Isaiah 60

Lao Bible 2012 (ພຣະຄຳພີສັກສິ)

← Chapter 59 Jump to: Chapter 61 →

1ເຢຣູຊາເລັມ ຈົ່ງລຸກຂຶ້ນສ່ອງແຈ້ງດັ່ງດວງຕາເວັນ ພຣະເຈົ້າຢາເວຈະໃຫ້ສະຫງ່າຣາສີສ່ອງໃສ່ເຈົ້າ

2ສ່ວນຊົນຊາດອື່ນໆນັ້ນ ມືດຈະປົກຄຸມພວກເຂົາ ແຕ່ສຳລັບເຈົ້າເອງແສງແຈ້ງຈະສ່ອງໃສ່ເຈົ້າ; ເປັນແສງແຈ້ງທີ່ມາຈາກພຣະເຈົ້າຢາເວ ຄືພຣະອົງຈະມາຢູ່ນຳດ້ວຍສະຫງ່າຣາສີນັ້ນ.

3ແສງແຈ້ງຂອງເຈົ້າຈະນຳບັນດາຊົນຊາດເຂົ້າມາ ກະສັດຈະເຂົ້າສູ່ແສງແຈ້ງໃນວັນໃໝ່ຂອງເຈົ້າ.

4ຈົ່ງເບິ່ງຮອບຕົວເຈົ້າ ແລະເຫັນຫຍັງເກີດຂຶ້ນແດ່ ຄືປະຊາຊົນຂອງເຈົ້າທັງໝົດໄດ້ເຕົ້າໂຮມກັນກັບຄືນມາ ພວກລູກຊາຍຂອງເຈົ້າຈະມາຈາກທີ່ຫ່າງໄກ ພວກລູກສາວຂອງເຈົ້າຈະຖືກອູ້ມມາດັ່ງເດັກນ້ອຍ.

5ເຈົ້າຈະເຫັນສິ່ງນີ້ ແລະເຕັມດ້ວຍຄວາມປິຕິຍິນດີ ຈະທັງສັ່ນເຊັນດ້ວຍຄວາມຕື່ນເຕັ້ນ. ຊັບສົມບັດນາໆຊາດຈະຖືກນຳມາຈາກທີ່ຫ່າງໄກຂອງທະເລ ຊັບສົມບັດຂອງພວກເຂົາຈະມາຫາເຈົ້າ.

6ຂະບວນອູດຈະມາຈາກມີດີອານແລະເອຟາ ບັນທຸກຄຳແລະເຄື່ອງຫອມມາຈາກເຊບາພຸ້ນ. ປະຊາຊົນຕ່າງກໍຈະພາກັນປະກາດຄຳສັນລະເສີນ ເຖິງພາລະກິດອັນຍິ່ງໃຫຍ່ຂອງພຣະເຈົ້າຢາເວ

7ຝູງແກະທັງໝົດຂອງເນບາໂຢດແລະເກດາ ຈະຖືກນຳມາຖວາຍເປັນເຄື່ອງບູຊາແກ່ເຈົ້າ ແລະຖວາຍທີ່ເທິງແທ່ນບູຊາ ພຣະອົງຈະເຮັດໃຫ້ວິຫານຂອງພຣະອົງຮຸ່ງເຮືອງຍິ່ງໆຂຶ້ນ.

8ເປັນຫຍັງບັນດາເຮືອຈຶ່ງມາດັ່ງກ້ອນເມກນໍ ດັ່ງຝູງນົກເຂົາບິນຄືນສູ່ຮັງຢ່າງຟັ່ງຟ້າວ?

