Isaiah 46

Lao Bible 2012 (ພຣະຄຳພີສັກສິ)

← Chapter 45 Jump to: Chapter 47 →

1“ນີ້ຄືຈຸດຈົບຂອງບັນດາພະທີ່ນະຄອນບາບີໂລນ ພະເບັນແລະເນໂບ ທີ່ຄັ້ງໜຶ່ງ ຊາວນະຄອນໄດ້ຂາບໄຫວ້ ແຕ່ບັດນີ້ ພະເຫຼົ່ານັ້ນຖືກບັນທຸກໃສ່ຫລັງລໍ ເປັນພາລະໜັກໃຫ້ສັດທີ່ກຳລັງອິດເມື່ອຍ.

2ຮູບເຄົາຣົບເຫຼົ່ານັ້ນຊ່ວຍມັນເອງບໍ່ໄດ້ເລີຍ ຊາວນະຄອນໄດ້ຮິບໂຮມ ແລະເອົາໜີໄປໄວ້ທີ່ອື່ນ. ນີ້ແຫລະ ແມ່ນຈຸດອະວະສານຂອງພວກມັນ ຄືຂອງບັນດາພະທີ່ນະຄອນບາບີໂລນນັ້ນ.

3ຈົ່ງຟັງເຮົາເທີ້ນ ເຊື້ອສາຍຂອງຢາໂຄບເອີຍ ຄືປະຊາຊົນທັງໝົດຂອງເຮົາທີ່ຍັງມີຊີວິດຢູ່ນັ້ນ. ເຮົາໄດ້ເບິ່ງແຍງພວກເຈົ້າແຕ່ໃດໆມາ ຄືຕອນທີ່ພວກເຈົ້າເກີດມາແຕ່ທ້ອງແມ່.

4ເຮົາເປັນພຣະເຈົ້າຈະດູແລພວກເຈົ້າເອງ ຈົນກວ່າເຖົ້າແກ່ຊະຣາຜົມເປັນສີເຖົ່າ. ເຮົາໄດ້ສ້າງພວກເຈົ້າແລະຈະເປັນຜູ້ດູແລ ເຮົາຈະຊ່ວຍຊູແລະຊ່ວຍກູ້ເອົາພວກເຈົ້າ.”

5ອົງພຣະຜູ້ເປັນເຈົ້າກ່າວວ່າ, “ພວກເຈົ້າຈະປຽບທຽບເຮົາໃສ່ຜູ້ໃດ? ຫລືມີຜູ້ໃດບໍທີ່ຄ້າຍຄືກັນກັບເຮົານີ້?

6ປະຊາຊົນໄຂກະເປົາ ແລະຖອກຄຳອອກມາ ຊັ່ງເບິ່ງນໍ້າໜັກເງິນໃສ່ຊິງທີ່ພວກເຂົາມີນັ້ນ. ພວກເຂົາຈ້າງຊ່າງຫລອມຄຳໃຫ້ເຮັດເປັນຮູບພະ ແລ້ວກໍຂາບໄຫວ້ຮູບພະທີ່ໄດ້ສ້າງຂຶ້ນມາ.

7ພວກເຂົາຍົກມັນຂຶ້ນໃສ່ບ່າ ແລະພາກັນຫາມໄປ ວາງຮູບພະລົງຢູ່ທີ່ໃດ ມັນກໍຢືນຢູ່ທີ່ນັ້ນ ມັນເໜັງຕີງຍ້າຍໄປມາບ່ອນໃດບໍ່ໄດ້ເລີຍ ຖ້າຜູ້ໃດຜູ້ໜຶ່ງພາວັນນາອະທິຖານມັນກໍຕອບຫຍັງບໍ່ໄດ້ ຫລືບໍ່ສາມາດຊ່ວຍຄົນໃດຄົນໜຶ່ງໄດ້ເລີຍ ໃຫ້ພົ້ນຈາກໄພພິບັດທີ່ມາປະເຊີນນັ້ນ.

8ຄົນບາບທັງຫລາຍເອີຍ ຈົ່ງຈົດຈຳສິ່ງນີ້ ຈົ່ງພິຈາລະນາສິ່ງທີ່ເຮົາໄດ້ເຮັດມານັ້ນ.

9ຈົ່ງຈົດຈຳສິ່ງທີ່ໄດ້ເກີດຂຶ້ນແຕ່ດົນນານ ຈົ່ງຮັບຮູ້ວ່າເຮົາແຕ່ຜູ້ດຽວທີ່ເປັນພຣະເຈົ້າ ແລະຮັບຮູ້ວ່ານອກຈາກເຮົາແລ້ວບໍ່ມີຜູ້ໃດ ເພາະແມ່ນເຮົາແຕ່ຜູ້ດຽວທີ່ເປັນພຣະເຈົ້າ.

10ຕັ້ງແຕ່ຕົ້ນເຮົາກ່າວໄວ້ກ່ອນເຖິງສິ່ງທີ່ຈະມີມາ ເຮົາໄດ້ບອກໄວ້ແຕ່ດົນນານໃນສິ່ງທີ່ຈະເກີດຂຶ້ນ. ເຮົາບອກວ່າ, ແຜນການຂອງເຮົາບໍ່ເຄີຍຫລົ້ມເຫລວ ເຮົາເຮັດທຸກໆສິ່ງຕາມທີ່ເຮົາຢາກເຮັດ.

11ແຕ່ທິດຕາເວັນອອກ ເຮົາກຳລັງເອີ້ນເອົາຄົນໜຶ່ງມາ ລາວຈະຊັດຫົວລົງດັ່ງໂຕແຫລວບິນເຈີດ ລາວຈະເຮັດສຳເລັດຕາມທີ່ເຮົາໄດ້ວາງແຜນ ເຮົາກ່າວໄວ້ຢ່າງໃດກໍຈະເກີດຂຶ້ນຢ່າງນັ້ນ.

12ຈົ່ງຟັງ ພວກເຈົ້າປະຊາຊົນທີ່ດື້ດ້ານເອີຍ ຜູ້ໃດຄິດວ່າຄວາມມີໄຊມັນຢູ່ໄກເກີນຢື້.

13ເຮົາພວມນຳມື້ໄຊຊະນະເຂົ້າມາໃກ້ທຸກທີ ເປັນໄຊຊະນະທີ່ບໍ່ຢູ່ໄກແຕ່ຢ່າງໃດຈັກດີ້. ຄວາມມີໄຊຂອງເຮົາຈະບໍ່ຖືກເຮັດໃຫ້ຊັກຊ້າໄປ ເຢຣູຊາເລັມແລະອິດສະຣາເອນ ຈະມີຜູ້ຊ່ວຍທັງໄດ້ຮັບກຽດ.”

← Chapter 45 Jump to: Chapter 47 →