພືອອກເພື່ອປົກປ້ອງດິນແດນໄວ້.

9ຊົນຊາດຂີ້ຢ້ານທັງຫລາຍເອີຍ ຈົ່ງເຂົ້າມາເຕົ້າໂຮມກັນ ບັນດາປະເທດທີ່ຢູ່ຫ່າງໄກເອີຍ ຈົ່ງຟັງເທີ້ນ. ຕຽມພ້ອມສູ້ຮົບແຕ່ພັດຢ້ານກົວ ແມ່ນແລ້ວຕຽມພ້ອມແຕ່ພັດຢ້ານກົວ

10ວາງແຜນຂອງເຈົ້າໄວ້ສາ, ແຕ່ແຜນການນັ້ນຈະບໍ່ສຳເລັດຈັກເທື່ອ. ປຶກສາກັນຫລາຍໆ, ແຕ່ການປຶກສານັ້ນຈະບໍ່ມີປະໂຫຍດຫຍັງໝົດ ເພາະພຣະເຈົ້າສະຖິດຢູ່ກັບພວກເຮົາ.

11ພຣະເຈົ້າຢາເວໄດ້ເຕືອນຂ້າພະເຈົ້າ ດ້ວຍຣິດອຳນາດອັນຍິ່ງໃຫຍ່ຂອງພຣະອົງ ບໍ່ໃຫ້ປະພຶດຕາມທາງທີ່ຊົນຊາດນີ້ກຳລັງປະພຶດກັນຢູ່. ພຣະອົງບອກວ່າ,

12“ຢ່າສູ່ຮ່ວມແຜນການກະບົດນຳປະຊາຊົນ ແລະຢ່າສູ່ຢ້ານສິ່ງທີ່ພວກເຂົາຢ້ານ.

13ຈົ່ງຈື່ຈຳໄວ້ວ່າພຣະເຈົ້າຢາເວອົງຊົງຣິດອຳນາດຍິ່ງໃຫຍ່ຊົງບໍຣິສຸດ; ຈົ່ງຢ້ານຢຳແລະຢ້ານກົວພຣະອົງເຖີດ.

14ແລ້ວພຣະອົງຈະເປັນສະຖານບໍຣິສຸດແລະເປັນດັ່ງຫີນທີ່ໃຫ້ປະຊາຊົນຕຳສະດຸດ ແລະເປັນດັ່ງແຮ້ວທີ່ຈະດັກຈັບເອົາ ປະຊາຊົນໃນອານາຈັກຢູດາຍ ແລະອິດສະຣາເອນ ພ້ອມທັງຊາວນະຄອນເຢຣູຊາເລັມດ້ວຍ.

15ຫລາຍຄົນຈະຕຳສະດຸດ; ພວກເຂົາຈະລົ້ມລົງແລະຈະຖືກຢຽບຢໍ່າ. ພວກເຂົາຈະຖືກບ້ວງແຮ້ວແລະຈະໜີໄປບໍ່ພົ້ນ.”

16ພວກສາວົກຂອງເຮົາເອີຍ ພວກເຈົ້າຕ້ອງເຝົ້າລະວັງແລະຮັກສາຖ້ອຍຄຳ ທີ່ພຣະເຈົ້າໄດ້ມອບໃຫ້ຂ້າພະເຈົ້າ.

17ພຣະເຈົ້າຢາເວລີ້ພຣະອົງເອງຈາກປະຊາຊົນຂອງພຣະອົງ ແຕ່ຂ້າພະເຈົ້າໄວ້ວາງໃຈໃນພຣະອົງ ແລະມອບຄວາມຫວັງໄວ້ໃນພຣະອົງ.

18ຂ້າພະເຈົ້າກັບພວກລູກໆທີ່ພຣະເຈົ້າຢາເວໄດ້ມອບໃຫ້ນັ້ນໄດ້ຢູ່ທີ່ນີ້. ພຣະເຈົ້າຢາເວອົງຊົງຣິດອຳນາດຍິ່ງໃຫຍ່ ອົງທີ່ນັ່ງຢູ່ເທິງບັນລັງທີ່ພູເຂົາຊີໂອນ ໄດ້ໃຊ້ພວກເຮົາໃຫ້ເປັນຖ້ອຍຄຳອັນມີຊີວິດ ເພື່ອປະຊາຊົນອິດສະຣາເອນ.

19ແຕ່ພວກເຂົາຈະບອກພວກເຈົ້າວ່າ, “ໃຫ້ຖາມເອົາຄວາມນຳພວກໝໍມໍ ແລະພວກໝໍຜີຜູ້ທີ່ເວົ້າພຶມພໍ່າຢູ່ໃນລຳຄໍ.” ບໍ່ຄວນບໍທີ່ປະຊາຊົນຈະຕ້ອງຖາມເອົາຄວາມນຳພຣະເຈົ້າຂອງພວກເຂົາ ແລະຄວນຢູ່ບໍທີ່ຈະໄປຖາມເອົາຄວາມນຳຄົນຕາຍເພື່ອຄົນເປັນ.

20ພວກເຈົ້າຕ້ອງຕອບພວກເຂົາວ່າ, “ຈົ່ງຟັງສິ່ງທີ່ອົງພຣະຜູ້ເປັນເຈົ້າກຳລັງສັ່ງສອນພວກເຈົ້າ ຢ່າສູ່ຟັງຄວາມຂອງໝໍຜີ ເພາະສິ່ງທີ່ເຂົາບອກພວກເຈົ້າໃຫ້ເຮັດນັ້ນມັນບໍ່ດີ.”

21ປະຊາຊົນຈະພາກັນຊັດເຊພະເນຈອນໄປຢູ່ທົ່ວປະເທດ ທັງສິ້ນຫວັງ ແລະອຶດຢາກ. ເພາະຄວາມອຶດຢາກ ແລະຄວາມໂກດຮ້າຍ ພວກເຂົາຈະປ້ອຍດ່າກະສັດແລະພຣະເຈົ້າຂອງຕົນ. ພວກເຂົາອາດຈະເງີຍໜ້າຂຶ້ນສູ່ຟ້າຫລືກົ້ມໜ້າລົງສູ່ດິນ

22ແຕ່ພວກເຂົາຈະບໍ່ເຫັນຫຍັງເລີຍ ມີແຕ່ຄວາມເດືອດຮ້ອນແລະຄວາມມືດເທົ່ານັ້ນ ຄືຄວາມມືດອັນໜ້າຢ້ານກົວຍິ່ງ ຊຶ່ງພວກເຂົາຕ້ອງພົບ. ພວກເຂົາບໍ່ມີທາງທີ່ຈະຫລົບໜີຈາກຄວາມເດືອດຮ້ອນອັນນີ້ໄດ້ເລີຍ.

← Chapter 7 Jump to: Chapter 9 →