9ແມ່ນຂະບວນເຮືອໃຫຍ່ທີ່ກຳລັງມາຈາກແດນໄກ ກຳລັງນຳປະຊາຊົນຂອງພຣະອົງກັບຄືນມາບ້ານ. ພວກເຂົາເອົາເງິນແລະຄຳກັບຄືນມານຳ ເພື່ອຖວາຍເປັນກຽດແກ່ນາມຊື່ຂອງພຣະເຈົ້າຢາເວ ພຣະເຈົ້າຂອງພວກເຈົ້າ ແລະສຳລັບອົງບໍຣິສຸດຂອງຊາດອິດສະຣາເອນ ທີ່ເຮັດໃຫ້ທຸກຊົນຊາດຍົກຍໍປະຊາຊົນຂອງພຣະອົງ.

10ອົງພຣະຜູ້ເປັນເຈົ້າກ່າວແກ່ນະຄອນເຢຣູຊາເລັມວ່າ, “ຊາວຕ່າງດ້າວຈະສ້າງກຳແພງເຈົ້າຂຶ້ນໃໝ່ ກະສັດຂອງພວກເຂົາກໍຈະມີສິດຮັບໃຊ້ເຈົ້າຄືກັນ ທີ່ເຮົາໄດ້ລົງໂທດເຈົ້າໄປເພາະຄວາມໂກດຮ້າຍ; ແຕ່ບັດນີ້ ເຮົາຈະສຳແດງຄວາມເມດຕາ ເຮົາຈະໃຫ້ຄວາມປານີຂອງເຮົາແກ່ເຈົ້າ.

11ປະຕູເມືອງຂອງເຈົ້າຈະໄຂໄວ້ທັງເວັນທັງຄືນ ເພື່ອບັນດາກະສັດແຫ່ງປະຊາຊາດຈະນຳຊັບສົມບັດມາໃຫ້ເຈົ້າ.

12ແຕ່ບັນດາກະສັດແຫ່ງປະຊາຊາດທີ່ບໍ່ຍອມຮັບໃຊ້ເຈົ້າ ກໍຈະພາກັນຖືກທຳລາຍໃຫ້ພິນາດ.

13ໄມ້ສົນສີດາ ໄມ້ແປກ ທັງແປກເທດໃນປ່າເລບານອນ ຈະຖືກນຳມາສ້າງນະຄອນເຢຣູຊາເລັມຂຶ້ນໃໝ່ ເພື່ອເຮັດໃຫ້ວິຫານຂອງເຮົາສວຍສົດງົດງາມ ແລະເພື່ອໃຫ້ພຣະນະຄອນມີສະຫງ່າຣາສີດ້ວຍ.

14ພວກລູກຊາຍຂອງຄົນທີ່ກົດຂີ່ເຈົ້າກໍຈະມາ ກົ້ມຂາບລົງເພື່ອໃຫ້ຄວາມນັບຖືແກ່ເຈົ້າ. ຜູ້ທີ່ເຄີຍຫຍໍ້ຫຍັນເຈົ້າແຕ່ເມື່ອກ່ອນເມື່ອຫລັງ ກໍຈະນະມັດສະການເຮົາທີ່ແທບຕີນເຈົ້າ. ພວກເຂົາຈະເອີ້ນເຈົ້າວ່າ, ‘ນະຄອນຂອງພຣະເຈົ້າຢາເວ’ ‘ຊີໂອນ ເມືອງຂອງອົງບໍຣິສຸດແຫ່ງຊາດອິດສະຣາເອນ.’

15ເຈົ້າຈະບໍ່ຖືກປະຖິ້ມ ແລະບໍ່ເປັນທີ່ກຽດຊັງອີກຕໍ່ໄປ ບໍ່ເປັນນະຄອນທີ່ເສົ້າໝອງແລະຮ້າງເປົ່າອີກ. ເຮົາຈະເຮັດໃຫ້ເຈົ້າຍິ່ງໃຫຍ່ແລະງົດງາມ ເປັນທີ່ເບີກບານໃຈແລະຍິນດີໄປຕະຫລອດ.

16ບັນດາຊົນຊາດທັງກະສັດຈະເອົາໃຈໃສ່ເຈົ້າ ເໝືອນດັ່ງແມ່ຜູ້ໜຶ່ງລ້ຽງລູກຂອງຕົນນັ້ນ. ເຈົ້າຈະຮູ້ວ່າເຮົາຄືພຣະເຈົ້າຢາເວເປັນຜູ້ຊ່ວຍຂອງເຈົ້າ. ແລະເປັນຜູ້ໄຖ່ໂທດຂອງເຈົ້າ ຄືອົງຊົງຣິດອຳນາດຍິ່ງໃຫຍ່ຂອງຢາໂຄບ.

17ເຮົາຈະນຳເອົາຄຳມາໃຫ້ເຈົ້າ ແທນທີ່ຈະແມ່ນທອງສຳຣິດ ນຳເອົາເງິນມາໃຫ້ ແທນທີ່ຈະແມ່ນເຫຼັກ ເຮົາຈະນຳເອົາທອງສຳຣິດ ແທນທີ່ຈະນຳໄມ້ມາ ນຳເອົາເຫຼັກ ແທນທີ່ຈະນຳຫີນມາໃຫ້. ພວກຜູ້ປົກຄອງຂອງເຈົ້າຈະບໍ່ກົດຂີ່ເຈົ້າອີກຕໍ່ໄປ; ພວກເຂົາຈະປົກຄອງຢ່າງຍຸດຕິທຳ ແລະມີສັນຕິສຸກລົ້ນ.

18ສຽງຂອງຄວາມຮຸນແຮງນັ້ນຈະບໍ່ມີຕໍ່ໄປ ຄວາມຈິບຫາຍຈະບໍ່ມາທຳລາຍປະເທດອີກ. ເຮົາຈະເປັນດັ່ງກຳແພງລ້ອມປົກປ້ອງຄຸ້ມຄອງ ເຈົ້າຈະຍົກຍໍເຮົາເພາະເຮົາຊ່ວຍເຈົ້າໃຫ້ພົ້ນ.

19ຕາເວັນຈະບໍ່ເປັນແຈ້ງສຳລັບກາງເວັນຕໍ່ໄປ ຫລືເດືອນຈະບໍ່ເປັນແສງແຈ່ມໃສສຳລັບກາງຄືນອີກ; ແຕ່ພຣະເຈົ້າຢາເວຈະເປັນແສງແຈ້ງສືບໄປ ແລະພຣະເຈົ້າຂອງເຈົ້າຈະເປັນສະຫງ່າຣາສີຂອງເຈົ້າ.

20ມື້ທີ່ເຈົ້າໂສກເສົ້າເສຍໃຈຈະສິ້ນສຸດໄປ ພຣະເຈົ້າຢາເວຈະເປັນແຈ້ງຂອງເຈົ້າ ຄືເປັນຄວາມສະຫວ່າງຂອງເຈົ້າຕະຫລອດໄປ ສ່ອງແສງແຈ້ງກວ່າຕາເວັນແລະເດືອນອີກ.

21ປະຊາຊົນຂອງເຈົ້າຈະເຮັດສິ່ງຖືກຕ້ອງທັງໝົດ ແລະໄດ້ເປັນເຈົ້າຂອງດິນແດນສືບໄປເປັນນິດ. ເຮົາໄດ້ປູກພວກເຂົາໄວ້ແລະເຮົາໄດ້ສ້າງພວກເຂົາຂຶ້ນມາ ເພື່ອເຜີຍຄວາມຍິ່ງໃຫຍ່ຂອງເຮົາໃຫ້ໂລກໄດ້ຮູ້.

22ເຖິງວ່າຄອບຄົວເຈົ້າໜ້ອຍ ແລະຕໍ່າຕ້ອຍທີ່ສຸດ ກໍຈະກາຍເປັນໃຫຍ່ໂຕດັ່ງຊົນຊາດມີອຳນາດ. ເຮົາຈະເຮັດໃຫ້ເລື່ອງນີ້ເກີດຂຶ້ນໂດຍໄວ ເຮົາແມ່ນພຣະເຈົ້າຢາເວ.”

← Chapter 59 Jump to: Chapter 61 →